4
Ya nemangulun humang Eliphas nan Job
1 Immehel hi Eliphas ey kantuy
2 “Job, entan tu balaw hedin um-ehellak. Eleg mabalin ni nak pemegga i-ineng.
3 Yan nunman ey hi-gam simmugutugun idan neligatan, ma-lat hi Apu Dios pandinnelan da niya binaddangam ida hu kamanheppul ni baddang.
4 Indawtam ni kayyaggud ni tugun ida etan endi namnamah da et petuled mudda.
5 Nem yan nunyan hi-gam hu wada ligat tu ey kaka metemman pehding mu.
6 Dinaydayaw mu hi Apu Dios niya endi nambahulam. Et humman hu, gullat et, ey e-etteng dinel mu niya namnamah mu.
7 Nemnem mu kedi, kaw wada hakey ni kayyaggud ni tuun nekalligatan?
8 Hedin ya ngu inamtak, man hedin lawah kapehpehding ni hakey ni tuu, ey lawah dama hu kameippahding ni hi-gatu.
9 Ey kabahbahan Apu Dios ni bunget tu hu hanniman ni tuu.
10-11 Ya hanniman ni tuu ey heni mabunget ni layon ni kaman-elmem ni an menemmak ni animal ni petteyen tu ma-lat kanen tu. Nem hedin naplag hu ngipen tu ey eleg tu han-ipahding huyya et mettey ida impah tun upeda.
12 Wada neipeamtan hi-gak ni endi hu edum ni nengamta, tep intuttubbu etan ni nanghel ni hi-gak.
13 Heni lemam humman e impabsik tu ugip ku.
14 Ey gimmeneygeyyak ni takut ku.
15 Entanni ey nelabah dibdib di angah ku ey nebugittak.
16 Nesiked etan dibdib ey wada inang-ang kun kaman-eh-ehneng, nem eleg meimmatuni. Entanni ey dingngel ku intuttubbu tun hi-gak e kantuy
17 ‘Kaw wada hakey ni tuun endi liwat tu e kakkayyaggud di hinanggan Apu Dios?’
18 Tam anin idan anghel di kabunyan et eleg medinnel ni hi-gada.
19 Et humman hu, kaw kammu nem kamakaddinnel hi Apu Dios di tuun nekapyad puyek e nelakah ni pepditen e henin pappayya?
20 Ya tuu ey anin ni mategun kakkabbuhhan et endi maptek ey netey ni mahmahdem.
21 Et humman hu, mettey hu tuu et hi-yanen tu emin limmu tu, et al-en ni edum ni tuu ey eleg tu awatan hu elaw ni neitu-wan tu.