3
Ema Juan Tícachasiricarahi tépanavapa ticametarairu eta máechajiriruva ema Viya nayehe ena vámahicuruhana
(Mt 3.1-12; Mr 1.1-8; Jn 1.19-28)
1 Tacahe, eta máepeniraipahi ema aquenucaini Augusto, tisiapapa ema Tiberio máitsivaquenehi. Émapa Emperadorhi. Quince áñoripahi eta macatuparahairahi. Ema Poncio Pilato, émaripa prefectohi tayehe eta departamento Judea. Tásiha, ema Herodes Antipas, machicha ema Aluresini, prefectohivare tayehe eta departamento Galilea. Ema maparape Felipe, prefectohivare éma, tayehe eta departamento Iturea étapa eta Traconite. Ema Lisanías, prefectohivare tayehe eta departamento Abilina.
2 Te Jerusalén, ema Caifás, corregidorhi. Énerichuvare tipicauchacarehi ema Anás, pasado corregidor, máimachuca ema Caifás.
Tacahe, te jena sácheanahi, ema Juan machicha ema víyarahaini Zacarías, ajairaripa. Manasirichahahisera tayehe eta mávapahi majurusinehi. Tásiha, ticametacasipa ema Juan eta mayehe ema Viya eta macametarairuirayarepa eta máechajiriruvana.
3 Tacahe, tiyanapa tipaicahi ema Juan tayehe eta avasarechichana tiávihanahi te tachausi eta cajacure Jordán. Mametacavapaipa ena achaneana. Ánipa maicha:
—Ítsivacha eta epanereruana. Éneuchava mayehe ema Viya apaesa maperdonachahe eta epecaturana. Te éneuchavapuca, núti nícachasicahénapa —máichapa.
4-6 Ema maca Juan, émaripa ema máechajisihaquenehi ema Viya eta te Sagrada Escritura, taicha ánaquiaparipahi eta áñoana acane, ema Viya mametacapa ema víyarahaini profeta Isaías eta mapanereruhi, eta mavanesirayare ema Machicha te juca apaquehe. Eta tímitecahi ticatiurahiyarehi. Énerichuvare matiarihiyareva ema apana achane máichuhaqueneyarehi ema Viya. Macametarairuyarehi, máetupiricavacayare ena achaneana, náinajisirayarehi eta napanereruana tamauriqueneana, apaesa táuri eta najacapirayare ema Machicha ema Viya. Tacamunuhivare yátupina eta nacasiñairavayarehi mayehe, náinajicayarehivare eta nacasiñavavaisirahi, étapa eta navayuaraivahi. Nasapihahi tijapanurahianainapa éna. Tásiha, te máitecapapa ema ticatiurahiyarehi, éma máimimatichainapa namutu eta najacapacarevaya me Viya namutu ena ticasiñavana mayehe.
7 Tacahe, ena achaneana tiyananapaipa napauchapaipa ema Juan, navarahapa ticaicachasianayare eta mayehe. Tásiha, éma máichavacapa:
—¿Tájaha tacayema eta epauchiranuhi, eti tachichanaveanatataji eta quichare? Esamairiricahipuca eta járajapairayarepa eta táiñehiqueneyare ecuñaraqui. Evarahahipuca iúchucuhayare.
8 Tiuri puiti, te evarahapuca eta iúchucuha, yátupina tátupiruva eta epanereruana. Ímerecava eta ínajisiraya eta epecaturana. Váhivare ecucajamurava eta mámariéquenérahehi ema viáchucaini Abraham. Taicha tayanapane mámarihepuca éma, váhisera iúchucuhaimahi te vahi ecuitsivacha eta epanereruana. Ema Viya, tájina máemaitucaimahi éma. Te mavarahapuca, vahi máejecarachaimahi máepiyaca achaneanaina eta juca mari, mavarairainahi yátupina ena mámariequeneanaina ema Abraham.
9 Ecauneuchava, taicha tiánehipa títecapauchaheyare eta ecuñaraqui nayehe ena achaneana máitucarahanahi téneuchavana, váhivare náitsivachahini eta napanereruana. Tímicutijiricavaipa te máechucayarepa ema achane eta yucuqui máhireana; tásiha, máijuchainapa tamutu. Ene nacaheyare ena máeneuchavarahana —máichavacapa ema Juan.
10 Tásiha, ena achaneana nayaserecapa:
—¿Tájahasica eta vícharacavayare eta viúrivaina?
