3
Hay miappit hi pakihayyupan ke APU DIOS
1 Deket mun-appit di ohan taguh pakihayyupanan APU DIOS ya mahapul an bulug weno kaba-yan an bakan maid di dipektona.
2 Ihakmo nay taklenah ulun nan bakan iappit na ya kolngona nah nih-up hi hogpan nah Tabernacle. Ne iwaghik nadan padin imbabalen Aaron di dalan diyen baka nadah dingding nan altar.
3 Ya am-in nadan taban wadah dalom di adol na,
4 nadan duwan batin ya nan tabana, nan alte ya nan nikuyaput an taba ya miappit ke APU DIOS.
5 Itap-on nadan imbabalen Aaron datuwe nadah dotag an miappit ke APU DIOS ta gobhon da ya hay hamuy tuwen miappit ya umipaamlong ke APU DIOS.
6 Deket hay miappit ya kalnero weno gulding, mabalin di laba weno laki ya mahapul an maid di dipektona.
7-8 Ihakmon nan taguy taklenah ulun nan kalneron iappit na ne kolngona nah nih-up hi hogpan nah Tabernacle. Ne iwaghik nadan padiy dalan nan kalnero nadah dingding nan altar.
9 Hanan iwit na ya nan tabana, nadan taban di puhu ya putu,
10 nadan duwan batin ya nan tabana ya nan taban nikuyaput nah alte ya miappit ke APU DIOS.
11 Ya gobhon nadan padi datuwen makan an miappit ke APU DIOS.
12 Deket gulding di iappit nan tagun APU DIOS
13 ya ihakmo nay taklenah ulun diyen gulding ne kolongona nah nih-up hi hogpan nah Tabernacle. Ne iwaghik nadan padin imbabalen Aaron di dalana nadah dingding nan altar.
14 Hanan taban di puhu ya putuna,
15 nadan duwan batin takon nan tabana ya nan taban nikuyaput nah alte ya kaanon
16 nadan padi ne ginhob da nah altar ta miappit ke APU DIOS ya hay hamuy tuwe ya umipaamlong ke hiya. Am-in di taba ya niong-ong an miappit ke APU DIOS.
17 Adi mabalin an eyu kanon di taba ya dala. Hituwen tugun ya munnananong ta nangamung ya mahapul an un-unudon nadan holag yu takon di daanay pumboblayan da.’ ”