☰ Psalms 130
130
Hay Mikantah nan Punti'idan ad Jerusalem*
Hiyah te kantan ingkantan nan Hudyuh din nunti'idandan numbiyahen immuy ad Jerusalem.
1 Apo Dios, nidugah di numanomnoma',
at donglom ni' ahan di luwalu'.
2 Apu, donglom ni' ahan di pumpahpahmo'a' ta badangana'!
 
3 Apo Dios, inila' an gulatna nin ta nomnomom an amin di bahol di tatagu
ya mi'id di ohan adi mamolta.
4 Mu He"a ya aliwam di bahol,
at hiyanan e'gonan da'a.
 
5 Hohoddo' di pamadangan Apo Dios ay ha"in
ti hahalimido' din inalinan badangana'.
6 Immannung an hohoddo' ahan di pamadangan Apo Dios ay ha"in
ya un nan punhoodan nan mumpun'adug hi awa'ahana.
 
7 Ditu'un holag Israel, hahalimidon tu'uh Apo Dios ti nidugah an munnononnong di pamhodnan ditu'u
ya ongol di abalinanan mangibaliw ay ditu'u.
8 Immannung an Hiya ya anggay di mangibaliw ay ditu'un holag Israel hi an amin hi bahol tu'u!
* 130: Heten psalm ya duway niddumana ti nan oha ya niddum hinan kalahin di psalm an ma'alih Kantan di Munti'id ti hidin nunti'idan nan Hudyun immuy ad Jerusalem an mi'gotad ya hiyah te kalahin di kantan nundedehhandan nangikantah nan dalan. Ya nan netob hi niddumana ya nan ma'alih Nan Mangal'alu' hi A'aliwan di Bahol an Psalms ti waday muntutuyuh baholnan Apo Dios.
☰