136
1 Mumpasalamat taku ke APU DIOS te hiya ya maphod!
Hanan ongal an pamhod na ya munnananong ta nangamung.
2 Mumpasalamat taku nah Katagtag-ayan an Dios.
Hanan ongal an pamhod na ya munnananong ta nangamung.
3 Mumpasalamat taku ke hiya an Ap-apun am-in di aap-apu.
Hanan ongal an pamhod na ya munnananong ta nangamung.
4 Hiya ya abuy nangat nadah umipamodwong an adi kabaelan di tagu.
Hanan ongal an pamhod na ya munnananong ta nangamung.
5 Lintunay kabunyan gapuh laing na.
Hanan ongal an pamhod na ya munnananong ta nangamung.
6 Inha-ad nay nipab-unan tun luta nah dallom di baybay.
Hanan ongal an pamhod na ya munnananong ta nangamung.
7 Lintunay bulan ya algo.
Hanan ongal an pamhod na ya munnananong ta nangamung.
8 Impumbalinay algon kay ap-apu nah mapat-al.
Hanan ongal an pamhod na ya munnananong ta nangamung.
9 Impumbalinay bulan ya bittuwon an kay ap-apu nah hilong.
Hanan ongal an pamhod na ya munnananong ta nangamung.
10 Pinate nay panguluwan an imbabalen di iEgypt.
Hanan ongal an pamhod na ya munnananong ta nangamung.
11 Ot ipanguluna nadan tatagunan holag Israel an tumayan ad Egypt.
Hanan ongal an pamhod na ya munnananong ta nangamung.
12 In-usal nay ongal an kabaelanan nangipangulu didan tatagunan holag Israel an timmayan hidi.
Hanan ongal an pamhod na ya munnananong ta nangamung.
13 Impunhi-anay danum nah Maingit an Baybay.
Hanan ongal an pamhod na ya munnananong ta nangamung.
14 Ot ipanguluna nadan tatagunan umagwat.
Hanan ongal an pamhod na ya munnananong ta nangamung.
15 Mu inanud na nadan tindalun iEgypt ya nan patul da.
Hanan ongal an pamhod na ya munnananong ta nangamung.
16 Impanguluna bo nadan tatagunan holag Israel an indalan da nah adi maboblayan.
Hanan ongal an pamhod na ya munnananong ta nangamung.
17 Numpate na nadan papatul an ongal di kabaelana.
Hanan ongal an pamhod na ya munnananong ta nangamung.
18 Takon nadan nundingngol an patul ya pinatena.
Hanan ongal an pamhod na ya munnananong ta nangamung.
19 Dadiye ya hi Sihon an patul di Amorite.
Hanan ongal an pamhod na ya munnananong ta nangamung.
20 Ya hi Og an patul di Bashan.
Hanan ongal an pamhod na ya munnananong ta nangamung.
21 Ot ipaboltanay boble da nadah tataguna.
Hanan ongal an pamhod na ya munnananong ta nangamung.
22 Indat nah dadiyen boble nadah tatagunan holag Israel ta pumboblayan da.
Hanan ongal an pamhod na ya munnananong ta nangamung.
23 Ugge ditaku inwalong an tataguna handih naapputan taku.
Hanan ongal an pamhod na ya munnananong ta nangamung.
24 Inihwang ditakun hiya nadah buhul taku.
Hanan ongal an pamhod na ya munnananong ta nangamung.
25 Indadaanay kanon am-in di lintuna.
Hanan ongal an pamhod na ya munnananong ta nangamung.
26 Kinali mumpasalamat taku ke hiya an Dios hi langit.
Hanan ongal an pamhod na ya munnananong ta nangamung.