39
Hay Nuntutuyuan nan Tagun Maligligatan
Hete ya psalm an intudo' David, ya intud'anah Jeduthun an ap'apun di muntudtuduh kanta.
1 Alyo' hi nomnom'uy,
“Halimuna' an amin di ato',
ya emayaa' di hapito' ta adia' mabaholan,
ya iyumo' ta adia' humaphapit hi un waday niddum hinan tatagun nappuhiy pangatda.”
2 Mu unat goh didindinonga' an ta"on hi un nan humapita' hinan maphod
mu un at goh namamay punligata'.
3 Ya la'tot ya bimmohola',
ya nan gun'u numanomnoman ya unnaat goh iyal'allay bungot'u,
ya himmapita' mahkay, ya inali' di,
4 “O Apu, ipa'innilam ni' ay ha"in hi un anuud di apogpoga'
ya nan uyap di algaw hi pi'tagua' ta innilao' di agadyuhan di ataya'!
5 Ti hay indatmuh atagua' ya un ahan ho'ho'dod an mi'id hulbinan He"a.
Ya immannung an hay nitaguan di tagu ya un na'amtang an umat hi ngau.
6 Ya ta"on un mahmahluy tagun muntamu mu mi'id di hulbina,
ya ta"on un gun mun'amung hi inadangyana mu nob'on di mamnoh hinan inadangyana.
7 Mu ad ugwan Apu, ya hay hahalimido' mah?
Un anggay He"ah pangehdola'!
8 Ibaliwa' ni' hi an amin an bahol'u,
ya adim ni' iyabulut an hinhannulona' hinan tatagun mid nomnomna.
9 Ya agguya' ahan himmaphapit an unna' dimmidinnong
ti inila' an He"ay nangidat hi nunholholtapa'.
10 At idinongmu ni' an mummoltan ha"in
ti nidugah ahan an mangluya' hi nangatmu.
11 Ya moltaom ya gilatom nan tatagun dumalat di baholda,
ya ubahom nan inadangyanda an umat hinan pama"in di la'oy,
at immannung an nan nitaguan di tagu ya un hinhapud ya nami'idda.
12 O Apu, donglom ni' tun luwalu' hi pumpahpahmo'a' ay He"a
ti ha"in ya unna' ay bunag an niddum ay He"a an umat hidin a'apu' hidin penghana an unda bunag.
13 At idinongmu ni' an mangilat ay ha"in ta way ato' an mi'yam'amlong
ya unna' mahkay matoy.”