☰ Isaiah 20
20
Hay pangapputan di Assyria hi Egypt ya Kus
1 Hi Sargon an patul di Assyria ya in-oldena nah ap-apun di tindaluna ot gubaton day Asdod an ongal an bobled Pilistia ot sakupon da. 2 Kediye ya kinalin APU DIOS tuwalin ha-on an hi Isaiah an imbabalen Amos an kaanok di apatut ku ya langgoten bulwatik ta eyak mundallanan.* Inun-unud ku ot atok hidiyeh tulun toon.
3 Kediyen sinakup di iAssyriay Asdod ya kanan APU DIOS di “Nan muttatyuk an hi Isaiah ya e dimmanallanan hi tulun toon an maid di bulwatina ya apatut na. Hidiyey nipainilaan nan ahi maat ad Egypt ya Kus. 4 Ahi alan nan patul di Assyria nadan iEgypt ya iKus an balud da takon di u-unga, aam-ama ya iin-ina. Adida mun-apatut ya mumbolad† dan makattiboy titipa dat kibabainan dan iEgypt. 5 Gapun diye ya madismaya ya tumakut nadan mangidinol nadah tatagud Kus‡ ya mangipahhiyah iEgypt§ ta mama-id di namnama da. 6 Kediyen tiempo ya ahi kanan dadiyen numboble nadah pingngit di baybay ad Pilistiay ‘Tibon taku key naat nadah tatagun pundinolan takun bumaddang an mangihwang ke ditakun nah aton nan patul di Assyria! Deket athidiy naat ke dida, ne nganne mo anhan di namnama takun mihwang?’ ”
* 20:2 Handi ya oggan kaanon di tindaluy bulwatin di balud da ta kibabainan da. Hi Isaiah ya e dimmanallanan hi tulun toon an ugge numbulwatit ipatibonan ahi maapput nadan iEgypt hi gubat ta mumbalin dan balud di iAssyria. † 20:4 Mikah 1:8 ‡ 20:5 Hanan boble an kanan dan Kus handih done ya hidiyey Sudan ya parten di Ethiopia ad uwani. § 20:5 Handih inapput di Assyriay nangappit hi north di Israel (722-721 B.C.) ya dakol nadah aap-apun di Judah di munhonan ke Hesekiah an makihummangan hanadah iEgypt ta bumaddang dan mangubat hi Assyria. Mu kinalyan Isaiah hi Hesekiah ya nadan tatagunat adida mundinol nadah iEgypt an bumaddang ke dida te maid di kabaelan da. (Tibon yuy Isaiah 30:1-2 ya 31:1.)
☰