15
Egvu Mósisu
1 Ya ndono; Mósisu; mẹ ndu Ízurẹlu agụa egvu-a nụ Ojejoje; sụ:
Ya a-gụ egvu nụ Ojejoje;
kẹ l'o koshiwaru l'ọ ha nshinu.
Ịnya; mẹ ndu agba iya nụ;
b'o nwuru ye l'eze ẹnyimu.
2 Ọ bụ Ojejoje bụ agburu-ẹhu mu;
bụru onye mu agụ-ku l'egvu.
Ọ bụ iya bụ onye dzọfutaru mu nụ.
Ọ bụ iya bụ Nchileke mu;
mu a-jajẹ iya ajaja.
Ọ bụ iya bụ Nchileke nna mu;
mu a-nọdu apali ẹpha iya eli.
3 Ojejoje bụ sọja.
Ọo Ojejoje bụ ẹpha iya.
4 Ụgbo-ịnya Fero yẹle ndu sọja iya;
b'o nwuru ye l'eze ẹnyimu.
Ndu, katsụa mma
lẹ ndu ishi ụgbo-ịnya Fero;
bẹ mini rigbushiru
lẹ Eze Ẹnyimu Uswe.
5 Ebo mini riru ẹphe;
ẹphe abụru tụbukungu
l'ọhu-mini l'ọ bụ mkpuma.
6 Ẹka-ụtara ngu nggụbe Ojejoje;
bẹ agburu-ẹhu,
nọ iya nụ dụ biribiri.
Ẹka-ụtara nggụbe Ojejoje;
bẹ gweru ndu ọhogu ngu ogwe uji.
7 I gude ọdu-biribiri ngu,
ha nshinu kwatsushia ndu
wụ-lihuru nụ; tso ngu okfu.
Nggu ahaa oke
ẹhu-eghughu ngu,
enwu l'ọ bụ ọku;
yọ bya etsua ẹphe
l'ọ bụ ẹswa ọkponku.
8 Ọ bụ ume b'i ziru;
eze ẹnyimu akọo ogiji.
Utso ono akfụru l'ọ bụ ụpho-mkpuma.
Ebo mini ahụkoo l'ọhu eze ẹnyimu.
9 Ndu ọhogu saru nsasa; sụ:
“L'ẹphe a-chị ayi; gude ayi.
L'ẹphe e-ke iphe ayi;
gude ayi mee ẹge dụ ẹphe mma.
Ẹphe a-mị ogu-mbeke ẹphe
gude gbushia ayi.”
10 Obenu l'ị tụru ume;
eze ẹnyimu atụko ẹphe rigbushia.
Ẹphe abụru tụbukungu
l'eze ẹnyimu l'ọ bụ
ọta-njele.
11 ?Nanu agwa, atụru
nggụbe Ojejoje?
“?Bụ onye dụ l'ọ bụ nggu?
Ẹge ị dụ-be nsọ dụ biribiri.
Ẹge ị dụ-be akpabiri adụ egvu.
Iimeje iphe, dụ biribiri.
12 Ẹka-ụtara ngu b'ị machịru;
mgboko abya atụko
ndu ọhogu ayi lee.
13 “Ndu ị gbafutaru;
bẹ ii-gude n-yemobu ngu; dua.
Yọ bụru l'ẹke ono,
i bu, dụ nsọ ono;
bẹ ii-gude agburu-ẹhu ngu
durua ẹphe.
14 Iphe bụ mbakeshi,
nụru iya nụ; bẹ egvu e-ru l'ẹhu.
Egvu e-gude ndu Filísutiya.
15 Ndu achị ndu Édọmu;
bẹ meji a-tọfu.
Ẹhu anmaa ndu ishi
Móabu anmanma.
Ndu Kénanu erushihu.
16 Ọtsu egvu;
mẹ ẹhu-anmanma e-gude ẹphe.
