25
Egvu, eegude etu Ojejoje ẹpha
1 Nggụbe Ojejoje;
ọ bụ nggu bụ Nchileke mu.
Mu a-nọdu atụ-li ngu atụ-li;
l'eku ẹpha ngu gude aja ngu ajaja.
Kẹ l'i mewaru iphe dụ biribiri.
Ịivudoshi ike l'iphe,
ị chịru idzu iya teke ndiche;
2 kẹ l'i mewaru mkpụkpu ono; yọ bụru ikpọzu;
mbụ mee mkpụkpu,
a kpụ-pheru ụpho-mkpuma mgburumgburu;
yọ daburu ochobo.
Ẹke ndu ọhodo kpụru;
yọ bụru ọkpo-mgbinyiku;
b'i mewaru; yọ bụru ochobo;
ọphu a byadụ bya
akpụ-kwazi iya ọdo jeye lẹ gbururu.
3 Ọ bụ iya a-kpata iphe ndu
nweru agburu-ẹhu a-nọdu akwabẹ ngu ugvu.
Iphe, bụ mbakeshi ono,
mkpụkpu nọtsua ya nụ;
bụkota ndu akirishi ono
awata ọkwabe ugvu.
4 Keshinu keshinu;
bụ nggu shi bụtaru
a-gbabe-a-dzụru kẹ ndu ụkpa;
bụru nggu bụ
a-gbabe-a-dzụru kẹ ndu
o ribudoru.
Ọ bụ nggu bụ ụlo,
egbobutaje ndu oke phẹrephere apa;
bụru nggu bụ àgù onye okpomọku ekpo;
kẹ l'uphere ndu akirishi adụje
l'ọ bụ ẹke oke phẹrephere,
eme t'o nwutsua ụpho-mkpuma.
5 Mbụ l'ọ dụlephu l'ọ bụ
okpomọku alị eveve.
Ọ bụ nggu emeje
tẹ ndu ọhodo, ada gvụgvu da bẹdengu.
Ọ bụ ẹge agu, shi l'urukpu
abyanyije okpomọku;
bụ ẹge aabyanyije egvu ndu akirishi agụ.
Ajị, Ojejoje a-gbaru ndibe iya
6 Ọ bụ l'eli ugvu-a bẹ Ojejoje, bụ Ọkaribe-Kakọta-Ike e-gude ọkpobe nri gbaaru iphe bụ madzụ eswe-iphe; gaaru ẹphe mẹe ndiche; mbụ shiaru ẹphe anụ, katsụkpo mẹ mẹe katsụkpo mma.
7 Ọ bụ l'eli ugvu-a bẹ ọo-nọdu mebyishia phụlaphula iphe ono, e gude phụ-kputatsua iphe bụ madzụ; mbụ ẹkwa, e gude phụ-chia iphe bụ mbakeshi ono.
8 Oo-me ọnwu ta nọhe gbururu jeye lẹ gbururu. Mbụ lẹ Nnajiufu, bụ Nchileke e-fucha onyemonye ọbule ẹnya-mini l'ẹnya. Iphe-iphere ono, e shi eme ndibe iya ono bẹ oo-me t'ọ gvụkota lẹ mgboko mgburumgburu. Ọ kwa iphe Ojejoje kfuru ndono.
9 O -rua mbọku ono bẹ ẹphe a-sụ: “Lenu! Ọ bụkpokwa Nchileke ayi ndọ-ọ. Ayi tukoberu iya ishi; yọ dzọo ayi. Ọ bụ Ojejoje ndọ-ọ; ayi tukoberu iya ishi. T'ẹhu tsọo ayi! T'ayi teje ẹswa l'ọ dzọru ayi.”
Aphụ, a-nụ ndu Móabu
10 Ojejoje e-gbochita ugvu-a. Obenu lẹ ndu Móabu bẹ aa-dzọ lụlalula l'ibe ẹphe ẹge ono, aadzọje ẹswa pyakapyaka l'ikpọzu ono.
11 Ẹphe a-sụsa ẹka labụ l'ọ bụ onye egvu mini sụsaru ẹka t'o gvua mini. Obenu lẹ Ojejoje e-me-e t'ekuku, ẹphe eku onwẹphe bụru tsụtokongu.
12 Ọo-byatsuta ụpho-mkpuma ono, unu kpụru ono; yọ bụru ọkpo-mgbinyiku; l'akpọ origodo ono; mbụ mee ya; yo zẹshihu yẹle ẹja abụru nanụ.