64
Hay kantan David an midat nah mangipangpanguluh kanta
1 Apu Dios, donglom anhan di dasal kut ihwangak hi aton nadan buhul ku.
2 Adim anhan iabulut an maat ke ha-on di planun nadan gaga-ihon tatagu.
3 Himpappangey kanalyon da mipanggep ke ha-on. Mipaddung di dila da nah makataddom an hinalung weno nidongdong an pana.
4 Gagala dan mangiwahit hi kababain an langkak. Ya gapuh langkak da ya pa-iyon day maphod an tatagu.
5 Ihapitan day ibba dan mangat hi gaga-iho. Ya punhuhummanganan day pangiha-adan nah kaknaan di buhul da. Kanan day “Maid di mangang-ang ke datuwen iha-ad taku.”
6 Deket waday implanu dah gaga-iho on kanan day “Nakala-ing takun numplanu ketuwen aton taku.” Talagan adi mainilay wadah puhu ya nomnom di tagu.
7 Mu pinghanadi ya panaon Apu Dios didat mate da.
8 Om, dadagona dida gapu ke dadiyen gaga-ihon kalida. Ta nadan manibon dida ya munwigiwig dah panaltalangga dan dida.
9 Ta am-in di tagu ya mamodwong da. Ahida nomnomon am-in nadan umipamodwong an inat Apu Dios, ne eda kinalkaliy mipanggep ke dadiye.
10 Ya nadan makangngun-unud ke APU DIOS ya mihikug dan hiya, ya dayawon da ya umamlong da gapu nadah inat na.