1 Dakayun iibbak, daan mot donglon yu tun ituttuduk. 2 Mun-ab-abigak ke dakayu mipanggep nadah ab-abig an ugge nainilay kibalinan da handih done ta pun-adalan yu.* 3 Dadiye nadan ab-abig an dingngol taku ya inila takun impaboltan handidan aammod taku. 4 Kalyon taku dadiye nadah imbabale takun mungkitun-ud ke ditaku. Adi taku e italu ke dida datuwen inat APU DIOS an mangipadayaw ke hiya ya umipamodwong gapuh ongal an kabaelana.

5 Indat na handidah aammod takun holag Jacob di tugunat kalkalyon da nadah iimbabale dan numbobled Israel 6 ta inilaon am-in di iimbabale dan mitun-ud ke dida ta ipainila da bo damdamah iimbabale dan mitun-ud ke dida. 7 Ta mundinol dan hiya ya mangun-unud dah ituttuduna ya ta adida kal-iwan nadan milagron inat na. 8 Ya ta adida iun-unud handidah aammod dan makangohhen uggeda inun-unud di tuguna ya uggeda nundinol ke hiya.

9 Hay kipatib-an nae ya nadan tindalun di Eplaim an namtik da handih nilappuy gubat takon di naka-almas da. 10 Man-uke ya imbahho day nakitobbalan Apu Dios ke didan kiphodan da ya kinahing day tuguna. 11 Kinal-iwan dan am-in nadan inat nan kiphodan da 12 takon nadan milagron inat nad Soan ad Egypt an tinibon handidan aammod da. 13 Ya nan nangodwaana nah danum nah Baybay ta kay dingding hi numbinah-el ot ipangulu na didan umagwat. 14 Deket mapat-al ya wadat nangamung nan kulabut an mangipangpangulun dida. Ya deket hilong ya mumbalin hi apuy ta mapat-alan di dalanon da. 15 Pini-ang na nadan batu nah adi maboblayan ot pabudalonay danum an ininum nadan tataguna. 16 Impabudal nay dakol an danum nah batun umat hi kadakol di danum hi wangwang.

17 Mu takon di tinibo da dadiye ya kapyanan intultuluy dan nunliwat hidi nah adi maboblayan te nginohe dah Apu Dios an Katagtag-ayan. 18 Ingnguddan dan patnaan hi Apu Dios hi nangipilitan dan idat nay pinhod dan kanon. 19 Ya adi maphod di kalidan hiya. Kanan day “Kon kabaelan Apu Dios an wadaon di makan nah adi maboblayan? 20 Man-u po te makulug an pinat-uwana nan batu ot bumudal di danum, mu kon kabaelanan wadaon di makan, umat hi tinapay ya dotag hitu?”

21 Dingngol APU DIOS hituwe ya namahig di boh-ol na ke dadiyen holag Jacob an Israel di ohan ngadana. 22 Man-uke ya adida pinhod an mundinol ke hiya ya munhalinduwa dah kabaelanan mangihwang ke dida. 23 Mu takon di athidi ya minandal Apu Dios di kabunyan ta mibughul ot 24 mungkag-ay tinapay an manna an nalpuh langit† 25 an dadiyey kanon nadan anghel. Ugge kimmudang hidiyen tinapay an indat nan dida ot makanan dan am-in. 26 Impaali na boy nakal-ot an dibdib an nalpuh nangappit hi timilan di algo ya hi south gapuh ongal an kabaelana. 27 Ot ialin diyen dibdib di dakol an hamuti umat hi kadakol di lonah pingngit di baybay. 28 Impungkohop na dadiyen hamuti nah nungkampuwan nadan holag Israel. 29 Ot pun-ihdan nadan tatagu ot makapnek da. Hidiyey inat Apu Dios an indat nan diday pinhod dan kanon. 30 Muden kediyen pungkan da dadiyen indat Apu Dios an hapulon da 31 ya bimmobboh-ol ke dida ot patayona nadan kakat-agun kalkal-otan ke didan holag Israel.

32 Mu intultuluy da metlaing an nunliwat ke Apu Dios. Uggeda nundinol ke hiya, takon di inat nay dakol an milagro. 33 Ot hidiyey gapunan impatatakut na dida ya pinoppog nay biyag da.

34 Deket pinaten Apu Dios di udum ke dida on nuntutuyu da uppeh liwat da on inhamad da mon mundasal ke hiya. 35 Immali moh nomnom dan hi Apu Dios an Katagtag-ayan di mangihwang ke didan paddungnay batun kihikugan da. 36 Mu takon di kanan day mangun-unud dan hiya ya kali ya abuh diye. Linangkakan dah Apu Dios te 37 uggeda in-ohhan hiyay pamhod da ya imbahho day nakitobbalan Apu Dios ke didan kiphodan da.

