4
Ụnwanyi Samériya
1 Unu ngabekwa nchị;
nụa okfu-a;
unubẹ eswi alị Báshanu
ono, nọtsua lẹ Ugvu Samériya ono;
mbụ unubẹ ụnwanyi ono,
akpa ndu ụkpa ẹhu;
l'egwe ndu ẹ ta dụdu ẹge
ọ haru ẹphe rakaraka ono.
Unu -gbeshi; unu asụ nji unu:
“T'ẹphe nụ unu mẹe t'unu ngụa!”
2 Nnajiufu, bụ Nchileke
gudeekwa ọdu nsọ iya;
ria angụ; sụ:
“L'oge abya-a teke ee-gude
ịkokoro setakota unu l'unu ha;
bya egude ịkokoro,
e gude anma ẹma nmatagee
ndu ọphu phọduru nụ.
3 Aa-chị unu nanụ-nanụ
pyoshigbaa l'ẹke ụlo unu
gbaru ọru chịfu.
Ẹke, aa-nọdu achị unu
ala bụ l'ụzo iya kẹ Hamọnu.”
Ono iphe Ojejoje ekfu ndono.
4 “Unu je lẹ Bẹ́telu je anọdu
l'ẹke ono mee iphe dụ ẹji!
Unu eje lẹ Gíligalu je
akabaa ya rụ ememe!
Unu gwoje ngwẹja unu
l'ụtsu mbọku-mbọku!
Unu kfụje ụzo lanụ l'ụzo
iri unu iphe bụ ujiku ẹto, sweru esweswe!
5 Unu woru buredi,
e yeru iphe eekoje buredi
kpọo ọku t'ọ bụru
ngwẹja-ekele!
Iphe unu chịru obu unu nụ Nchileke;
bẹ unu a-rajẹ arara;
kfua ya t'a nụ-dzuru iya; unubẹ ndu Ízurẹlu;
kẹ l'ọ bụ ono adụje unu mma.”
Ono iphe Ọkaribe-Kakọta-Nụ ekfu ndono.
6 “Ya kpọru unu ẹgu l'edukfu l'edukfu;
bya emee t'ẹ b'ọ dụ
mkpụkpu unu, m'ọo nanụ, nri a-nọ;
unu ta laphutakwa azụ lakfuta iya.”
Ono iphe Ojejoje ekfu ndono.
7 “Ya mekwaruphu tẹ mini
ba achịru unu
teke ọ phọdukwaduru
ọnwa ẹto tẹmanu iphe
e meberu emebe akaa.
Ya -chịaru mkpụkpu
ọwaa mini; ya ahaa ọphu.
Mini -chịa l'okfu ọwaa;
tọ chị l'okfu ọphu;
iphe e meberu akpọshihu nkụ.
8 Ndu, shi lẹ mkpụkpu labụ;
m'ọ bụ ẹto awụjere
jeshia mkpụkpu ọdo;
ọcho mini-angụngu;
ẹphe ta aphụ mini,
e-dzu ẹphe angụngu;
ọphu ẹphe 'alaphutakwanu azụ lakfuta iya.”
Ono iphe Ojejoje ekfu ndono.
9 “Ugbo olemole;
bẹ ya mewaru t'iphe unu meberu l'alị;
mẹ mgbo vayịnu unu chashịhu manụ;
bya emee t'ọ tsụshia evu.
Igube byawaru bya
atapyashịa oshi olivu unu yẹle oshi figu unu;
ọphu unu 'alaphutakwanu azụ lakfuta iya.”
Ono iphe Ojejoje ekfu ndono.
10 “Ya tụru unu mgbọnwu
ẹge ono, ya tụru iya ndu Íjiputu ono.
Ya gbushiru
ụnwu-okorọbya unu l'ọgu;
bya akpụa ịnya unu lẹ ndzụ;
bya egude nshishi iphe shi l'ọdu ọgu unu
tsụ-chishia unu imi;
ọphu unu 'alaphutakwanu azụ lakfuta iya.”
Ono iphe Ojejoje ekfu ndono.
11 “Ya haru unu mebyishia
ẹge ono, ya mebyishiru
Sódomu lẹ Gọmóra ono.
Mbụ l'unu dụlephu l'ọbu otsebere-nkụ,
a lọfutaru l'ẹke ọku eke iya;
ọphu unu 'alaphutakwanu azụ lakfuta iya.”
Ono iphe Ojejoje ekfu ndono.
12 “Ọo ya bụ; ọwaa iphe ya
e-me unubẹ ndu Ízurẹlu.
Keshinu ọ bụ ẹge ọ dụ ndono;
unu kwakọbekwa
akwakọbe ojekfu Nchileke unu;
unubẹ ndu Ízurẹlu!”
13 Onye ono, bụ iya kpụshiru ugvu;
bya emee phẹrephere;
mbụ onye ono, ewojeru
iphe ọori kpuhaa; koshi madzụ ono;
wota ụtsu mee t'ọ ghọo ọchi;
l'adzọ-phe l'iphe, bụ ugvu lẹ mgboko;
ẹpha iya bụ Ojejoje;
mbụ Nchileke,
bụ Ọkaribe-Kakọta-Ike.