HEBREWS
Hini omaꞌ-atan tay an libju
Hitay an tulaꞌ ja nitolong hana namati an Hudju wenno Hebrew ta pfumi-ah cha hi pammati. Ti cho-or chi likhat cha, ja gwa an inganuy cha hini pammati cha ay Kristo ta munpfangngad cha hana tudtuchun chi Hudju. Hotti hini enat ni nuntulaꞌ an mangpapfi-ah ay chicha ja una impa-innilana hini apfagton Hesu Kristo.
Gwa han tolo an importante an nipa-innila ay tay an tulaꞌ an omaꞌ-atan Hesu Kristo. Hini mahhun ja hija hini Empfalay Apo Jos hi ma-id chi pogpogna. Ja khapo ta hijay Empfalay Apo Jos ja napfagpfagto hija mu hana profeta ja hi Moises ja hay hana angher. Me-aggwa ja hini enat Kristo ja napfarpfalor mu hini khun aton chi pachin chi Hudju. Hotti hi Kristo chi nepallog an khun mangetaꞌchokhan hi tatakhu ay Apo Jos hi ma-id chi pogpogna. Me-atlo ja umannung an miꞌtakhu hini takhu an mamati ay hija, ti hija hini magpong an daton an namogpog hana ugali ja animal an daton chi Hudju ay Apo Jos.
Hini nuntulaꞌ ja ipatikhaw na hini omaꞌ-atan chin pammatin hachi Hudju chin nahop, ta hay hato Hudju an namati ay Hesus ja etortoloy cha an mamati anong un munnaud chi i cha apalikhatan. Ay ni angonoh tay an tulaꞌ ja itukhuna an achi cha umachawwi ay Apo Jos ta un cha gwot unuchon hini maphod an piꞌtakhuwan an mangchat hi i cha pun-an-anlaan.
1
Napfagpfagto hini haad ni Empfalay Apo Jos mu hana angher
1 Chin timpon chin a-ammod ta-o, ja gwacha ayya chi penhod Apo Jos an allon ay chicha ja khuna epaꞌgwa hay hachi profeta na. Ja gwacha hana numpfino-ob-on an inalin Apo Jos ay chicha hi aton cha an mangpa-innila.
2 Muti ad ugwani an angonoh chi arkhaw ja hi Hesu Kristo an Empfalay Apo Jos chi nangpa-innila ay chita-o hana penhod Apo Jos an allon. Hitay an Empfalay na chi nangpa-apjaana an amin chi nagwacha, ja hijay pinilin Apo Jos an mamanoh an amin hato na-apja.
3 An amin hini aphod ja apfagton Apo Jos ja matikhaw ay hija, ti un angkhay hija chi mangpatikhaw ay ni umannung an omaꞌ-atan Apo Jos. Khapo ay ni apfalinan ni hapit tay Empfalay Apo Jos ja epaptoꞌ na an amin hay hato nagwacha. Napfalin an en-atoy nay pfahor chi tatakhu ta mapakawan cha ja timmalakhuy ad langit ja inumpfun ay ni nun-appit hi agwan ni Napfagto an Jos.
4 Hijaot un nichatan hi Kristo hi haad an napfagpfagto mu hini haad hana angher Apo Jos. Hay pangmatunan ja nipa-innila an hija hini Empfalay Apo Jos an ma-id ipadpadchungana, an pfu-un angher.
5 Ti ma-id chi oha hi angher hi nangallan Apo Jos ay tay impatulaꞌ na hi nangarjana hi,
“He-a hini Empfalay u,
ad ugwani chi pangpatikhagwaꞌ an ha-in chi Amam.”
Ja pfu-un khu angher chin nangallan Apo Jos hi,
“Ha-in chi Ama na
ja hijay Empfalay u.”
6 Ja hay hato chi inali-alin Apo Jos ja unaot honakhon hini oh-ohha an Empfalay na an umali heto lota, an allona hi,
“An amin aju an angher u,
ja mahapor an dayawon ju hija.”
7 Ja hitay chi inalin Apo Jos hi omaꞌ-atan hana angher na, an
“Hana angher u, ja un pfaaru,
an amat cha hi ijah ja apoy.”
8 Muti hay allona an omaꞌ-atan ni Empfalay na ja,
“He-a Apo Jos, chi mun-ap-apo hi ma-id chi pogpogna,
ja magpong hini atom an mun-ap-apo.
9 Hana magpong chi podhom an khun ma-at
ja pfuhulom hana napukhit an ma-at.
Hijaot un ha-in an Jos mu ja pinili chi-a
ja inchatan chi-a hi ot-ottongan an dayaw mu hana numpun-ibpfam
ta magwachaan a hi an-anla.”
10 Ja oha khu hi inalin Apo Jos an omaꞌ-atan ni Empfalay na ja,
“Chin hunhunana, ja he-a an Apo chi Nampfu ay tay lota
ja an amin chi gwa ad uchu.
11 Umali han arkhaw an ma-upfah an amin hato,
muti he-a ja munchochodcha a.
Mapaꞌ-i cha an amat hi lopfong an machonot.
12 Ipaꞌ-igwin mu an amat hi napfajag an lopfong ta mahukatan.
Muti he-a ja achi a marmarman
ja ma-id apogpokhan chi piꞌtakhuwam.”
13 Ja ma-id oh-ohha hi angher hi nangallan Apo Jos ay tay inali na ay ni Empfalay na an,
“Umpfun a ay tay nun-appit hi agwan u,
ingkhanah apfakoꞌ hana pfuhur mu.”
14 Hotti ngay haad chi angher? Chichay pfaar Apo Jos an achi matikhaw an khuna honakhon an tomolong hana tatakhu an takhuwona.