38 Mu takon di athidi ya kapyanan pakahhomkon Apu Dios didan tataguna. Ot kal-iwanay numbahulan da ot uggena dinadag dida. Inippoippol nay boh-ol nan dida takon di namindakol an impaboh-ol da hiya. 39 Te ninomnom nan tagu da ya abun kay da dibdib an hingkatang on nama-id.

40-41 Namindakol di nungngohayan da nah makaphod an abun Dios di holag Israel nah adi maboblayan ta pamatna dah kinaule na. Ta hidiye nan namahig an u-umyung. 42 Kinal-iwan dan hiya ya ongal di kabaelana, ya kinal-iwan da boy nangihwanganan didah buhul da, 43 takon nadan inat nan milagro ad Soan ad Egypt. 44 Ya impumbalinah dalay danum hanadah wangwang ya wa-el ot maid di inumon nadan iEgypt. 45 Ya impaenay dakkodakkol an lalog ya dakkodakkol an bakbak ot paligaton da nadan iEgypt ya dinadag day boble da. 46 Impaena boy dakol an dudun ot pa-iyon day intanom da. 47 Ya impaena boy dalalu ot mungkakatey intanom dah grapes ya fig 48 takon nadan babaka da. Ya nada ken udum an aggayam da ya pinaten di kil-at. 49 Gapuh namahig an boh-ol na ya impaalinay dakol an anghel nan pumate. 50 Uggena inippol di boh-ol na ot ipaalinay pistin di tagu an namaten dida. 51 Pinatenan am-in di panguluwan an iimbabalen di iEgypt an holag Ham. 52 Ot ipanguluna nadan tatagunan timmayan kediyen boblen kay da kalnero ot mundalan dah di nah adi maboblayan. 53 Ya impaptok na dida ot maid di ad-adin naat ke dida. Kinali uggeda timmakut. Mu nadan buhul da ya nalting da nah baybay te impundammuna nan danum.‡ 54 In-ena nadan tataguna nah poppog di mabilid an boblenan sinakup na gapuh ongal an kabaelana.§ 55 Handih mangmange nadan tataguna nadah eda pumboblayan ya dinog-al na mo tuwali nadan tatagun numbobleh di. Ot ikap-ong na dadiyen boble ke didan holag Israel an tataguna ya indat nan dida nadan babaleh dit kiha-adan da. *

56 Mu takon di athidiy inat Apu Dios an Katagtag-ayan hanadah tataguna ya nginohe day tugunat patnaan day ulena. 57 Umat da handidah aammod dan ugge da in-ohhay pamhod dan hiya ya uggeda nundinol ke hiya. Dida ya adida midinol, umat da nah nabakuy an pana. 58 Minam-a day boh-ol Apu Dios ke dida gapu nadah kinapya dan dios da ya gapu boh nangapyaan dah pundayawan da nadah ing-ingon di dios da. 59 Ot kediyen nanib-anan dadiyen inat da ya inwalong na didan tataguna. 60 Ot tayanana nan kiha-adanan Tabernacle ad Shiloh an nakiboblayana nadah tataguna. 61 Ya in-abulut nan pulhon di udum an tatagu nan Kahonan kitib-an di ongal an kabaelana ya dayaw na. 62 Gapuh boh-ol na nadah tataguna ya impipatena didah buhul da. 63 Nungkakatey iimbabale dan kakat-agun linalaki ot maid di in-inen di kakat-agun binabain imbabale da. 64 Takon nadan papadi da ya pinaten di buhul da ya nadan inayan da ya maid di innun dan mangibalun dida te namahig di punholholtapan da.

65 Kay anhan ya imminah Apu Dios an bimmoh-ol, umat nah tagun nabutong an nabiglan nabangun. 66 Ot apputona dadiyen buhul na ot mibabain dat nangamung. 67 Uggena piniliy numboblayan nadan holag Eplaim an holag Joseph, 68 mu pinili nay numboblayan nadan holag Judah ot nan bilid hidi an Zion an pakappinhod nay pinilinan kiha-adan. 69 Ot hidiy nangipataddogana nah Templonan natag-e ya nakahammad ta munnanong ta nangamung umat tuh luta.

70-71 Pinili nah David an pummuttatyunan ena inawit nah pumpattolanah kalnero ot pumbalinonan patul nadan tatagunan holag Israel. 72 Hi David ya nalaing an patul ya maphod di numpaptok nan dida.