22
1 Gulat ta pilionyuy amaphod di tagu ya hay maphod
hi pilionyu ya nan amaphod di ugalina ya un nan do'ol an inadangyana.
2 Nan adangyan ya nan nawotwot ya hay pannig Apo Dios ya mi'id di nun'abhiwanda
ti manu ay ya hi Apo Dios di nunlumun didan duwa.
3 Nan tagun nanomnoman ya wa ay ta olmanan waday nappuhih ma'ma'at ya halimunanay odolna ta mid nappuhih ma'at ay hiya,
mu nan tagun nakudang di nomnomna ya adina ma'awatan nan ma'ma'at, at hiyanan waday nappuhih ma'at ay hiyah pidwa.
4 Hay lagbun nan mumpa'ampan tagun mange'gon ay Apo Dios
ya hay umadangyanana, ya hay pange'gonan nan tatagun hiya, ya hay amaphodan di nitaguanah tun luta.
5 Umipaligat di ataguan nan adi mangngol ti numbino'ob'on di atata'ot an ma'at ay hiya,
mu nan tagun manalimun hi nitaguana ya adi midmiddum ay dida.
6 Maphod di ma'at hi un nan tagu ya itudtuduwanay imbaluyna hi maphod an pangatna
ti ta"on hi un umilog ya adina du'gon.
7 Immannung an nan nun'awotwot ya diday ipapto' nan adadangyan,
ya umat goh hinan immutang an hiyay paddungnay himbut nan immutangana.
8 Nan tagun paddungnay mun'oho' hi nappuhih nan i'ibbana ya nappuhi goh di ma'at ay hiya,
ya ta"on unna ipilit di pohdona mu mid hulbina damdama ti ma'ubah hiyah pidwa.
9 Mawagahan nan tagun ma'an'aniddat ti nan nangibingayanah ma'an hinan nun'awotwot.
10 Pumpakakyu nan pumihul
at duminong di munhohongngel ya mumpapahhalan.
11 Nan tagun nahamad di nomnomna ya ma'ma'ullay di panapitna,
ya ta"on nan ali ya mi'ligwan hiya.
12 Halimunan Apo Dios nan makulug an panginnila,
mu guluwonay panginnilan nan agguy kimmulug ta mid hulbin nan hapitona.
13 Nan napayad an tagu ya do'ol di pambalnan alyonay,
“Adia' makmakak hi abung'u ti ini ya ihnay layon an mamatoy ay ha"in hinan dalan!”
14 Nan panapihapit nan nalinala'in babai ya umat hinan maluhung an bitu,
at nan tagun mangipabungot ay Apo Dios ya paddungnay magah eden bitu ta hiyay moltana.
15 Nan ung'ungungnga ya gangayna tuwalin nakudang di nomnomda, at atonday nappuhi,
mu wa ay ta gilaton nan o'ommodda at la'tot ya natugunda, ya pumhod di pangatda.
16 Nan tagun hay nun'awotwot di mamaonan punligaton ta way atonan umadangyan
ya nan tagun gun mangidat hi ipa'dawnah nan adangyan ya la'tot ya didan duwa ya mawotwotda.
Nan Tulumpulun Tugun nan Nun'ala'eng
17 Hay maphod hi atonyu ya ihamadyun donglon nan itudun di nun'ala'eng ya nan nun'anomnoman ta hiyay adalonyu
18 ti maphod unyu adalon ta adiyu al'alliwan,
at ipa'innilayu goh hinan udumna.
19 Ya manu ay itudu' hatun da'yud ugwan ya ta hi Apo Dios di pange'kodanyuh nitaguanyu.
20 Daten mehnod an tulumpulun tugun an intudo"u ya al'alu'on da'yu ta ma'adalan ayu,
21 ya immannung an diday makulug ya nepto' an tudtudu,
ya ta way itudtuduyuh nan i'ibbayu.
Nan Mahhun an Tugun
22 Adiyu mamaon an paligaton nan nawotwot an dumalat nan nawotwotanda,
ya adiyu goh paligaton didah nan punhumalyaan an dumalat nan itang an abalinanda.
23 Ya manu ay adiyu aton ti hi Apo Dios di bumadang ay dida,
at Hiyay mummoltah nan tagun mangipaligligat ay dida.
Nan Miyadwan Tugun
24 Adi ayu mi'ligwah nan tagun mabubungot,
ya adi ayu goh mitmitnud hinan tagun ak'akiddian bimmungot.
25 Ti atonyu ay at ini ya ipa'enghayu, at umat goh hinay aatyu,
ya naligat di pangidinnganyu.
Nan Miyatlun Tugun
26 Adi maphod hi unyu itulag an da'yuy okod an mumbayad hinan utang di ohan tagu.
27 Ti gulat ta madatngan henen gutud ya mahapul an da'yuy mumbayad ya mi'id ay di pumbayadyu
at nan gina'uyuy alanda an ta"on nan olo'anyu.
Nan Miyapat an Tugun
28 Adiyu goh ipahlig di igad hinan lutayun din inyamman din a'apuyuh penghana
ta polhonyuy lutan nan heneggonyu.
Nan Miyaleman Tugun
29 Nan tagun nahamad di atonah nan tamun ene'koddan hiyah tamuana ya hiyay mangitamuh nan way ipatamun nan ali,
ya bo'on mahkay nan na'ampan tataguy mangipatamun hiya.