11
Ya inhel Sophar
1 Himmumang hi Sophar e iNamaah ey kantuy
2 “Hipa menummang idan nunyan legelegem ni inhel mu? Kaw ya kadinakkel ni ehel ni tuu hu pengi-ang-angan e endi bahul tu?
3 Kaw kammu nem eleg mi hanhumang eya muka e-e-hela? Ey kaw kammu nem pemegga mi i-ineng eyan muka penaltalanggain Apu Dios?
4 Kammuy makulug eya muka e-e-hela niya kakkayyaggud kad hinangngab Apu Dios.
5 Hamban um-ehel hi Apu Dios ma-lat ehelen tun hi-gam hu wadad nemnem tu ey
6 niya ma-lat peamta tun hi-gam hu ustuh ni laing. Dakel mannuman hu eleg tayu amta niya eleg tayu han-awat. Ya kakulugan tu ey kinulngan Apu Dios hu kastiguh mu nem ya etan lebbeng tu et dedan ni pengastigu tun hi-gam.
7 Kaw dammutu kuman amtaem hu eleg peamtan Apu Dios e Kabaelan tun emin? Ey kaw dammutu kuman amtaem emin hu meippanggep ni hi-gatu?
8 Eleg, tep endi hakey ni tuun wada kabaelan tun man-ewwat nan Apu Dios. Hedin hi-gatu man eleg melkud hu amta tu e henin kadinawwin puyek di kabunyan niya henin kadinallem ni puyek e endi lekud tu. Kaw hipa ka kuma et meiingngeh hu inamtam di inamta tu?
9 Ya inamtan Apu Dios ey eleg melkud, kamei-ellig e mahmahkang nem ya puyek, niya melallakkeb nem ya baybay.
10 Gullat ni kantu et pedpap dakan Apu Dios et ilaw dakad korteh, ey hipa wada kabaelan tun mengippesikked nunman ni pehding tu?
11 Tep inamtan Apu Dios hedin hipa tuun endi silbitu niya tuka hellipat-i hu panliwwatan nunman ni tuu.
12 Kaw dammutun man-impah hu kebayyun tuu? Ey kaw dammutun menemneman niya umlaing hu tuun endi nemnem tu?
13 Ku gullat ni kayyaggud hu wadad nemnem mu niyad puhum et mandasal kan Apu Dios.
14 Niya mantuttuyyu kan liwat mu ey issiked mun mengippahding ni lawah,
15 ma-lat yumaggud ka kaya et keang-angan tun endi bahul mu. Lektat tu kaya ey umtuled kan eleg ka umtatakut.
16 Melebbah kaya ligat mu et liwwanem et henin kakelebbahin danum di daul ni langtay.
17 Et ya neitu-wan mun kamei-ellig ni engeenget ey kawwalwal ali nem ya emaggew henin tuka kewa-wain kakkabbuhhan.
18 Ippaptek dakan Apu Dios et tumuled ka tep mewedda namnamah mu ey man-iyyatu ka niya umlinggep ka.
19 Eleg ka law umtatakut ni buhul mu niya dakel hu mampebaddang ni hi-gam.
20 Nem yadda lawah ni tutu-u ey endi namnamah dan meihwang. Ebuh hu katey ni daka hehheggeda.”