46
Jékọpu ala Íjiputu
1 Ya ndono; Ízurẹlu abya egwokoo iphemiphe ọbule, o nweru tụgbua. Yo rua Besheba bya egwooru Nchileke kẹ nna iya, bụ Áyizaku ẹja.
2 Nchileke abya eshi l'àphụ̀ kfuru yeru Ízurẹlu l'ẹnyashi ono; sụ iya: “Jékọpu! Jékọpu!”
Yọ za iya.
3 Nchileke asụ iya: “L'ọ kwa yẹbe Nchileke bụ Nchileke kẹ nna ngu. Ba atsụkwa egvu ọla Íjiputu; kẹle ya e-me ngu t'ị bụru mba, ha nshinu l'ẹke ono.
4 Ya e-duru ngu je Íjiputu ono; dulatakwa ngu phụ azụ. Ọ bụ Jósẹfu a-nọ swiru ngu teke ịi-nwụhu.”
5 Ya ndono; Jékọpu egbeshi lẹ Besheba; yọ bụru iya atụgbu. Ụnwu Ízurẹlu eduta nna ẹphe ono, bụ iya bụ Jékọpu ye l'ụgbo-ịnya ono, Fero nụru t'e gude pata iya ono. Ẹphe edutakwaphu ụnwu ẹphe; mẹ unyomu ẹphe ye l'ụgbo-ịnya ono; yọ bụru iya ẹphe.
6 Ẹphe erutakota elu ẹphe; mẹ iphemiphe ọbule, ẹphe setaru l'alị Kénanu. Jékọpu yẹle ụnwu iya kpamukpamu ekpolihu; yọ bụru ẹphe ọla Íjiputu.
7 O dutaru ụnwu iya: ndu kẹ unwoke; mẹ ụnwu nwanwa iya ndu k'unwoke; duta ndu k'ụnwanyi; mẹ ụnwu nwanwa iya ndu k'ụnwanyi; tụko iphe bụ iphe, shi l'eri iya; ruta; yọ bụru ẹphe ọla Íjiputu.
8 Ọwaa ụnwu Ízurẹlu,
bụ iya bụ Jékọpu;
mẹ iphe bụ iphe,
shi l'eri iya, tso iya la Íjiputu:
Rúbẹnu, bụ ọkpara iya.
9 Ụnwu Rúbẹnu bụ:
Hanọku; Palu; Hézurọnu;
mẹ Kami.
10 Ụnwu kẹ Símiyọnu bụ:
Jimuwẹlu; Jaminu; Ohadu;
mẹ Jakinu; Zoharu;
mẹ Shọlu, bụ nwatibe
nwanyi kẹ Kénanu.
11 Ụnwu kẹ Lívayi bụ:
Geshọnu; Kohatu;
mẹ Merari.
12 Ụnwu kẹ Júda bụ:
Ẹru; Onanu; Shela;
Pẹ́rezu; mẹ Zera.
Ẹru yẹle Onanu;
bẹ nwụhuhawaru
lẹ Kénanu.
Ụnwu Pẹ́rezu bụ:
Hézurọnu; ọwaa Hamulu.
13 Ụnwu kẹ Ísaka bụ:
Tola; Puwa; Jashubu;
ọwaa Shimurọnu.
14 Ụnwu kẹ Zébulọnu bụ:
Sẹredu; Elọnu; mẹ Jahulẹlu.
15 Ndu ono l'ẹphe ha bụkota ụnwu, Lii mụshiru Jékọpu lẹ Padanu-Áramu; a gụfukwa nwatibe iya kẹ nwanyi, bụ iya Dayina. Ụnwegirima iya ono l'ẹphe ha: unwoke l'ụnwanyi bụ iphe ẹphe kpakọru dụ bụ ụkporo madzụ l'ụmadzu iri l'ẹto.
16 Ụnwu kẹ Gádu bụ:
Zefọnu; Hagi; Shuni;
Ezubọnu; Éri;
Arodi; mẹ Areli.
17 Ụnwu kẹ Ásha bụ:
Imuna; Ishiva; Ishivi;
ọwaa Beríya.
Nwunne ẹphe kẹ nwanyi bụ Séra.
Ụnwu kẹ Beraya abụru:
Heba; mẹ Milikiyẹlu.
