10
Ya nengabulutan idan tutu-un liwat da
1 Yan nunman ni nanyuungan nan hi Ezra et mandasal di hinanggan Tempol e kamannanangih ey pan-e-helen tu nanliwatan da, ey immalidda dakel ni edum tun helag Israel ni nangkea-amma ey nangkei-inna, kaungaungan lalakki ey bibi-i, et maemung idad kad-an tu e nemahhig hu nangih da.
2 Entanniy kan Sekaniah e u-ungngan Jehiel e helag Elam nan Ezra ey “Eleg mi u-unnuden hi Apu Dios et makiepu kamiddan tutu-udya. Nem anin ni hanniman neipahding et wada namnamah tayun helag Israel.
3 Tep ya pehding tayu ey mansapatah itsun Apu Dios e ittu-dak midda eya bibi-in inahwa mi ey ikkuyug dadda u-ungnga min hi-gada. U-unnuden mi e-helem niya e-helen idan edum ni kamengu-unnud ni Tugun Apu Dios tayu. Ey pehding min emin wadad Tugun Apu Dios.
4 Ngenamung kan pinhed mun pehding mu. U-unnuden mi hedin hipa kammu.”
5 Et uminah hi Ezra et pansapatah tudda aap-apun papaddi, yadda edum dan helag Levi et yadda edum ni helag Israel e pehding da hu inhel nan Sekaniah, et mansapatah idan emin.
6 Entanni ey hini-yan Ezra hu hinanggan Tempol Apu Dios, et lumaw di kampun Jehohanan e u-ungngan Eliashib. Nandeyadman nem eleg mangan ey eleg uminum tep nanengtun kaumlelemyung, tep ya eleg pengu-unnudan idan edum tun helag Israel ni nambangngad.
7 Entanni et palaw idan aap-apu da tudek daddan tutu-u et peamta dan hi-gada e emin idan nampambangngad di diman bebley dad Judah niyad Jerusalem ey meemmung idad Jerusalem.
8 Wada tellun aggew ni panhehgedan dan hi-gada, et ya etan eleg um-ali ey meella hu hipan wadan hi-gatu ey eleg law meibbillang ni edum da.
9 Et yan nedatngan ni meikkatlun aggew e yan nunman hu meikkadwampulun aggew ni meikkahyam ni bulan ey neamung idan emin hu lalakkin helag Judah et yadda helag Benjamin di Jerusalem, et yumudung idad dallin ni Tempol Apu Dios. Nemahhig takut da tep importanteh ni peteg hu inlian da ey ida kamanggegeygey tep nemahhig hu udan.
10 Immehneng hi Ezra et kantuddan tutu-uy “Nanliwat kayu tep nan-iahwa yu hu bibi-in beken ni edum tayun helag Israel, et humman himmulun ni na-duman hu liwat tayu.
11 Hedin ya law pehding yu ey abulut yu hu liwat yun Ap-Apu e Dios idan a-ammed tayu ey ipahding yu hu kamengippeamleng ni hi-gatu. Entan pekieddueddum yuddan beken ni helag Israel. Ey hi-yan yudda bibi-in inaddum yun beken ni helag Israel.”
12 Intekuk idan neamung hu humang da e kanday “Neiptek inhel mu. Mahapul ni u-unnuden midda huttan ni inhel mu.
13 Nem hantapug eya tutu-un neamung ey nemahhig udan et eleg mabalin ni um-eehneng kamid dallin. Hakey pay ey eleg mabalin ni megibbuh huyyan tayu pehding ni hakey winu dewwan aggew, tep dakel kamin peteg ni nengipahding nunyan liwat.
14 Attu et anin yadda ap-apu mi hu manha-ad deya Jerusalem ma-lat hi-gada mengi-ehneng ni hi-gami, et emin kamin nekiahwad beken ni helag Israel ey megtud hu aggew ni ellian mi, ey mahapul ni meki-lidda aap-apu niya huwet ni bebley mi. Hanneya pehding tayu ma-lat masiked hu bunget Apu Dios ni hi-gami tep ya huyyan liwat ni mi impahding.”
