18
Ya inhel Bildad e iSuah
1 Hinumang Bildad hi Job e kantuy,
2 “Ettu et umi-ineng ka e Job et dengelem hu e-helen min hi-gam ey?
3 Kele kammuy endi amta mi e heni kami baka?
4 Mu kumedek kapanliligat annel mu tep ya bunget mu. Kaw hipa dama ibbaddang ni bunget? Kaw dammutun mehullulan hu puyek niya mangkepikwal hu babattud deplah tep ya bunget mu?
5 Makulug ni anggegannuy neendi lawah ni tuu e heni dilag ni me-dep
6 et ma-nget di kad-an tu.
7 Ma-nu tep meandeng hu tuka pandellan, nem meihhungbub tep hi-gatu ngu hu keippahdingan ni lawah ni planuh tu.
8-10 Eleg tu amta e wada keknaan tun neidaddan di dellanen tu, henin bitu, et nanna-ud ni meknalli.
11 Et humman hu, kaumtatakut law ni ingganah.
12 Kedangyan ni nunman nem yan nunya ey kameuppa niya heni kamanhehhegged hu ligat di habyen tu.
13 Anggetakkut hu degeh tun neiwehit di annel tu ey kamangkebwel hu heli tu niya ngamay tu.
14 Heni nepilit ni neipa-hep di baley tun kakkayyaggud et hanggaen tu hu patul ni katey.
15 Ey megihheb hu baley tu, anin idan hipan wadadman.
16 Henin keyew ni nema-ganan annel tu niya lamut tu et matey.
17 Et endi law mee-ehhel ni hi-gatud bebley tu, anin di edum ni bebley, ey endin ingganah law hu mannemnem ni hi-gatu.
18 Ey me-kal law di bebley idan mategu et lumaw di engeenget,
19 niya endi metdaan ni helag tun mategu.
20 Et emin hu tuu meippalpud appit ni kasimmilin aggew ingganah di tuka kelinnugi ey umgeygey idan takut dan pengngelen dan nunman ni meippahding ni hi-gatu.
21 Henin nunman hu meippahding idan lawah nemnem tun tuun daka iwwalleng hi Apu Dios.”