☰ Psalms 112
112
Hay Umamlongan nan Tagun Mangita'ot ay Apo Dios*†
1 Madayaw hi Apo Dios!‡
 
Pa'amlongon Apo Dios nan tatagun ipa'anhanday pangatandah nan pohdona,
ya iyamlongday pangunudandah nan Tuguna.
 
2 Ya wagahan Apo Dios di holag nan umat hinan tagu
ta diday way nidugah hi abalinana.
3 Ya umadangyanda an mawadan amin di mahapulda,
ya minaynayun nan anahamaddah enggana.
4 Hay maphod an tagu ya ta"on di paddungnay helong di nitaguana
ya mapatalan ti ma'ma'ullay ya maphod di atona.
5 Maphod di ma'at hinan tagun ma'an'anidat,
ya mumpa'utang,
ya maphod di pangatna.
6 Ya immannung an mid nappuhih ma'at ay hiya,
ya adi al'alliwan nan tataguy amaphodna.
7 Ya adi goh tuma'ot hinan ulgudondan hiyan nappuhi
ti nahamad di pangulugna ya pundenolanan Apo Dios.
8 Ya adi goh numanomnom unu tuma'ot
ti inilana an umangunuh at nan buhulnay ma'abak.
9 Ya adi umukuh an bumadang hinan nun'awotwot an tatagu,
at hiyanan munnonong di pange'gon nan tatagun hiya,§
ya waday abalinana.
10 Mu nidugah di bohol ya amoh nan nappuhin tatagun hiyan pun'itibday babada
ti adi umannung an amin nan ninomnomdan pohdondah aton.
* 112: Heten psalm ya niddum hinan kalahin di psalm an ma'alih Hallel an Psalms ti hallel (unu hallelujah) di mahhun an mahapit hinan mahhun an nalammung an hapit (verse 1) unu hiyay angunuh an mahapit hinan angunuh an nalammung an hapit. † 112: Nan mahhun an letran di alphabet di Hudyu an A ya hiyay te"an di letrah nan mahhun an verse, ya nan miyadwan letran di alphabetda an B ya hiyay te"an di letrah nan miyadwan verse. Ya umat hinan aat ten psalm ti mahayhaynod nan hinohhan letran di alphabetda an mete"ah A ta engganah negpongana. ‡ 112:1 Hete ya hapit di Hudyu an hallelujah. § 112:9 II Cor. 9:9.
☰