14
Nan Anappuhin di Tatagu
Hete ya psalm an intudo' David, ya hay intud'ana ya nan ap'apun di muntudtuduh kanta.
(Psa. 53:1-6)
1 Hay punnomnom nan mangamangat hi nappuhi ya mi'id di Dios.
At nidugah an na"appuhiy wah nomnomda ya nan pangatda,
ya mi'id ah ohan didah mangat hi maphod.
2 Hi Apo Dios ad abuniyan ya u'uhdungana nan tataguh tun luta ta innilaonah un
waday oha ay didah nanomnoman an adi manghop an manginnilan Hiya.
3 Mu mi'id, ti din'ugda Hiya
an mi'id ahan ah ohah maphod di pangatna.
4 Ya inalin Apo Dios di,
“Mid ahan inilan danen mangamangat hi nappuhi
ti unda hay pumpumloh hinan tatagu' hi itanudda,
ya adida munluwalun Ha"in!”
5 Mu nidugah an ta'tandah Apo Dios
ti ipattignay atonan mamadang hinan nahamad an mangunud ay Hiya.
6 Ya ta"on hi unda ipadah an mama"ih nan planun di nun'awotwot
mu hi Apo Dios di mangipapto' an manalimun ay dida.
7 Hay luwalu' ahan ya baliwan ni' Apo Dios an wad Zion nan i'ibba' an holag Israel hinan buhulda!
At mundenol nan holag Jacob an nan holag Israel hi un pumhod di aatdan amin!