5
1 Hana ayya khun mehaad hi Natakhay an Pachin chi Hudju, ja hay oha an padchung cha an takhu ta etaꞌchokhana chicha ay Apo Jos. Hija chi khun mangdaton ay Apo Jos hana animar ja hana uchumna an khun idaton ta mapakawan chi pfahor.
2 An-anuhana hana tatakhu an khun pfumahor ja khun mipfahhaw khapo ta agkhuy cha anila hini maphod, ti padchung cha an takhu an gway pungkapujana.
3 Ja khapo ta padchung cha an takhu hini pachi an khun meꞌpfahor ja mahapor an gway idatona hi animar ta mapakawan chi pfahor na, an amat ay ni atona an mundaton ta mapakawan hana pfahor chi tatakhu.
4 Pfu-un hini takhu chi manghaad ay ni achor na an mumpfalin hi Natakhay an Pachi, an hi Apo Jos chi khun manghaad, an amat chin nanghaachana ay Aaron.
5 Amat hina khu ay Kristo an pfu-un hijay nanghaad ay ni achor na an numpfalin hi Natakhay an Pachi, an hi Apo Jos chi nanghaad ay hija, ja una allon hi,
“He-a hini Empfalay u,
ad ugwani chi pangpatikhagwaꞌ an ha-in chi Amam.”
6 Ja inalin khu Apo Jos ay hija hi,
“Mehaad a an pachi hi ma-id pogpogna
an amat ay Melkizedek an pachi.”
7 Hichin agawwachaan Hesus heto lota, ja chin nungkalalakhana ja iniꞌgwap na ja ingkila na hini kalalag na, ti anila na an gway apfalinan Apo Jos an mangergwang ay hija hi patoy. Hotti chengngor Apo Jos chin kalalag na ti numpakumbaba hija ja inunud na an amin chin penhod Ama na.
8 Ti anong un Empfalay Apo Jos ja inannila na chi amatan chi oha an naꞌna-unnud khapo ta cho-or chi i na nunlikhatan.
9 Khapo ta empapadchong na an nangunud an amin hi penhod Ama na, hotti hijay Manakhu an amin hana miꞌ-unud ay hija ta miꞌtakhu cha hi ma-id chi pogpogna.
10 Ja hijay enhaad Apo Jos an Natakhay an Pachi an amat ay Melkizedek.
Mahapor an umilog ta-o hi pammati
11 Cho-or pay koma hana penhod u an ipa-innila ay chaꞌju an omaꞌ-atan hay hato khun u allon, muti nalikhat chi manghalochaꞌchaꞌ an mangali ti niya an pfimmato hini nomnom ju.
12 Hot akamoh an napfajag hitay namatiyan ju hotti chaꞌju koma chi manudtuchugwan hana uchumna. Muti tan achi, ti niya an mahapor ju pay hay manuchugwan ay chaꞌju hana mahmahhun an tudtuchu an pangpognachan ay tay pammati ta-o ay Apo Jos. Un aju amat hi pfuꞌjug an khun mun-inum an ma-id olog na an mun-utay.
13 Hini takhu an khun pay mun-inum ja hija hini ma-id pay anila na an mangmatunan hi maphod.
14 Muti hini mipadchung hi ma-ilog an olog na an mangutay, ja hija hini immilog hi pammati an enachar na an mangmatunan hi maphod ja hay napukhit.