11 Ema Juan majicapapa:
—Ecajirahiyare. Mácani tatiarihi apina eta macamisa, máijaracasichayarehi eta étana mácani tájina macamisaina. Énaripa nácani ticaniruanahi, nacajiyareva nácani tájina naviyahini eta nanicaquene —máichavacapa.
12 Te jena sácheana, náitecapauchavare ema Juan ena ticobrarecarahiana eta impuesto. Navarahapa ticaicachasianayarehi. Nayaserecapa ema Juan, náichapa:
—Maestro, ¿tájahapuca vícharacavaini eta viúrivainaini víti apanavare? —náichapa.
13 Majicapapa ema Juan:
—Vaipa ecuapechava ecuvayuyujica eta ecobraresira, tátupiruva jácani tavanairipihi eta ley —máichapa.
14 Énerichuvare náitecapaucha ena suntaruana. Nayaserecavare ema Juan, náichapa:
—Víti apanavare, ¿tájahapucaini vícharacavayare eta viúrivaya? —nacahepa.
Máichavacapa éma:
—Vaipa ecuverejica eta náimahaqueneana ena achaneana. Váipavare ecuipicarareca. Nacuijapa ecuepiyequeneha. Tarataripa tacurisamurechahe eta evachasana —máichavacapa.
15 Ena achaneana ticunevanaripaicha eta mayehe ema Juan, náimijachaipahi émaripa ema Cristo nacuchapaquenehi, cátiurahiyarehi. Váhisera námutuimahi.
16 Tásihasera ema Juan máichavacapa:
—Yátupi núti nícachasicahehi te une. Ávanepaipahisera mácani yátupiquene Cristo. Éma, tiápajupanavahi nuyehe núti, eta mapicauchacarevahi. Váiparinehi nácutinasimahi eta máitupajijiasiravahi. Váiparinehivare nácaemuñavaimahi macamusuranuhini nuti páuresami. Te yátupina ecasiñava mayehe, tícachasicaheyareva; tíjaracaheyareva ema Espíritu Santo. Téhesera vahi ecucasiñavapuca mayehe, tícuñacaheyare tayehe eta táijurequene yucu.
17 Puiti éma márajapainapa tinerejiricainapaipa nácani yátupiqueneanahi téhicanayare. Máunacainapa éna. Ticutinapa mácani achane te tiácatayajiricahi eta arusu. Máunacainapa. Tásiha, máquijicapa eta tapiraquiji, máijuchayarepa te yucu. Eta nacaheyare ena máurirahanahi, tíjuanáinapa te yucu, máitavacacayarehi eta tamuruira —máichavacapa ema Juan.
18 Tacahehi eta juca máechajisiravacahi ema Juan. Ichape eta maconsejachiravacahi ena achaneana, máimitusiravacahi eta máechajiriruva ema Viya.
19 Émaripa ema Herodes Antipas ema aquenucahi, maconsejachahivare vahi macuimiyanava macuveha esu Herodías, mayenahi ema maparape Felipe. Váhivare macuimiyanava macuquicha eta apamuriana táiñemahiqueneana máichaqueneana.
20 Émasera ema Herodes vahi masuapahini. Masapiharichucha tisemahi, máimicaratacapa ema Juan, macasiapayarehi te cárcel.
Eta macaicachasirahi ema Jesús
(Mt 3.13-17; Mr 1.9-11)
21 Tiuri, te tamirahupaichaha eta macaeratairaya ema Juan, tímiyanavaichahahi máicachasicavacahi ena achaneana. Étana sache, máitecapauchapa ema Jesús, mavarairahi ticaicachasi éma apanavare. Tacahe, te tamutupa eta macaicachasirahi, mayujarasirahi. Tíjahúchavapa téjiaca eta anuma.
22 Tiúcupaicapa ema Espíritu Santo, mavasimahipaipa eta paluma eta máimahi. Matupiruruchapa te mápusi ema Jesús. Tásiha, nasamapa eta mahu ema Viya te anuquehe. Ánipa macahehi:
—Pítira nuchicha némunaruquene. Núrisamurecha piyehe —macahepa.
Ena achaneana máchucaequeanaini ema Jesús eta acane
(Mt 1.1-17)
23 Tiuri, ema Jesús, macayeheripahi treinta año te tinacuchavapa tímiturecahi nayehe ena achaneana. Éma, náimijachaquenehi machicha ema José.
Ema máiyainihi ema José, ema Elí.
24 Ema máiyainihivare ema Elí, ema Matat.
Ema máiyainihivare ema Matat, ema Leví.