18 Ndu ono bụkota ụnwu, Zilipa mụtaru Jékọpu. Zilipa bụ nwanyi ono, Lébanu duru yeru nwatibe iya kẹ nwanyi; mbụ Lii l'ụlo t'ọ bụru iya ohu ono. Iphe ẹphe kpakọru dụ bụ ụmadzu iri l'ishingu.
19 Ụnwu kẹ Rechẹlu,
bụ nyee Jékọpu bụ:
Jósẹfu yẹle Bénjaminu.
20 Jósẹfu nọ lẹ Íjiputu mụta
Manásẹ; mẹ Ífuremu.
Nwanyi, mụru Jósẹfu ụnwegirima ono
bụ Asenatu, bụ nwatibe Pọtifera.
Pọtifera bụ onye agwajẹru ndu Ọnu iphe.
21 Ụnwu kẹ Bénjaminu bụ:
Béla; Beka; Ashibẹlu;
Gera; Námanu; Ehi;
Roshi; Mupimu;
Hupimu; mẹ Arudu.
22 Ndu ono l'ẹphe ha bụ ụnwu, Rechẹlu mụtaru Jékọpu. Iphe ẹphe kpakọru dụ bụ ụmadzu iri l'ẹno.
23 Nwatibe kẹ Dánu bụ Hushimu.
24 Ụnwu kẹ Náfutali bụ:
Jazẹlu; Guni;
Jeza; ọwaa Shilemu.
25 Ndu ono bụ ụnwegirima, Biliha mụtaru Jékọpu. Biliha bụ nwanyi ono, Lébanu duru yeru nwatibe iya kẹ nwanyi; mbụ Rechẹlu l'ụlo t'ọ bụru iya ohu ono. Iphe ẹphe kpakọru dụ bụ ụmadzu ẹsaa.
26 Iphe ẹphe kpakọru dụ mbụ ndu tsoru Jékọpu laa Íjiputu bụ ụkporo ụmadzu ẹto l'ụmadzu ishingu; mbụ ndu bẹ ụnwu iya; a gụfukwa unyomu ụnwu iya phẹ.
27 A -gụkobe iya ụmadzu labụ ono, a mụtaru Jósẹfu lẹ Íjiputu ono bẹ iphe ẹphe kpakọru dụ; mbụ ndibe Jékọpu, laru Íjiputu bụ ụkporo ụmadzu ẹto l'ụmadzu iri.
28 Tọ dụ iya bụ; Jékọpu abya eyefu Júda t'o vuru ụzo je eduta Jósẹfu t'ọ bya ekoshi ẹphe ẹke e shi eje Góshẹnu. Ẹphe erulephu alị Gọ́shenu;
29 Jósẹfu abya ewota ụgbo-ịnya iya mee ya ẹge ọo-dụ t'o gude iya je ẹphe ndzuta. Yo rua je atụ nna iya ono gbirimu; rụkua ya ẹka; wata ẹkwa; raa ẹkwa ono ogologo.
30 Ízurẹlu asụ Jósẹfu: “Tẹ ya nwụhuwaru nta-a; keshinu ọphu ya gudewa ẹnya iya phụ l'ị nọkwadua ndzụ!”
31 Tọ dụ iya bụ; Jósẹfu asụ ụnwunna iya; mẹ ndibe nna iya l'ẹphe ha: “Lẹ ya e-je ekfuru Fero l'ụnwunna iya; mẹ ndibe nna iya, shi l'alị Kénanu bẹ lakfutaakwaru iya nụ.
32 Ya e-kfuru iya l'ẹphe bụkwa ndu eche atụru; mbụ l'ẹphe bụ ndu azụ elu; l'ẹphe chịkwa atụru ẹphe; mẹ eswi ẹphe; mẹ iphemiphe ọbule, ẹphe nweru enweru l'ọ ha.”
33 Wo ẹphe: “Ọ -bụru lẹ Fero kuru unu; jị unu iphe bụ ẹka-ọru unu;
34 unu sụkwa iya l'unubẹ ndu ozi iya shikwaru lẹ dẹedeedee bụtaru ndu azụ elu; ẹge nna unu oche phe shihawa bụru. Ono kwa ẹge ee-shi; e kwe t'unu buru lẹ Gọ́shenu; kẹle ndu eche atụru adụjekwa ndu Íjiputu ashị.”