☰ Isaiah 4
4
1 Kediyen tiempo ya o-ohay matdaan an linalakit hay pitun binabai ya pumpupullohan day ohan lalaki. Kanan dan hiyay “Daan anhan ta ibilang dakamin inayam ta adi kami mibabain an maid di inayan mi, takon kattog di nangamung kamin munhapul hi itanud mi mu ta ibilang dakamin inayam.”
Hay pangipaphodan bon APU DIOS hi Jerusalem
2 Ahi bo madatngan di tiempon mahaybong ya makaphod di ang-ang nan kanan dan Hapang APU DIOS.* Kediye ya ipahhiya ya pun-anlaan nadan natdaan an iIsrael di bungan am-in nadan nitanom nah boble. 3 Ya ibilang APU DIOS an makaphod an abu dadiyen tatagun piliyonan matdaan ad Jerusalem.†
4 Damanan atonah tuwe te kastiguwona nadan binabaid‡ Jerusalem gapuh liwat da. Takon nadan tatagun numbobleh din pimmatepate ya kastiguwon Apu Dios ta mama-id di gaga-ihoh boble te umat nah apuy di pangastiguna. 5 Ahina ipaali kediyen Bilid an Zion ya am-in hanadah naamung hidiy kulabut nah mapat-al ya mumbalin hi apuy nah hilong. Hidiyey kitib-anan waday dayaw APU DIOS ke dida ya ipaptok na dida. 6 Hidiyen kulabut di punhidum nadan tatagu nah potang ya hidiyey kihikugan da ten mumpuwok ya mun-udan.
* 4:2 Hituwen kanan dan “hanan hapang APU DIOS” ya tuluy kibalinana. Hay mamangulu ya kanan di udum an tataguy “Hay kibalinana ya hantuh magibbun madadag nan boble an Israel ya ahi bo makabbungay mitanom hidi.” Hay mikadwa ya kanan di udum an tataguy “Hay kibalinana ya hantuh magibbun madadag nan boble an Israel ya ahi bo pumpumhod.” Hay mikatlu ya kanan di udum an tataguy “Hay kibalinana ya nan itud-ak APU DIOS an kanan dan hi Kriston Mangipaptok hi tataguna.” Tibon yuy Jeremiah 23:5 ya 33:15 ya Sechariah 3:8; 6:12. † 4:3 Isaiah 1:9 ‡ 4:4 Hanadan nanginilah kalin di Hebrew ya kanan day hay kibalinan di binabai ketuwen verse ya bokon nadan binabai ya abu, mu takon di linalakid Jerusalem.
☰