Ema máiyainihivare ema Leví, ema Melqui.
Ema máiyainihivare ema Melqui, ema Jana.
Ema máiyainihivare ema Jana, ema José.
25 Ema máiyainihivare ema José, ema Matatías.
Ema máiyainihivare ema Matatías, ema Amós.
Ema máiyainihivare ema Amós, ema Nahum.
Ema máiyainihivare ema Nahum, ema Esli.
Ema máiyainihivare ema Esli, ema Nagai.
26 Ema máiyainihivare ema Nagai, ema Maat.
Ema máiyainihivare ema Maat, ema Matatías.
Ema máiyainihivare ema Matatías, ema Semei.
Ema máiyainihivare ema Semei, ema José.
Ema máiyainihivare ema José, ema Judá.
27 Ema máiyainihivare ema Judá, ema Joana.
Ema máiyainihivare ema Joana, ema Resa.
Ema máiyainihivare ema Resa, ema Zorobabel.
Ema máiyainihivare ema Zorobabel, ema Salatiel.
Ema máiyainihivare ema Salatiel, ema Neri.
28 Ema máiyainihivare ema Neri, ema Melqui.
Ema máiyainihivare ema Melqui, ema Adi.
Ema máiyainihivare ema Adi, ema Cosam.
Ema máiyainihivare ema Cosam, ema Elmodam.
Ema máiyainihivare ema Elmodam, ema Er.
29 Ema máiyainihivare ema Er, ema Josué.
Ema máiyainihivare ema Josué, ema Eliezer.
Ema máiyainihivare ema Eliezer, ema Jorim.
Ema máiyainihivare ema Jorim, ema Matat.
30 Ema máiyainihivare ema Matat, ema Leví.
Ema máiyainihivare ema Leví, ema Simeón.
Ema máiyainihivare ema Simeón, ema Judá.
Ema máiyainihivare ema Judá, ema José.
Ema máiyainihivare ema José, ema Jonán.
Ema máiyainihivare ema Jonán, ema Eliaquim.
31 Ema máiyainihivare ema Eliaquim, ema Melea.
Ema máiyainihivare ema Melea, ema Mainán.
Ema máiyainihivare ema Mainán, ema Matata.
Ema máiyainihivare ema Matata, ema Natán.
32 Ema máiyainihivare ema Natán, ema David.
Ema máiyainihivare ema David, ema Isaí.
Ema máiyainihivare ema Isaí, ema Obed.
Ema máiyainihivare ema Obed, ema Booz.
Ema máiyainihivare ema Booz, ema Salmón.
Ema máiyainihivare ema Salmón, ema Naasón.
33 Ema máiyainihivare ema Naasón, ema Aminadab.
Ema máiyainihivare ema Aminadab, ema Aram.
Ema máiyainihivare ema Aram, ema Esrom.
Ema máiyainihivare ema Esrom, ema Fares.
Ema máiyainihivare ema Fares, ema Judá.
34 Ema máiyainihivare ema Judá, ema Jacob.
Ema máiyainihivare ema Jacob, ema Isaac.
Ema máiyainihivare ema Isaac, ema Abraham.
Ema máiyainihivare ema Abraham, ema Taré.
Ema máiyainihivare ema Taré, ema Nacor.
35 Ema máiyainihivare ema Nacor, ema Serug.
Ema máiyainihivare ema Serug, ema Ragau.
Ema máiyainihivare ema Ragau, ema Peleg.
Ema máiyainihivare ema Peleg, ema Heber.
Ema máiyainihivare ema Heber, ema Sala.
36 Ema máiyainihivare ema Sala, ema Cainán.
Ema máiyainihivare ema Cainán, ema Arfaxad.
Ema máiyainihivare ema Arfaxad, ema Sem.
Ema máiyainihivare ema Sem, ema Noé.
Ema máiyainihivare ema Noé, ema Lamec.
37 Ema máiyainihivare ema Lamec, ema Matusalén.
Ema máiyainihivare ema Matusalén, ema Enoc.
Ema máiyainihivare ema Enoc, ema Jared.
Ema máiyainihivare ema Jared, ema Mahalaleel.
Ema máiyainihivare ema Mahalaleel, ema Cainán.
38 Ema máiyainihivare ema Cainán, ema Enós.
Ema máiyainihivare ema Enós, ema Set.
Ema máiyainihivare ema Set, ema Adán.
Ema Adán macaepiyaquenepa me Viya.