15 Inebulut idan emin ni tutu-u humman ni na-hel. Ebuh di Jonathan e u-ungngan Asahel et hi Jahseiah e u-ungngan Tikbah et yadda dewwan helag Levi e di Meshullam nan Sabbethai ni eleg meminhed ni mengippahding nunya.
16 Et humman impahding idan tutu-un nambangngad. Piniliddan Ezra e padi hu pan-ap-apuddan helag Israel et itudek tu ngadan da. Et yan nunman ni nemangulun aggew ni meikkahampulun bulan ey inlapu dan manmahmah idan kasuh.
17 Nedateng hu nemangulun aggew ni nemangulun bulan ni neitu-nud ni toon, ey negibbuh ni nebistigal emin hu lalakkin nengiahwan beken ni edum dan helag Israel.
Yadda lalakkin nengiahwan bibi-in beken ni edum dan helag Israel
18 Yadda papaddi: Yaddad helag Jeshua e u-ungngan Josadak et yadda aaggi tun lalakki ey hi Maaseiah, hi Elieser, hi Jarib et hi Gedaliah.
19 Emin ida ey insapatah da e hi-yanen da ahwa da et iappit da hanhakkey ni lakkitun kalneroh tep ya liwat da.
20 Yaddad helag Immer ey di Hanani nan Sebadiah.
21 Yaddad helag Harim ey hi Maaseiah, hi Elijah, hi Semaiah, hi Jehiel et hi Ussiah.
22 Yaddad helag Pashur ey hi Elioenai, hi Maaseiah, hi Ismael, hi Nethanel, hi Josabad et hi Elasah.
23 Yaddad helag Levi: Hi Josabad, hi Simei, hi Kelaiah (e Kelita hu hakey ni ngadan tu), hi Pethahiah, hi Judah et hi Elieser.
24 Yaddad kaman-a-appeh ey hi Eliashib. Yaddad kamangguwalyad eheb ey hi Sallum, hi Telem et hi Uri.
25 Yaddad edum dan helag Israel: Yaddad helag Paros ey hi Ramiah, hi Issiah, hi Malkijah, hi Mijamin, hi Eleasar, hi Malkijah et hi Benaiah.
26 Yaddad helag Elam ey hi Mattaniah, hi Sekariah, hi Jehiel, hi Abdi, hi Jeremot et hi Elijah.
27 Yaddad helag Sattu ey hi Elioenai, hi Eliashib, hi Mattaniah, hi Jeremot, hi Sabad, et hi Asisa.
28 Yaddad helag Bebai ey hi Jehohanan, hi Hananiah, hi Sabbai et hi Atlai.
29 Yaddad helag Bani ey hi Meshullam, hi Malluk, hi Adaiah, hi Jashub, hi Seal et hi Jeremot.
30 Yaddad helag Pahat-Moab ey hi Adna, hi Kelal, hi Benaiah, hi Maaseiah, hi Mattaniah, hi Besalel, hi Binnui et hi Manasseh.
31-32 Yaddad helag Harim ey hi Elieser, hi Ishijah, hi Malkijah, hi Semaiah, hi Simeon, hi Benjamin, hi Malluk et hi Semariah.
33 Yaddad helag Hashum ey hi Mattenai, hi Mattattah, hi Sabad, hi Eliphelet, hi Jeremai, hi Manasseh et hi Simei.
34-37 Yaddad helag Bani ey hi Maadai, hi Amram, hi Uel, hi Benaiah, hi Bedeiah, hi Keluhi, hi Baniah, hi Meremot, hi Eliashib, hi Mattaniah, hi Mattenai et hi Jaasu.
38-42 Yaddad helag Binnui ey hi Simei, hi Selemiah, hi Nathan, hi Adaiah, hi Maknadebai, hi Sashai, hi Sarai, hi Asarel, hi Selemiah, hi Semariah, hi Sallum, hi Amariah et hi Joseph.
43 Yaddad helag Nebo ey hi Jeiel, hi Mattithiah, hi Sabad, hi Sebina, hi Jaddai, hi Joel et hi Benaiah.
44 Emin ida huyyan lalakki ey inahwa da bibi-in beken da edum ni helag Israel et maweda u-ungngan edum ni hi-gada. Hini-yan dadda et awiten idan bibi-i hu u-ungnga da.