3
Habakuku ekfu anụ Nchileke
1 Ọwaa bụ ekfukfu, onye nkfuchiru Nchileke, bụ Habakuku kfuru nụ Nchileke. Ọ gụru iya l'ọ bụ egvu-aphụ.
2 Nggụbe Ojejoje;
mu nụwaru ọtu-ọnu ngu.
Iphe i meshiru eye mu egvu.
Nggụbe Ojejoje;
menua ya ọdo nta-a,
ayi nọ ndzụ-a!
Menua t'a maru iya l'oge nk'ayi-a!
T'ẹhu ghukwaa ngu eghughu;
ọlobu; nyatakwa obu-imiko ngu ono.
3 Nchileke shikwa lẹ Témanu bya;
mbụ tẹ Onye Nsọ ono
shikwa lẹ Ugvu Paranu bya.
O-gbu-nwịi-nwịi ya tụko
imigwe l'ọ ha sweta;
mgboko mgburumgburu
l'aja iya ajaja.
4 O-gbu-nwịi-nwịi ya
dụ l'ọ bụ ẹke ẹnyanwu wataru.
Ẹka iya, bụkwanu ẹke
o domiru ike iya atụko egbu nwịinwii.
5 O ziru ẹjo iphe-ememe t'o vutaru iya ụzo;
bya ezia mgbọnwu t'o tso iya l'azụ.
6 Evudo b'o vudo; nmaa mgboko yikayika.
Yọ bụru ẹnya, o leru;
bẹ iphe bụ mbakeshi nmahụru jijiji.
Eze ugvu ndiche ono
atụko gbakpọshihu.
Ndu ọphu bụ ụnwu ugvu
ndu kẹ akahụ adakpọshihu.
Ụzo, ọ tọru; bẹ shi l'ede-nwede.
7 Mu phụru ndu Kúshi l'ẹke
ẹphe nọtsua l'ụlo-ẹ́kwà;
l'eje iphe-ẹhuka;
bya aphụa ndu Mídiya
l'ẹke ẹphe nọtsua l'ụlo ẹphe l'atsụ ude.
8 ?Bụ nggele nggele b'i shi
tukoshi oke ẹhu-eghughu ngu;
nggụbe Ojejoje?
?Bụ ẹnyimu b'i shi abaru m̀bà tọo.
?Tọ bụ eze ẹnyimu meru
iphe ẹhu shi eghu ngu kẹ damụdamu
teke ono, i shi agba l'eli ịnya ngu ono;
mbụ teke ono, i shi gude
urukpu meru ụgbo-ịnya,
iigudeje mekputa ọhogu ngu ono tọo?
9 Ụta ngu b'ị chịfutaru wụshi;
kwakọbe t'ị gbaa akfụ ngu.
I gude nggele kewashia mgboko.
10 Eze ugvu phụru ngu; nmahu jijiji.
Ọchi-ọku mini abya atsọo tsọ-swee.
Ebo mini, aswọo mgburumgburu;
akpara-mini -bya; yo kuta mini ghaa l'imeli.
11 Ẹnyanwu yẹle ọnwa phụru akfụ ngu;
mẹ arwa ngu l'ẹke oozi vaavaa abya;
kegbaaru jịngujingu l'akpamigwe.
12 I gude oke ẹhu-eghughu
dzọo garamu garamu
dzọjaa mgboko ẹbo;
bya egude ọvuma dzọo
iphe bụ mbakeshi pyaapyaa.
13 Ị byaru t'ị bya adzọo ndibe ngu;
mbụ t'ị bya adzọta onye nke
ngu ono, a wụru manụ l'ishi ono.
Onye ishi, achị alị ndu ẹjo iya ono;
b'i gweru rakaraka;
bya eshi l'ishi phụfu iya iphe jeye l'ọkpa.
14 Ọ bụ arwa nk'iya b'i gude sụjaa ya ishi
teke ono, ndu sọja iya
wụfutaru t'ẹphe chịkaa ayi ono.
Ẹphe atụ ụzu l'ẹphe abya ọlajashi ndu ono,
iphe-ẹhuka byaru ono alajashị;
mbụ ndu ono, domishiru
onwẹphe edomishi ono.
15 I gude ịnya nmaa
eze ẹnyimu yikayika; sweta;
mbụ swee eze mini,
jiru ejiji; l'akpa rokoroko.
16 Teke mu nụru iphe ono;
bẹ meji gbabuhuru mu;
ọnu anmakọta mu
kpakpakpa l'ẹke mu nụru igidi iya.
Ọkpu, nọ mu l'ẹhu
erushihukota mu erushihu;
ọkpa anmakọta mu kpakpakpa.
Mu a-takpẹlephu nshi; kwabẹru mbọku,
ẹphe e-je oke iphe-ẹhuka;
mbụ ndu ono, etso ayi ọgu ono.
17 T'e ewota iya rụ;
l'oshi figu ta atsụhedu igu;
oshi vayịnu ta amịhe nebyi;
akpụru oshi olivu adashịkota;
ọphu iphe e meberu l'alị te emehu emehu;
mbụ; t'a sụkwaru l'atụru gvụru l'ọdu-atụru;
eswi ta nọhe l'ọdu-eswi;
18 mu a-nọdulekwaa ete ẹswa l'ẹke Ojejoje nọ.
Ẹhu a-nọdulekwaa atsọ mu
ẹna l'ẹke Nchileke ono,
bụ onye ndzọta mu ono nọ.
19 Ọ kwa Ojejoje ono,
bụ Nchileke mu ono bụ ike mu.
Oomeje t'ọkpa egwo mu l'ọ bụ ọkpa mgbada.
Ọonuje mu ike;
tẹ mu dụ ike nyikobe eli ugvu.
Ọ kwa onye ishi egvu b'ọ dụru; bụru une mu; bẹ ee-gude kpọo ya.