15
Ya pengihha-adan David ni Kaban Apu Dios
1 Negibbuh law ni impebehwat nan David hu baballey ni pambelleyan tu etan di bebley ni neingedanan ni ngadan tu et kapyaen tu pengihha-adan ni Kaban Apu Dios et paetep tun tuldah.
2 Et kantuy “Hedin tayulli ellan etan Kaban ey ebuh ida helag Levi ni mengnged tep hi-gadan ebuh pinutuk Apu Dios ni mansilbin hi-gatun ingganah.”
3 Impaeyag David idan emin hu edum tun helag Israel ma-lat maemung idad Jerusalem et dalli alen hu Kaban Apu Dios et iha-ad dad indaddan tun pengihha-adan da.
4 Huyyadda helag Aaron ni padi niyadda helag Levi ni impaeyag tu:
5 Yad helag Kohat ey immali hu hanggatut et dewampulu e hi Uriel hu kamengipappangngulu.
6 Yad helag Merari ey immali hu dewanggatut et dewampulu e hi Asaiah hu kamengipappangngulu.
7 Yad helag Gerson ey immali hu hanggatut et telumpulu e hi Joel hu kamengipappangngulu.
8 Yad helag Elisaphan ey immali hu dewanggatut e hi Semaiah hu kamengipappangngulu.
9 Yad helag Hebron ey immali hu newalu e hi Eliel hu kamengipappangngulu.
10 Yad helag Ussiel ey immali hu hanggatut et hampulut dewwa e hi Amminadab hu kamengipappangngulu.
11 Inaygan idan David etan padi e di Sadok nan Abiathar niyadda etan enem ni kamengipappangngulun helag Levi e hi Uriel, hi Asaiah, hi Joel, hi Semaiah, hi Eliel et hi Amminadab
12 et kantun hi-gaday “Hi-gayu kamengipappangnguluddan edum yun helag Levi, et humman hu, mahapul ni pehding yun emin hu elaw ni panlinnih ni annel yu et yulli alen hu Kaban Ap-Apu e Dios tayu helag Israel et iha-ad yud indaddan kun keihha-adan tu.
13 Bimmunget hi Ap-Apu e Dios tayu et kastiguen daitsu eman ni laputun tayu-et pengellaan tep beken kayun helag Levi ni nangnged nunman ni Kaban tu. Humman ni impahding tayu ey eleg tayu peamleng hi Apu Dios.”
14 Et ipahding idan padi niyadda helag Levi hu elaw ni panlinnih dan annel da et han ida lumaw ni an mengellan Kaban Ap-Apu e Dios ni helag Israel ma-lat ilaw dad Jerusalem.
15 In-attang idan helag Levi hu Kaban Apu Dios tep humman dedan intugun tun Moses ni pehding da.
16 In-olden David idan kamengipappangngulun helag Levi e umpiliddan edum dan man-a-appeh niya mengippatnul idan cymbal, yadda ayyuding, niyadda gitalah ma-lat man-a-appeh idan kamengippeamleng ni pandeyyawan da.
17 Et huyyadda nepili: hi Heman e u-ungngan Joel, hi agitu hi Asap e u-ungngan Berekiah et hi Ethan e u-ungngan Kushaiah e nahlag nan Merari.
18 Yadda edum ni nepili: hi Sekariah, hi Jaasiel, hi Semiramot, hi Jehiel, hi Unni, hi Eliab, hi Benaiah, hi Maaseiah, hi Mattithiah, hi Eliphelehu, hi Mikneiah, et yadda kamangguwalyad eheb e di Obed Edom nan Jeiel.
19 Hi Heman, hi Asap et hi Ethan hu nepilin mengippatnul ni giniling ni cymbal.
20 Hi Sekariah, hi Asiel, hi Semiramot, hi Jehiel, hi Unni, hi Eliab, hi Maaseiah et hi Benaiah hu mengippatnul ni ayyuding.
21 Ey hi Mattithiah, hi Eliphelehu, hi Mikneiah, hi Obed Edom, hi Jeiel, et hi Asasiah hu nepilin mengippatnul ni gitalah.
22 Hi Kenaniah hu ap-apuddan emin ni helag Levi ni kan ngunun man-a-appeh niya mengippatnul idan kameussal di kapandeyyawi tep nelaing ni meippanggep ni a-appeh.
23-24 Di Berekiah nan Elkanah et di Obed Edom nan Jehiah hu nepilin mangguwalyan Kaban Apu Dios. Ey hi Sebaniah, hi Joshaphat, hi Nethanel, hi Amasai, hi Sekariah, hi Benaiah, et hi Elieser hu papaddin mampetnul ni tangguyup di hinanggan Kaban Apu Dios.
25 Limmaw di David niyadda kamengipappangngulun helag Israel niyadda aap-apun hanlibun sindalu tud baley Obed Edom ni an mengellan Kaban Apu Dios, e neiha-adan ni nekitbalan tu. Ey nemahhig hu nan-am-amlengan da.
26 In-appit dan Apu Dios hu pitun bulug ni baka et ya pitun kalneroh tep kameang-ang e binaddangan idan Apu Dios hu helag Levi ni nengiattang ni Kaban tu.
27 Kayyaggud ni peteg imbalwasin David niya imbalwasi tu pay hu ephod. Ey kayyaggud dama imbalwasiddan kaman-a-appeh, yadda kamengippatnul ni ayyuding niya gitalah, hi Kenaniah e ap-apu da niyadda nengiattang ni Kaban Apu Dios.
28 Emin ida helag Israel ey nekilaw idan an nengalan Kaban Apu Dios e neiha-adan ni nekitbalan tu. Indateng dad Jerusalem ey ida kamantetekkuk ni amleng da niya daka pan-ipatnul ida tangguyup, yadda cymbal, yadda ayyuding niyadda gitalah.
29 Yan nunman ni daka pan-iddateng di bebley etan Kaban Apu Dios ey dimmu-ngaw di habhabyen hi Mikal e u-ungngan Saul ey inang-ang tu hi David e patul ni kamenattayyaw niya kamanpaypaytuk ni amleng tu, ey nemahhig nemihul tud nemnem tu.