24
Nan Miyapulu ta han Hiyam an Tugun
1 Adiyu amhan nan tatagun nappuhiy ato'atonda,
ya adi ayu mi'ligwan dida.
2 Ti un hay gumuluwanday nomnomnomonda,
ya hay nappuhiy gunda ulgudon an umipab'on hi ibbada.
Nan Miyaduwampulun Tugun
3 Nan nanomnoman an tagu ya nahamad di iyammanah punhituwanda
ti waday pun'u'unnudandan hina"ama.
4 Ya dumalat nan anala'engna ya punuwonay abungnah do'ol an mun'aphod ya nan mapla'an an gina'u.
Nan Miyaduwampulu ta han Ohan Tugun
5 Nan nanomnoman an tagu ya ma"aphod di anala'engna ya un nan tagun nidugah di bi'ahna
ti nan nanomnoman an tagu ya hiyay aptan ya un nan bi'ah di tagu.
6 Ti nan umuy mi'gubat ya mumpatugundah mahhun hinan nun'anomnoman ya unda makak
ti inilada an hay maphod an mitugun ay diday alpuwan di abalinandan mangabak.
Nan Miyaduwampulu ta han Duwan Tugun
7 Nan tagun nakudang di nomnomna ya adina ma'awatan di hahapiton nan nun'anomnoman,
at hiyaat un mahapul an dindinong hinan pi'yam'amungandah nan way hahapitondah ma'at.
Nan Miyaduwampulu ta han Tulun Tugun
8 Nan tagun hay gunna nomnomon ya un nan nappuhin pangat,
ya la'tot ya hay alyon nan tataguh aatna ya hiyay dumaladalat hi gulu.
9 At an amin nan nun'appuhin nomnomon nan nakudang di nomnomna ya bahol,
ya nan tagun pihupihulonay ibbana ya abohlan di tagu hiya.
Nan Miyaduwampulu ta Opat an Tugun
10 Nan tagun adi pa"edpol hinan way aligatana ya immannung an itang di abalinana!
Nan Miyaduwampulu ta Leman Tugun
11 Baliwanyu nan tagun mi'id ah inatnah nappuhi mu iyuyda hiya damdama ta ipapatoyda.
12 Mu gulat ta alyonyuh nomnomyuy,
“Oo, mu undan way inilamin nen na'at?”
Mu adi umat hinay atonyu ti hi Apo Dios ya inilanan amin di wah nomnomyu,
at Hiyay mumpanuh,
ya an amin di atonyuh nan udumnan tagu ya hiya goh di ma'at ay da'yu.
Nan Miyaduwampulu ta Onom an Tugun
13 He"an imbaluy'u, maphod hi unmu inumon nan danum di alig ti ipaphodnay odolmu,
ya munlameeh goh hi unmu tamtaman.
14 Ya umat goh hinay aat di atom an manomnoman ti immannung an ipaphodnay nitaguam,
ya gulat ta manomnoman'a at maphod di aatmuh udum hi algaw.
Nan Miyaduwampulu ta han Pitun Tugun
15 Adim iyunnud hi aton di mangakaw an bota'ona nan tagun nahamad di ugalina
ta wa ay ta makak ya henggopna abungna ta akawonday gina'una.
16 Ti nan tagun nahamad di ugalina ya anuhana ahan an ta"on hi un way do'ol an ligatna.
Ti ta"on hi un paddungnay maligatan an mundaldallanan ta mumpapitun magah mu gun bumangon damdama ta itultuluynan umuy,
mu adi umat hinay aton nan tagun nappuhiy ugalina ti un itang an ligat di mama"in hiya ya adi bumangon.
Nan Miyaduwampulu ta han Walun Tugun
17 Adi'a umamlong hi un way nappuhih ma'at hinan pi'bohholmu,
ya adim goh abatlan hi unda munligligat.
18 Ti inilan Apo Dios an amin di ato'atom,
at adina pohdon di umat hina,
ya omod unna idinong di pummoltaanan dida.
Nan Miyaduwampulu ta han Hiyam an Tugun
19 Adi'a numanomnom an dumalat nan maphod an ma'at hinan tatagun nappuhiy pangatda,
ya adim goh olman dida.
20 Ti nan tatagun nappuhiy pangatda ya immannung an mi'id maphod hi ma'at ay didah udum di algaw
ti hay nitaguanda ya umat hinan hilaw an madop hi pidwa.
Nan Miyatulumpulun Tugun
21 He"an imbaluy'un lala'i, e'gonam hi Apo Dios, ya e'gonam goh nan ali.
Ya adi'a ahan middum hinan mi'bohhol hinan gubilnu
22 ti didan duwa an inali' an me'gonan ya abalinandan mummoltan he"a,
ya mid mapto' ya numbino'ob'on an nappuhiy ma'at ay he"a!
Nan Udumnan Itugun nan Nun'ala'eng
23 Hiya hatuy udumnan intugun nan nun'ala'eng ya nun'anomnoman an tatagu:
Adi maphod hi un ipangngel nan mumpanuh hinan ohay atonah nan way mundiklammuan.
24 Ti gulat ta alyon nan munhumalyah un mi'id di bahol nan numbahol
at hiyay idutan nan tatagu, ya hiyay aboholanda.
25 Mu nan huwis an mangipa'annung an mummoltah nan nabaholan ya hiyay mawagahan,
at pumhod di nitaguana.
26 Nan tagun hay immannung di pambalnah nan way mibagan hiya
ya hiyah ne panginnilaan hi un hiyay nahamad an ligwa.
27 Awni ta munhabal'ah nan payawmu ta waday malmu ya unmu mahkay iyammay abungmu.
28 Adi'a mun'ihtiguh nan heneggonmuh un mi'id di inatnah nappuhi,
ya adim goh balbaliyan hiyah nan hapitom an layah.
29 Unu adim goh alyon di,
“Gapu ta waday inatnah nappuhin ha"in at iballoh'u din inatna!”
30 Wa han ohan algaw ya immuya' an nunle'le'od hinan payaw ya uman nan napayad an tagun nakudang di nomnomna.
31 Ya tinnig'un natawan,
ya nun'ahu'munan hi hubit,
ya nun'agday di tapengna.
32 Ya unat goh inamang'u ya ninomnom'uy aatna,
at waday inadal'u.
33 An gulat ta palpaliwam an momollo' ya yeyen'onmuy ngamaymu ta mun'eblay'ah na'amtang
34 at un na'amtang ya nawotwot'a
an umat'ah nan nahod'ap an nami'id an amin di mahapulna.