3
Hay Ahumalyaan nan A'ap'apud Israel
1 Ya ha"in an hi Micah ya inali' goh di,
“Da'yun a'ap'apumin holag Israel an mumpumpapto' ya donglonyuy alyo':
Undan agguyyu inilay aat di nahamad an pangat tu'un holag Israel?
2 Ti un at goh hay penpenhodyu ya nan nappuhi an bo'on nan maphod!
Ti paligatonyu nan i'ibba tu'un tatagun Apo Dios
an paddungnay punlalatyuy up'upda an ta"on unda matattagu,
3 ya paddungnay unyu punggunitan dida,
ya numbongwahyuy tungalda,
ya nuntadtadyu goh an umat hinan dotag an mihaang!
4 At wada ay di gutud hi pumpabadanganyun a'ap'apun Apo Dios
ya adina ahan dongdonglon nan luwaluyu
ti ipo"oynay angahnan da'yu an dumalat nan nun'appuhin ina'inatyu.”
5 Ya waday hinapit Apo Dios an inalinay,
“Da'yun mumpunlangkak an propetan gun mamalbalih nan tatagu' ta omod unda mibahhaw
ti wa ay di mamangan ay da'yuh ma"aphod an ma'an ya alyonyuy,
Mawaday lenggop ay da'yu!
Mu wa ay ta adi da'yu panganon ya ente"ayun bumohol ay dida!
6 At hiyanan da'yun ma'aladyah an propeta ya magadyuh di apogpoganyu
an paddungnay mahelngan ayu,
at mapogpog nan paddungnay gunyu enapon
ti gunyu binalbaliyan nan tatagu' hinan gunyu impa'innilan dida.
7 At hanianyuy angahyu ti mabainan ayuh nan adi' pangipa'annungan hinan gunyu ibaag an ma'at hi udum di algaw
ti immannung an adi' tabolon nan ibagayu!”
8 Mu ha"in an hi Micah ya propetan niyo'odolan nan Na'abuniyanan an Lennawa,
at hiyanan waday abalina' an mangat hi nahamad,
ya hiyaat goh un way tulid'un mumpangibaag hinan nun'appuhin inat nan ibba tu'un holag Israel ya nan baholda.
9 At donglonyun a'ap'apumin holag Israel
an namahiw hinan nahamad an pangat ya namikuh nan makulug!
10 Manu ay gun ayu numpa'ammah a'abung hinan siudad ad Jerusalem
ti dumalat nan pimmatapatayanyu ya nan gunyu numbaholan
an hiyay nalmuwan di pihhu ya abalinanyu!
11 Ti da'yun huhuwis ya malagbuan ayuh un way ipanuhyu,
ya da'yun papadi ya gahin un way helduyu ya unyu itudtuduy Uldin,
ya da'yun propeta ya ibaagyuy ma'at hi udum di algaw hi un da'yu lagbuan.
Mu ta"on un umat hinay aatyun amin ya inaliyu damdamay,
“Edenol tu'un Apo Dios ti hiyaat un mi'id ah nappuhih ma'at ay ditu'u ti wagwadah Apo Dios ay ditu'u!”
12 At hiyanan da'yuy dumalat ya paddungnay ma'aladud Jerusalem an umat hinan payaw,
at mapa"id Jerusalem,
ya nan Timpluh nan nammagtun pundayawan ya mumbalin hi inalahan.