32
Ya nengubatan ni Assyria ni Judah
1 Yan nengibbuhan Hesekiah ni emin nunman ni kayyaggud ni impahding tu ey ginubat Sennakerib e patul ni Assyria hu Judah. Hinelikub idan sindalu tudda nehammad ni neluhud ni bebley diman et pan-ikapya daddad binna-hil ni luhud hu dellanen dan menggep nunman ni bebley ma-lat sakupen da.
2 Nem ya dedan ni nengamtaan Hesekiah e um-aliddad Sennakerib ni mengubbat ni Jerusalem
3 ey hinummangan tudda opisyal tu niyadda ap-apun sindalu tu e sikkeden da danum ni mampellaw di a-allaw ni bebley.
4 Inemung da dakel ni tutu-un an memengbeng niya memengngiw idan kulukul niyadda hebwak ma-lat eleg meang-ang hu kapampelawwin danum tep kanday “Kele kumay an um-alidda patul ni Assyria et da datngen dakel ni danum?”
5 Nan-ihammad Hesekiah ida pandipensah tun bebley da et pan-iyayyaggud tudda nebahbah ni luhud. Ey nan-edahan tudda luhud et pan-ihammad tudda tuping di Bebley David. Nampekapya pay ni dakel ni peteg ni almas niya happiyaw.
6 Pinutuk tudda ap-apun sindalu et amungen tuddad mulkaduh di heggeppan ni bebley. Et kantun hi-gaday
7 “Pekedhel yu nemnem yu niya tuled kayu! Entan takut yun Sennakerib winu yadda sindalu tu tep e-etteng hu kabaelan etan ni memaddang ni hi-gatsu.
8 Anin ni dakel ni peteg hu sindalun Sennakerib niya na-let ida, et tuuddan ebuh. Nem hedin hi-gatsu, man hi Apu Dios e Dios tayu hu umbaddang ni hi-gatsu et hi-gatu mekiggubbat ma-lat iehneng daitsu!” Ey timmuled ida tep ya humman ni inhel Hesekiah.
9 Yan nunman ni kapan-iddaddan nan Sennakerib hu pehding tun menggep ni Lakis ey intu-dak tu hu hakey ni opisyal tu et heninnuy hu impaad tun e-helen tun Hesekiah niyadda tuu tu:
10 “Hi-gak e hi Sennakerib e patul ey kangkuy: Kaw hipa ni-man yuka pandinneli et yu nemnemen e meihwang kayun penggepan kun Jerusalem e bebley yu?
11 Kan Hesekiah ni hi-gayun tuu tuy ‘Baddangan daitsun Apu Dios e Dios tayun pengubbatan daitsun patul ni Assyria.’ Nem dakeyu mannuman kahahha-ula. Ya kakulugan tu ey mettey kayun upa yu niya ewew yu hedin ngenghayen dakemi.
12 Kaw beken ni hi Hesekiah hu nangkal idan penaydayawan nan Apu Dios, anin ni yadda altar tu? Ey in-olden tun hi-gayun iJudah niyadda iJerusalem e mahapul ni mandaydayaw kayu niya man-appit kayu etan di hakey ni altar di Tempol. Ey in-olden tu mewan e yadman ni ebuh pan-appitan yu.
13 Inamta mi e inamta yu hu impahpahding middan aammed kun patul di Assyria idan tutu-ud kebebbebley eyad puyek. Kaw wada hu hakey ni dios idan nunman ni bebley ni nengihwang idan tutu-ud impahding mi?
14 Binahbah mi kebebbebley ey eleg ihwang ni hipan dios ida tutu-udman di impahding min hi-gada. Et humman hu, nakka penghelin eleg dakeyu dama han-ihwang ni dios yud pehding min hi-gayu tep et-eteng ni kabaelan mi.
15 Entan tu iebulut ni dakeyu he-ulen nan Hesekiah. E-helek mewan e endi hu dios idan kebebbebley ni tu kinabaelan ni inhewang ida tuud hipan impahding ku niyad impahding idan aammed ku. Et nema-ma ngu etan dios yu e endi kabaelan tun mengihwang ni hi-gayun pehding ku.”
16 Beken humman ni ebuh hu kapeneghegnud Sennakerib di Apu Dios nan Hesekiah, e bega-en tu, nem dakel pay hu inhel idan opisyal tun lawah.
