38
Hezekáya bẹ iphe eme
(2 Eze 20:1-11)
1 Teke ọbu bẹ iphe-ememe gudejeru Hezekáya; k'ọphu ọ phọduru nwagẹngu m'ọ nwụhu. Onye nkfuchiru Nchileke, eeku Azáya Emọzu ejekfube iya je asụ iya: “Ọwaa iphe Ojejoje ekfu: Jịkobekwa ufu ngu; kẹ l'ịibyaakwa anwụhu; i tii kakwa mma l'iphe ono, eme ngu nụ ono.”
2 Ya ndono; Hezekáya abya aghachi ifu l'oshi-ẹpoto iya; bya ekfuru nụ Ojejoje; sụ iya:
3 “Nggụbe Ojejoje; nyatakwa lẹ mu gude ire-lanụ jeeru ngu ozi; bụru onye obu gụru iphoro l'ẹke ị nọ; bẹ mu bya emekwaaphu iphe dụ maa l'ifu ngu.” Hezekáya arashikpoo ẹkwa ike.
4 Tọ dụ iya bụ; Ojejoje abya ekfuru yeru Azáya; sụ iya:
5 “Je ekfuru Hezekáya ẹge-a: Ọwaa iphe o kfuru; mbụ Ojejoje, bụ Nchileke kẹ nna ngu Dévidi: Mu nụakwaru iphe i kfuru mu; bya aphụwa ẹnya-mini ngu. Mu e-me t'ị nọfua afa iri l'ise.
6 Ọdo bụ lẹ mu a-dzọ ngu dzọo mkpụkpu-a l'ẹka eze ndu Asiriya. Mu a-gbataru mkpụkpu-a.
7 “Ọwaa iphe-ọhubama, mụbe Ojejoje e-me koshi ngu ndọ-ọ; t'i gude maru lẹ mu e-me iphe mu kweru ụkwa ememe.
8 ?Ị phụru nwonyonyo ono, nọ l'iphe ono, e meru, eegudeje enyikobe ụlo Éhazu ono? Ya e-tsula nwonyonyo ono azụ ntụ-ọkpa iri.”
Nwonyonyo ono atsụla azụ ntụ-ọkpa iri l'ẹge o shi ha ogologo.
9 Ọwaa bụ iphe Hezekáya deru; mbụ eze ndu Júda l'iphe-ememe ono metsuaru iya; yọ kọrohu.
10 Mu sụkwaru: “?Bụ nta-a,
ọ bụkwadu mu-a l'ikoro-a;
bẹ mu egbe gbakwofu;
mbụ e gbe nyakwota mu anyakwota?”
11 Mu abya asụkwaphu;
mẹ mu te gega aphụheduna
Ojejoje ọdo l'alị ndu nọ ndzụ.
Mbụ mẹ mu ta g'aphụhedu madzụ ọdo;
mbụ ndu bu lẹ mgboko-a;
bẹ mu l'ẹphe t'aga anọhedu.
12 E kpufuru ndzụ mu;
l'ọ bụ onye kpufuru ụlo ụnwu-eswi;
mbụ phụfu ndzụ mu ẹge
onye akpa iphe aphụfuje
iphe ọ kpaghewaru.
Ọ gbabufuwaru ndzụ mu
ẹge onye ekwe ẹkwa
agbabufuje eri l'iphe
o gude ekwe ẹkwa teke
ọ kpaghewaru ẹkwa.
Mbụ shita l'eswe jeye
l'ẹnyashi b'o meje;
mu l'ala maa alala.
13 Mu akpọkotaje mkpu jeye nchi abọhu.
Ọ tapyashịje ọkpu, nọ mu l'ẹhu l'ọ bụ agụ.
Mbụ tsube l'eswe jeye ẹnyashi;
b'o meje; mu anwụhu anwụhu.
14 Mu arakọtaje l'ọ bụ
mgbashị-ujiku; zụkota l'ọ
bụ okpuru-iyakoko;
mbụ zụkota l'ọ bụ kpirihoho.
Mu lewaru ẹnya l'igwe;
ẹnya atsụwa mu ụbo.
Mu asụ: Byiko Nnajiufu;
gbanuaru mu mkpu
l'iphe-ẹhuka-a, mu eje-a!
15 Ọ bụ; ?bụ ngụnu bẹ mu
e-kfu?
Kẹ l'o kfuwaru mu l'ọ bụ
yẹbedua pakfutaru mu iphe ọwaa.
Mu a-wata ome odo
jeye teke mu a-nọ-bebe;
kẹ iphe-ọnikiri-a, mu eje.
16 Nggụbe Nnajiufu;
ọ kwa egbe iphe-a;
bẹ madzụ gude buru.
Yọ bụkwaru iya phụ;
bẹ mu gude nọdu ndzụ nta-a.
Byiko; menua tẹ mu kọrohu;
menua tẹ ndzụ dzua mu!
17 Ọ bụ-a oswi-okfu;
l'ọ bụ t'ọ dụru mu lẹ mma;
bẹ mu gude jee egbe iphe-ọnikiri ono.
Ishi iya abụru l'i yeru mu obu;
bya atụko iphe ẹji mu
l'ọ ha ruru ye l'azụ
bya anafụta mu l'alị maa.
18 Mẹ ndu nọwa l'alị-maa;
te etukwa ngu ẹpha.
Ọphu ndu nwụhuwaru
anwụhu 'agụkwa egvu gude aja ngu ajaja.
Ọphu ndu e kpochiwaru;
'elehekwa ẹnya ire-lanụ ngu.
19 Ọ kwa ndu, nọ ndzụ;
bụ ndu a-jaghe ngu ajaja
ẹge mu aja ngu iya ntanụ-a.
Iphe, bụ ọgbo ọphu nọnu
ekfujeru ọgbo ọphu tso
ẹphe l'ị bụ onye
evudoshije ike l'iphe i kfuru.
20 Ojejoje e-me-e tẹ kọrohu.
Mu e-gude ngwa-egvu;
gụa egvu gude jaa ya
ajaja l'eze-ụlo Nchileke
jeye mbọku nka-ezekụna nke mu.
21 Azáya kfuwaru sụ t'e meta akpụru oshi figu tsua etsutsu debetsua Hezekáya l'iphe-etsetse ono, tsekashiru iya ono; t'ọ kpọshihu iya.
22 Hezekáya bya ajịa; sụ: “?Bụkpo ngụnu bụ iphe e-me nụ tẹ mu maru lẹ mu e-mekocha-a bahụ l'eze-ụlo Nchileke ọdo?”