Yọ bụru agburu-ẹhu,
nọ ngu l'ẹka-ụtara;
bẹ ii-gude mee t'ẹphe
dabutsuaru l'ọ bụ mkpuma;
gbururu jeye teke ndu kẹ
nggụbe Ojejoje a-wụ-sweta;
mbụ ndu ono, ị gbafụtaru l'ohu,
ẹphe shi bụru ono.
17 Ii-dubata ẹphe;
bya eye ẹphe l'ugvu nke ngu;
mbụ ẹke nggụbe
Ojejoje fọtaru t'ọ bụru ufu ngu;
mbụ ụlo, dụ nsọ ọphu
i gude ẹka ngu kpụa.
18 Ọ bụ nggụbe Ojejoje a-bụru eze
gburu jeye lẹ gbururu.”
19 Teke ịnya Fero; mẹ ụgbo-ịnya iya; mẹ ndu agbaru iya ịnya bahụru l'eze ẹnyimu ono bẹ Ojejoje vutaru mini ono byabẹ ẹphe. Obenu lẹ ndu Ízurẹlu jeru ije l'alị ọkponku sweta eze ẹnyimu ono.
20 Ya ndono; Miriyamu, bụ nwanyi, ekfuchiru Nchileke, bụ nwunne Érọnu abya ewota nkwa; ụnwanyi l'ẹphe ha awụ-tsoru iya; l'akụ nkwa; l'ete iya etete.
21 Miriyamu l'agụru ẹphe egvu ono; l'asụje:
“Unu gụa egvu nụ Ojejoje;
kẹ l'o koshiwaru l'ọ ha nshinu.
Ịnya yẹle ndu agba iya nụ
b'o nwuru ye l'echi eze ẹnyimu.”
Mini Mára; mẹ Élimu.
22 Tọ dụ iya bụ; Mósisu eshi lẹ Eze Ẹnyimu Uswe dua ndu Ízurẹlu; bahụ l'echi-ẹgu Shu. Ẹphe ejee ije abalị ẹto l'echi-ẹgu; ẹphe ta phụ mini.
23 Ẹphe erua Mára; ẹphe ta dụ ike ngụa mini iya; kẹle mini ono atsọ ile. Ọ bụ iya kparu iphe, a gụru ẹke ono Mára.
24 Ẹphe agụlaaharu Mósisu aphụ; sụ iya: “?Bụ ngụnu bẹ ẹphe a-ngụ?”
25 Ya ndono; Mósisu araku Ojejoje. Ojejoje abya ekoshi iya mkpirikpi oshi. Yo wota iya chee lẹ mini ono. Mini ono atsọlahaa ụtso-mini.
Ọ kwa l'ẹke ono bẹ Ojejoje tụru ekemu nụ ẹphe; bya atọoru ẹphe ọkpa iya. Yọ bụkwaruphu l'ẹke ono b'ọ nọdu data ẹphe.
26 Ojejoje asụ ẹphe: “Ọ -bụru l'unu ngabẹru nchị l'okfu yẹbe Ojejoje, bụ Nchileke unu; l'eme iphe, vudo nhamụnha l'ẹnya iya; ọ -bụru l'unu anga nchị l'iphe, ya sụru t'unu meje; l'etso iphe, ya tọru ọkpa sụ t'unu tsoje; b'ẹ tọ dụkwa ẹjo iphe-ememe ono, ya gude byakfuta ndu Íjiputu ono, ya egude abyakfuta unu; kẹ l'ọ bụ yẹbedua bụ Ojejoje: onye emeje unu t'unu ka mma l'iphe eme unu.”
27 E metsua; ẹphe abya ejerua Élimu; ẹke ọgba-mini iri l'ẹbo nọ; ụkporo nkfụ ẹto lẹ nkfụ iri anọdu iya. Ẹphe abya akpọbe ụlo-ẹ́kwà ẹphe lẹ mgboro mini ono.