17 Entanni ey nantudek mewan hi Sennakerib ni peneghegnud tun Ap-Apu e Dios idan helag Israel. Kantud tudek tuy “Ya dios nan Hesekiah ey heniddan dios ni edum ni bebley e endi kabaelan tun mengihwang idan tutu-u tud pehding ku.”
18 Yadda opisyal ni iAssyria ni nengilaw etan ni tudek ey intekuk dad ehel ni Hebrew etan idad tuun neamung di luhud hu daka penattakkut ni hi-gada, ma-lat awatan da et tumekut ida et nelakah dan hehgepen humman ni bebley da.
19 Ya kapan-e-ehhel idan nunman ni opisyal meippanggep ni Dios di Jerusalem ey heni kinapyan tuu e heniddan dios idan edum ni tuu.
20 Nandasal di Hesekiah, e patul et hi Isaiah e prophet e u-ungngan Amos, nan Apu Dios et mampebaddang idan hi-gatu.
21 Dingngel Apu Dios hu dasal da et bagaen tudda anghel ni memettey idan sindalun Assyria, anin idan opisyal da niyadda ap-apun sindalu da. Et mambangngad hi Sennakerib di bebley dan nekabbaingan. Entanni ey pintey idan edum ni u-ungnga tu eman ni linawwan tud Tempol ni dios tu.
22 Hanniman hu impahding Apu Dios ni nengihwang nan Hesekiah niyadda iJerusalem nan Sennakerib e patul di Assyria niyadda edum ni buhul da.
23 Meippalpun nunman ey kapakallispituhaddan tutu-u hi Hesekiah, anin idan nambebley di nanlinikweh. Dakel hu tutu-un nengi-lid Jerusalem ni indawat dan Apu Dios niya dakel dama indawat dan Hesekiah.
24 Entanni ey nandegeh hi Hesekiah et heni mettey et mandasal nan Apu Dios ma-lat ekalen tu humman ni degeh tu. Ey indawtan nan Apu Dios ni kamengippetngan pengi-ang-angan tu e um-amnun me-kal degeh tu.
25 Nem hi Hesekiah ey nampahhiya kumedek e eleg tu peang-ang hu amleng tun nunman ni binabbal Apu Dios ni hi-gatu. Et bumunget hi Apu Dios ni hi-gatu niyadda tutu-ud Judah niyad Jerusalem et manhelheltap ida.
26 Nantuttuyyu hi Hesekiah ni nunman ni nampahhiyyaan tu niya nampekumbabah ida dama tutu-u et isiked Apu Dios ni mengastigun hi-gadan nunman ni ketaggun Hesekiah.
27 Hi Hesekiah ey kedangyan ni peteg niya kapakallispituhan tutu-u. Nampekapyaddan nangkehammad ni baley ni pengihha-adan tuddan balituk tu, ya silber tu, ya nangkenginan batu, yadda kaikkamdug di kennen, yadda happiyaw tu niyadda edum ni nebalol ni tenged tu,
28 anin idan pengihha-adan tun wheat, ya meinnum niya mansikan olibah. Ey nampekapyan dakel ni kubkubban idan baka, yadda kalneroh niya gelding.
29 Dakel ni bebley kinapya tu niya dakel ni peteg animal tu henin baka, kalneroh niya gelding, tep indawtan Apu Dios ni dakel ni limmu tu et kumedangyan ni peteg.
30 Ey hi-gatu nemengbeng ni Hebwak e Gihon di ahpat tu et padelan tu danum di kinapya tun alak di dallem ni puyek et palaw tud Bebley David di appit ni kakelinnugin aggew. Kayyaggud hu nambalinan emin ni impahding tu.
31 Nem yan inlian idan opisyal ni iBabilon et mahmahan da meippanggep idan kayyaggud ni neipahpahding di bebley ey in-abulut Apu Dios ni ngenamung hi Hesekiah ni ihhumang tu et ang-angen tu hedin hipa dedan wadad nemnem tu niyad puhu tu.
32 Yadda impahding Hesekiah eman ni nampatulan tu, niyadda impahding tun nengu-unnudan tun Apu Dios ey netudek di Libluh Isaiah e u-ungngan Amos e nei-dum di Libluh idan Patul di Judah niyad Israel.
33 Netey hi Hesekiah et maikulung di nengin-ahpat ni kullungngan idan patul. Ey emin ida tutu-ud Judah niyad Jerusalem ey daka lispituha, anin eman ni neteyyan tu. Neihullul hi Manasseh e u-ungnga tun nampatul.
Ya nampatulan Manasseh di Judah