3
Hay Mitugun hinan Ungungan Linala'i
1 Intuluy Solomon an nangulgud hi nipa"el an inalinay,
“He"an imbaluy'un lala'i ya adim ahan al'alliwan tun itudu' ay he"a
ti mahapul an italeponmuh nomnommu ta hiyay inaynayunmun unudon.
2 At atom ay hana ya maphod di nitaguam hitun luta,
ya dumu'du"oy di ataguam.
3 Ya adim idinong an gun mangipattig hi pamhodmu ya ulaymuh nan i'ibbam an tagu
ti didan duwa ya ma'ahhapul ahan an paddungnay ibuungmuh bagangmu,
ya paddungna goh hi unmu itudo' hi nomnommu ta adida ma'aliwan.
4 Ti gulat ta umat hinay atom at umannung an umamlong hi Apo Dios an mannig ay he"a,
ya ta"on nan tatagu ya maphod di pannigdah aatmu.
5 Hi Apo Dios ya anggay di pange'kodam an amin hinan way ma'ma'at hi nitaguam,
ya adim edenol hinan inilam.
6 Ya an amin di atom ya mahapul an nomnomom hi Apo Dios
ta Hiyay mangituduh nan makulug an pangatmu.
7 Ya adim alyon hi nomnommuy unmu inilan amin di logom!
Ti hay atom ya hi Apo Dios di pangehdolam,
ya Hiyay e'gonam!
Ya adim aliwan an man'ug hi nappuhi!
8 Ya manu ay alyo' hene ti hanan unudom di mangipabi'ah hi odolmu,
at pumhod di nitaguam.
9 Adim aliwan an mangidawat ay Apo Dios an amin hi gina'um,
ya namama nan mun'aphod an bungan nan inhabalmu.
10 Ti gulat ta atom at ma"apnuy alangmu,
ya mitapal goh di udumnah nan lipog hinan do'ol an tibungmu ti ma"apnuda goh.
11 He"an imbaluy'u, adi'a madismayah un da'a ihingal ay Apo Dios hinan ibahhawam,
ya adi'a goh ngumaya ti od'odolnah unmu hamadon nan aatmu.
12 Ti gilaton Apo Dios an amin nan tatagun pohdona
an umat hinan aton di ommod an mangilat hinan imbaluynan pohpohdona.
13 Immannung an mawagahan nan taguh unna damuwon hi Anomnoman ti waday panginnilana
14 ti henen ay babai ya nidugdugah di hulbina ya un nan silver unu balitu'.
15 Hi Anomnoman ya aptan ahan ya un nan na'angnginan batu an ma'alih ruby,
ya ta"on goh an amin nan mun'a'amnawan ya mi'id ah nipaddungana.
16 Hi Anomnoman ya Hiyay dumalat hi dumu'du"oyan di ataguan hitun luta,
ya ta"on goh nan umadangyanan ya a'e'gonan.
17 Immannung an hi Anomnoman ya ipa'amlongnay nitaguam,
ya Hiyay dumalat hi alenggopan di nitaguam goh.
18 Mipadenol nan tagun nanginnila
ti hi Anomnoman di mangidat hi dumu'du"oyan di ataguanah tun luta.
19 Dumalat hi Anomnoman ya limmun Apo Dios tun luta ya ad daya,
20 ya dumalat nan ay aginan hi Pun'awat ya limmuna goh
nan danum hinan wangwang ya nan udan an nalpuh nan bunut.
21 He"an imbaluy'u,
pohdo' hi un minaynayun di anomnomam ya nan abalinam an manginnilah nan na'ahhamad,
ya adim abuluton an mami'id hanan abalinan an wan he"a
22 ti pumhod di ataguam hi unmu aton hana
an umatdah nan buung an umipaphod hi tigaw.
23 Ya mi'id al'alin he"ah nan pundaldallanam hinan umayam ti adi'a mahalibdud,
24 ya adi'a tuma'ot hi un'a molo' ti immannung an ma'allenggop'a.
25 Ya adi'a goh tuma'ot hinan malgom an himbumaggan umipaligat
ti hiyah ne lagbun nan tatagun nappuhiy ato'atonda ya anggay,
ya adi'a umat ay dida.
26 Ya hi Apo Dios goh di dumalat hi anatulidmu ti Hiyay mumpapto' ay he"a,
at makulug an paddungnay adi'a ma'nah nan hulu.
27 Ya adim iyukuh an bumadang hinan way munhapul hi badangmuh unmu abalinan,
28 at wada ay di umalin he"ah mumpabadang
(ya gulat ta waday imbolham hi pihhum),
ya adim ahan alyon ay hiyay,
Mun'adaw'an ha"in hi ma'et!
hi un way mabalin hi idatmud ad ugwan!
29 Makulug an adi ahan maphod hi unmu nomnomon an aton di nappuhih nan heneggonmu
ti dida ya he"ay edenolda.
30 Ya adim pumbaholan nan taguh un mi'id ah dimmalat,
ya namamah un mi'id di inatnah nappuhin he"a.
31 Ya adim amohan nan tagun mangat hi nappuhih nan ibbana,
ya adim iyengngoh hinan malgom an pangatna.
32 Ya manu ay adim aton ti hi Apo Dios ya nidugah di boholnah nan tagun nappuhiy atonda,
mu nan adi ma'innila ya ipa'innilanah nan tagun nahamad di pangatda.
33 Idutan Apo Dios nan mumpunhituh abung di tagun nappuhiy pangatna,
mu wagahana nan mumpunhituh nan abung di nahamad di pangatda.
34 Boholon Apo Dios nan tagun mangipabagtuh odolda,
mu nan mangipa'ampah odolda ya diday ipadutu'na.
35 At nan immannung an nala'eng ya nanomnoman an tatagu ya malagbuandah a'e'gonan nan tatagun dida,
mu nan tatagun nakudang di nomnomda ya diday bainona.”