98
Hay kanta
1 Ikantaan takuh APU DIOS hi balun kanta te makakkaphod am-in di inat na. Gapuh ongal an kabaelana ya kakinaphod na ya impaka-apput nay buhul na.
2 Hiya an DIOS ya impatibonah kabobboble tuh lutan nangapput gapuh kabaelanan umihwang ya gapuh maandong an pangat na.
3 Uggena imbahho, mu impaannung nay hinamad nan kinalin kiphodan nadan holag Israel. Ya tinibon am-in di tagu tuh lutay nangapputana an AP-APU an Dios taku.
4 Mungkanta kayun am-in an tatagu tuh luta gapuh anla yu. Itkuk yuy pundayaw yun APU DIOS.
5 Om, mungkanta kayu ya mun-ayyuding kayuh pundayaw yun APU DIOS.
6 Muntangguyub kayu, mun-ippiip kayu ya mun-an-anla kayun mungkantah pundayaw yun hiya an Patul.
7 Takon di he-an baybay ya am-in di wadah nan matagu ya he-an luta ya am-in di wadah na, itkuk yuy kanta yuh pundayaw yun APU DIOS.
8 Ya dakayun wangwang, mumpalakpak kayu ya dakayun bibilid, mungkanta kayu gapuh anla yun mundayaw ke hiya,
9 te umalin mun-ap-apu tuh luta. Hiya ya maandong ya limpiyuy pangatna.