75
Hay kantan Asap an midat nah mangipangpanguluh kanta. Hituwen kanta ya mikantan miunnud nah pungkantah “Adiyu pa-iyon.”
1 Mumpasalamat kamin he-a, Apu Dios. Emi kalkalyon di mipanggep hi kinatag-em ya mipanggep nadah umipamodwong an inat mu.
2 Kanan Apu Dios di “Waday gintud kun algon punhumalyaak hi tatagu. Limpiyuy punhumalyak.
3 Ha-oy di ukod hi ma-ma-at, ta hidiye nan takon di kumolyog ta munggagayonggong am-in di tatagu ya hodlok di nipab-unan tun lutat munnanong hidi.
4 Kalyak nadan mangohen kanak di ‘Itikod yun mumpahhiya.’ Ya kanak nadah gaga-ihoy ‘Adiyu ipahhiyay ongal an kabaelan yu.
5 Ya adiyu kanan di nakattag-e kayu mu ha-on. Itikod yun kumalih nalgonalgom.’ ”
6 Hay ahi munhumalyah tatagu ya adi malpuh nangappit hi timilan weno kalin-oban di algo, takon nah adi maboblayan
7 te hi APU DIOS mismuy ustun munhumalya. Hiyay nangamung an mangali hin numbahul di tagu weno ugge.
8 Paddungnay inodnana on basun napnuh namahig an boh-olnan iduyag nat pakainnummon nadan gaga-ihon tatagut maid di matdaan, takon di hintodtod.
9 Mu ha-oy ke pe ya ek kalkalyon di mipanggep hi kaphod Apu Dios. Ya ikankantak di pundayaw kun hiya an Dios di holag Israel.
10 Hi Apu Dios ya ma-idonay kabaelan nadan gaga-ihon tatagu, mu udmanay kabaelan nadan mangun-unud ke hiya.