3
1 Amahdomahdom hinan olo'a' ya popohdo' an wada nan engha',
ya hapuhapulo',
mu mi'id hiya.
2 At la'tot ya bimmangona' ta umuy'u le'don nan babluy
ta anapo' hiyah nan akalakalata ya hinan plasan a'am'amungan di tatagu.
At inana'anap'u nan engha',
mu mi'id an agguy'u inah'upan.
3 Ya heden punle'le'dan nan linala'in guwalyah nan babluy ya inah'upana',
ya inali' ay diday,
Waday tinnigyuh nan engha'?
4 Ya unat goh wan linauha' dida ya inah'upa' din engha',
ya len'om'u,
ya ginogota' an agguy'u impogpogonan
ta engganay un'u inyanamut hi abungmi ta mun'ahawa ami.
5 At itulagyun da'yun binabaih tud Jerusalem
an adiyu bahibahon nan numpohhodanmih enggana!”
Nan Miyatlun Kanta an Umalian nan Lala'in Mungkasal
Hay Ingkantan nan Babai:
6 “Ngadan de han bimmuhu' an nalpuh nan mapulun an umat hinan natupug an ahu',
ya ma"aphod di hunghungnan umat hi hunghung di myrrh, ya incense,
ya nan udum an numbino'ob'on di hunghungnan ila'un nan mungkumildu?
7 Tigonyu an na'uy hi Solomon an inyattangda an nihadag hinan umbunana!
Ya nitnud nan nanom an mun'abi'ah an tindalu
an napto' hinan holag Israel ta mungguwalyan hiya.
8 Ya an aminda ya impa'enghadan mi'gubat ya numpunhanggapda
ta midadaandah un way mangubat ay didah nan mahdom.
9 Hi Solomon di nangipipaphod hidin niyattang an inumbunanan hay impiyammana ya nan ayiw an nalpud Lebanon,
10 ya na'amyudan hi silver nan tu'udna,
ya na'allungan hinan lo'ob an naboldaan hi balitu',
ya hay ap'apna ya nan munggudlan lo'ob an inal'altian nan binabaid Jerusalem.
11 Da'yun binabaid Jerusalem,
umali ayu ta tigonyu nan Alin hi Solomon an na'uklupan hidin uklupnah din nungkasalana
an din impiyuklup inana ay hiyah din gutud di algaw hi nun'am'amlongana!”