84
Mipa'amlong nan Mi'hituh nan Timplon Apo Dios
Hete ya psalm an intudo' nan linala'in holag Korah, ya hay intud'anda ya nan ap'apun di muntudtuduh kanta. Ya hay stylena ya gittith.
1 Nidugah an ma"aphod nan Timplu an ihinam,
Apo Dios an nidugah di abalinana!
2 At hiyaat un'u pa'appopohdon ya ihihi'al an umuy hidih nan Timplum
ta umuya' an mungkantah nan pun'amlonga' ay He"an Dios an matattagu tuwali.
3 Ya ta"on nan budeng ya pippiwong ya umuydan mangammah agabandah di
ta hidiy pun'itlugandah nan wadan di pun'onngandan He"a, Apu
an nidugah di abalinanan Ali' ya Dios'u.
4 Ya mipadenol nan wah din nihinah nan Timplum
ti gunda ikankantay pundayawdan mangipabagbagtun He"a.
5 Ya mipadenol goh nan tatagun He"ay pangededenolandah alpuwan di bi'ahda
ya munnonomnom an umuy hinan Timplum.
6 Ti heden aluhandah nan Hadog an Baca ya hin'alina ya un mumpanga'ayuh di danum hinan obob,
ya umudan, at mun'apnu nan ginnaw hi danum.
7 Ya heden pundaldalananda ya gun ma'ud'udman di bi'ahda an mundalan an umuy ad Zion
ta nangamung unda dumatong hidid Zion ta tigon da'a, Apo Dios.
8 O Apo Dios an nidugah di abalinana an Dios Jacob, donglom ni' di luwalu',
9 ya halimunam ni' ta wagaham nan alimin mangipapto' ay da'mi.
10 Immannung an ta"on un ohay algaw di pundayawan ay He"ah nan Timplum ya nabalbalul ya un nan hinlibun algaw.
Ya on'onaynah un hay tamu' ya unna' mun'adug hinan pantaw di Timplum ya un nan idduman hinan abung di nappuhiy pangatna.
11 Ti He"a, Apu, di patalmi ya baliwmi,
ya He"a goh di mangidat hi wagah ya ahaphapitanmi,
ya nidadaan'an mangidat hi mun'aphod hinan mangun'unud hinan pohdom.
12 O Apu an nidugah di abalinana, mawagahan nan mangehdol ay He"a!