7
Hay Udumnan Padan hinan ay Babain hi Umilugtap di Ngadana
1 Ya intuluy Solomon an nangulgud hi nipa"el hinan imbaluynan inalinay,
“Mahapul an nomnomom ya adim al'alliwan an he"an imbaluy'u an mangat hinan intugun'uh atom.
2 Ya mahapul an ihamadmun unudon nan intugun'u ta matagu'ah maphod,
ya halimunam tun itudu' an umat hinan ato'atom an manalimun hinan na'angnginan gina'um.
3 Ya paddungnay ihe'gotmu tun itudu' hinan galaygaymu,
ya ay itudo'muh nomnommu ta ipahalatommu.
4 Ya amnawam nan ay babain hi Anomnoman di ngadana,
ya amnawam goh nan ay aginan hi Pun'awat
5 ti diday mangibaliw ay he"ah nan babain hi Umilugtap di ngadana
an nan mangibalbalih nan pangal'alu'na.
6 Wa han ohay algaw ya indungaw'uh nan nibughul an tawan di abung'u,
7 ya waday tinnig'uh do'ol an mumpangilog an linala'in mi'id ah endamda,
mu waday inimmatuna' hi oha an immannung an nakudang di nomnomna.
8 Hiya ya ene'wanah nan nuntikkuan di kulhan neheggon hinan abung Umilugtap,
ya nunle'le'od an nundaldallanan an immuy hinan kulhan miyuy hi abung nen babai.
9 Hay olas ede ya munhinag an na'uy an mahdom an homelong.
10 Ya himbumagga ya nabanuhu' heden babain immuy nanamun hiya,
ya hi Umilugtap ya immannung an nunlubung hi lubung di puta
ti waday nappuhih ninomnomnah aton.
11 (Henen babai ya mango"ongol an humapit,
ya mi'id baina ya un munhenad hinan abungna an adi um'umbun
12 ti awnian wah dih nan kulha an munhood,
unu hinan way a'amungan di tataguh nan malkadu,
unu hinan nuntikkuan di kulha.)
13 Ya unat goh tinnignah den ungan lala'i ya len'omna hiya, ya inungnguna,
ya agguy bimmain an ni'hapit ay hiya, an inalinay,
14 Wadah abung'ud ugwan nan ene'nong'un dotag!
15 At hiyaat unna' limmahun an manamun he"a ti he"ay nomnomo' hi anapo',
ya ten ad ugwan ya inah'upa' he"a!
16 Ya impaphod'un inap'apan nan olo'a' hi naginnulitan hinan mundongngol an lo'ob an nalpud Egypt,
17 ya winalhia' hinan numbino'ob'on an maphod di hunghungna!
18 At umali'a ta ilablabitan ipuhay di le'natan mumpohhodan ta mun'am'amlongta!
19 Ya adim nomnomon nan ahawa' ti mi'id hidih abungmi ti numbaat hi adagwi.
20 Ya numbalun hiyah do'ol an pihhu,
at awni ta tumabay bulan ya un umanamut!
Hiyah ne inalina.
21 At henen babai ya nan ma"aphod an nanapitnay nabalbaliyan han ungan lala'i.
22 At la'tot ya na'al'alu',
at nitnud eden babai an umat hinan bakan ginuyuddan iyuy hinan way pumpaltian
unu umat hinan ulha an mundapuh an umuy hinan bitu
23 ta engganay un matubli' hi pana ta humawang hinan puhuna,
unu umat goh hiyah nan hamutin na'nah nan hulu mu agguyna inilah un hiyay dumalat hi atayana.
24 At he"an imbaluy'u ya donglom tun alyo',
ya ihamadmun innilaon tun hapito' an itugun'u!
25 Adim ahan iyunnud nan nomnommuh pangat nan umat hinan babai,
ya ta"on nan numbino'ob'on an kulhah wadana ya adi'a mumpahhiyal hidi.
26 Ya manu ay alyo' hene ti hiyay dimmalat hi nun'atayan nan do'ol an linala'in adi mabalin an ma'yap.
27 Ya nan abung nen babai ya paddungnay ongol an pantaw an mipluy hinan wadan din nun'atoy!”