26
Ya inhumang Job nan Bildad
1 Immehel mewan hi Job ey kantuy
2 “Em, kakkayyaggud ka tep et-eteng hu imbaddang mun hi-gak e nekakkapuy katteg ngun tuu!
3 Kayyaggud et kaka umtugun niya muka ituttuddu inedal mud tuun endi nemnem tu e henin hi-gak.
4 Hipa ni-ngangu nangngelan muddan nuntan ni kakkayyaggud ni tugun? Hipa kan linnawan immehel ni hi-gam?
5 Nanna-ud ni ida kamanggegeygey hu linnawan nangketey di bebley ni netey di dallem ni baybay.
6 Humman ni bebley idan netey ey eleg meha-ninan niya eleg meitlun nan Apu Dios,
7 e nengibiklag ni north ni kabunyan niya nengiha-ad ni puyek e endi neituunan tu.
8 Winedan Apu Dios hu danum idad kulput ey eleg meikkuyyag anin ni mebel-at.
9 Ey heni linibutan tun kulput hu bulan et eleg meang-ang.
10 Ey heni yad pappeg ni baybay hu nengiptekan tun pan-appilan ni kawwalwal niya hileng.
11 Hedin bimmunget hi Apu Dios ey heni kamanggiwwed ida tukud ni kabunyan.
12 Impaineng tu baybay tep ya kabaelan tu, ey gapuh mewan ni elet tu ey pindit tu etan anggetakkut ni mategud baybay.
13 Ey gapuh ni et-eteng ni kabaelan tu ey kinapya tun kakkayyaggud hu ang-ang ni kabunyan. Ey pintey tu etan et-eteng ni anggetakkut ni uleg.
14 Yadda huyyan impahding tun tayu kaketngai ey ekket ni ebuh ni kei-ang-angan ni kabaelan tu. Hipa makkaw hu dammutun mengewwat ni et-eteng ni kabaelan tu?”