41
Hay kantan David an midat nah mangipangpanguluh kanta
1 Umamlong nadan mauleh nawotwot te baddangan APU DIOS dida ten maligatan da.
2 Ipaptok na dida ya adina iabulut an waday aton di buhul dan didah gaga-iho. Ya bendisyonana dida ya ihwang na didah kate.
3 Deke bot mundogo da ya alubyagon APU DIOS didah punholholtapan da ya paphodona dida.
4 Kanak hi dasal kuy “APU DIOS, homkonak anhan. Ya paphodonak te nunliwatak ke he-a.”
5 Gaga-ihoy kanalyon di buhul ku mipanggep ke ha-on. Ya pinhod dan mateyak ta makal-iwanak.
6 Hanada ke bon oggan umalin mangidung-on ha-on ya kahin-al-alubyagon dat umali da ot ya abun mundongdongngol hi ngannen ad-adi mipanggep ke ha-on ne imme dat eda kanalkalyon hi tatagu.
7 Ya mungkukutyamman dadiyen buhul kun hay gaga-ihoy nonomnomon dan maat ke ha-on.
8 Kanan day “Maid di namnamana kediyen dogona! Nunna-ud an ikatena!”
9 Takon pay anhan nan nahamad an gayyum kun pundinolak ya adi mo maphod di pakihayyup nan ha-on ya inwalongak. Hidiye ya nakikakikan pay anhan ke ha-on.
10 APU DIOS, homkonak anhan ta paphodonak ta ibalok di inainat di buhul ku.
11 Inilak an umamlong kan ha-on te uggem in-abulut an apputonak hi buhul ku.
12 Inilak bon baddanganak ta miha-adak hi kawad-am ta nangamung te maphod di atok.
13 Madayaw nan AP-APU an Dios di holag Israel. Om, madayaw ta nangamung. Amen.