8
1 Gulat ahan ta he"ay agi' an lala'in impa'inuman inah huhuna
ta ah'upa' he"ah nan owon ya inungngu' he"a,
at mi'id ah mamahal ay ha"in!
2 Ya itnud'u he"ah abung ina
ta ipa'inuma' he"ah nan munlameeh an bayah an pomegranate an intanom'u
ta hidiy pangituduwam ay ha"in hi aat di pamhod.
3 Ya ta ipipunganmuh ulu' nan iggid an ngamaymu,
ya nan agwanmuy pangawalmun ha"in.
4 At itulagyun binabaid Jerusalem
an adiyu bahibahon nan numpohhodanmih enggana!”
Hay Ingkantan nan Liligwan nan Babaid Jerusalem:
5 “Na'uy han ungan babain nalpuh nan mapulun
an ene'eddonah nan ngamay di enghana!”
Hay Ingkantan nan Babai:
“Binangon da'ah din nolo'am hinan puun di ayiw an mansanas
an din nalmuwam ya nangitungawan inam ay he"a.
6 Ya olom ni' ahan ya un anggay ha"in hi pohdom
ti nan pamhod di paddungnay timli an umat hi atoy ya lubu' an munnonong di milubu'.
Nan pamhod goh ya nidugdugah ya un nan gumiyagiyab an apuy.
7 Ya umat nongkay hinan gumiyagiyab an apuy
an ta"on hi un mundatong nan wangwang ya adi madop.
Ya adi manginaan di pamhod an ta"on hi un nidugah di inadangyan nan tagu.”
Hay Ingkantan nan Linala'in A'agin nan Babai:
8 “Wada han ung'ungngan agimin babain mi'id pay di nap'ol hi huhuna.
Ya gulat hi un waday me'yengha ya hay atonmi nin an mamadang ay hiya?
9 Ti gulat hi un umat hiyah allup
at ipattu'min hiya nan ata'nang an abung an silver.
Mu gulat ta umat hiyah pantaw at iyal'altimin hiya nan tablan cedar.”
Hay Ingkantan nan Babai:
10 “Ha"in di paddungnay allup,
ya nan huhu' di umat hi ata'nang an abung.
At hiyanan umamlong hi ahawa' ay ha"in,
ya mundenol ay ha"in ti waday alenggopana.
11 Hi Solomon an ahawa' ya waday punhabalanah greyp hi ad Ba'al Hamon,
ya impalia'nah nan tatagu.
Ya nan hinohhan nunlia' ya umidatdan hiyah hinlilibuh pihhuh dagwana.
12 Mu waday punhabala' hi greyp'u,
ya okoda' hi pangidata'.
At he"a, Solomon, ya hinlibun pihhuy idat'un he"a,
mu nan nunlia' ya un duway gahut di idat'u.”
Hay Ingkantan nan Lala'i:
13 “He"a an ahawa' an wah nan galden ya humapit'a
ti ten pa'appohpohdonmih nan i'ibba' an mundongol hinan hapitom!”
Hay Ingkantan nan Babai:
14 “Punnaudom an ahawa' an umalin manamun ha"in hinan aduntuduntug
an awadan nan nitamman nan miyammah bangbanglu!”