35
Intuluy Elihun kimmali
1 Kanan bon Elihu ke Job di
2 “Adi maphod, Job an em kanan di ‘Maid di bahul kun Apu Dios.’
3 weno ‘Maid di hilbin di pangun-unudak ke hiya.’ weno ‘Nganney ginun-ud kun ug-ugge nunliwat?’
4 Humangok di kinalim ya hay kinalin nadan gagayyum mu.
5 Itangad muh kabunyan ta tibom nadan kulabut ad tap-otap-o.
6 Kon kanana ket nunliwat ka, weno namindakol di nunliwatam ya kon waday maat di liwat mu ke Apu Dios?
7 Ya hin kananat maphod di inat mu kon waday ibaddang nan hiya? Weno nganney mahapul nan idat mun hiya?
8 Hay tatagu ya abuy maapektalan hanadah maphod weno gaga-ihon inat mu.
9 Deket maligatan hanadah tatagu ya mumpahpahmok nah mabalin an bumaddang ke hiyat mihwang kediyen ligat.
10 Yaden adi mumbagah baddang ke Apu Dios an nunlutun hiya. Yaden hi Apu Dios di mangalubyag hi tagut mungkanta takon nah tiempon maligatan.
11 Om, adida mumpabaddang ke hiyan nangidat hi laing dat natagtag-e da mu hay hahamuti ya aaggayam.
12 Mu hin kananat mundasal da ya adi humangon Apu Dios dida te mumpahhiya da ya gaga-iho da.
13 Kinali maid di hilbinan eda mundasal ke Apu Dios an Kabaelanan am-in te adina donglon di dasal da.
14 Ya nakaihhalla bo kaya hin etaku kanan di adina tibon di ma-ma-at. Te atonay maandong mu mahapul an had-on taku.
15 Kon pangalim, Job, on adi kastiguwon Apu Dios di munliwat?
16 Maid di hilbin di kinalikalim. Kay makudang di nomnom mu.”