8
1 Kinaan nan kanan dan Impan di Kalnero nan mikapitun pokot nan naluddun an papel ya immop-opyan am-in di wadah langit hi kagodwan di oras.
2 Indani ya tinibok nadan pitun anghel an timmaddog hi hinangngab Apu Dios an waday nidat hi hin-oh-an tangguyub ke dida.
3 Indani ya immaliy ohan anghel ot tumaddog nah kad-an di altar an inodnana on balituk an duyun pangiha-adanah insenso. Indatan dah dakol an insenso ot ena gohbon nah balituk an altar ta mid-um hi dasal nadan tatagun Apu Dios. Hanan altar ya wadah hinangngab nan ubunan di ap-apu.
4 Hay ahuk nan insenso an inodnan nan anghel ya immeh kad-an Apu Dios an nakidatong hi dasal nadan tataguna.
5 Indani ya indalukduk na nan duyun di insenso nah apuy hi altar ot iwele nah luta ya mungkikidul, mungkikil-at ya mungkolyog hi nal-ot.
Hanadan anghel an mangialih ligat hituh lutan waday tangguyub da
6 Hanadan pitun anghel an waday tangguyub da ya nundadaan dan mangipagangoh tangguyub da.
7 Impagangon nan namangulun anghel di tangguyub na ya nungkag-ah lutay dalalu ya apuy an nad-uman hi dala. Ya niptokan di dandanin kagodwan di luta ot mungkaghob am-in di wadah di takon nadan kaiw ya holok.
8 Impagangon damdaman nan mikadwan anghel di tangguyub na ya wada on kay mundadalang an bilid an niweleh baybay.
9 Ya dandanin kagodwan di baybay di numbalin hi dala ot maten am-in di wadah di. Takon nadan bapor an wadah di ya napa-i da.
10 Impagangon nan mikatlun anghel di tangguyub na ya wada on mundadalang an ongal an bittuwon an nalpuh kabunyan ot mag-ah dandanin kagodwan di nadanuman tuh luta an dadiye nadan wangwang ya ob-ob.
11 Hay ngadan nan bittuwon ya pait te mumpait di danum nadah nag-ahana. Ot matey dakol an tatagu te ininum da.
12 Impagangon damdaman nan mikap-at an anghel di tangguyub na ya nama-id di pat-al di pangel di algo, bulan ya bittuwon ot humilong hi dandaniy godwan di algo ya ugge bimmulan hi dandaniy godwan di hilong.
13 In-ang-ang kud kabunyan ya waday muntaytayyapan an ongal an hamutin pun-itkuk nay “Makahmok an nunna-ud di tatagu tuh luta ten ipagangon nadan nanguddidin tulun anghel di tangguyub da.”