19
Nan Pangitulagan hinan Abaliwan ad Jerusalem
(Isa. 37:1-13)
1 Ya unat goh dengngol Hezekiah nan inulgud nan tindalun hennag din alid Assyria ya henekhekna goh din lubungna, ya nunlubung hidin langgut ya un umuy hinan Timplun Apo Dios.
2 Ya impa'ayagnah Eliakim an manalimun hinan palasyu, ya hi Shebna an muntudtudo', ya nan ap'apun di papadi, ya inalinan dida ta mumpunlubungdah langgut ta umuydah nan propetan hi Isaiah an hina' Amos.
3 Ya inalin Hezekiah ay diday, “Hiyah te alyonyu ay Isaiah: Ad ugwan di algaw di punholtapan tu'uh ligat, ya abainan tu'u, ya amoltaan tu'un umat hinan babain magadyuh an muntungaw, mu mi'id olognan mangipabuhu' ti mi'id bi'ahna.
4 Ya mid mapto' ya donglon ni' Apo Dios an Diosmun amin nan hinapit han upihyal an hennag nan alid Assyria an immalin namahapahal hinan matattagun hi Apo Dios. At okod hi Apo Dios an mangiballoh hinan nappuhin dengngolnan hinapitna. At hay atom ni' ya iluwaluan da'min na'angang an agguy natoy!”
5 Ya unat goh nidatong din hennag Hezekiah ay Isaiah ya inulguddan hiya din ipa'innilan nan Alin hi Hezekiah ay hiya.
6 Ya inalin Isaiah ay diday, “Alyonyuh nan apuyu an umat hituy hinapit Apo Dios an inalinay, Adi'a numanomnom hinan dengngolmun namain nan baal nan alid Assyria ay Ha"in an Dios.
7 At donglom tun alyo': Pata'to' nan alid Assyria ta wa ay ta donglona han paad an nappuhi at mumbangngad hinan babluyna. Ya hidiy pangipapataya' ay hiya.”
Nan Miyadwan Nana'ta'atot nan i'Assyria
8 Ya unat goh numbangngad heden upihyal hi ad Assyria ya dengngolna an nakak ad Lachish nan alid Assyria ta immuyda ginubat ad Libnah at nangunuddah di.
9 Ya waday nangalin Sennacherib an alid Assyria an umuy han nalpuh nan himpampun an Cush an hi Tirhakah an alid Egypt ta gubatonda dida. At nuntudo' din alid Assyria, ya empehnagnah nan baalna ta umuyda goh idat ay Hezekiah an alid Judah.
10 Ya inalinah nan tudo' di, “Ihamadmu ta adi da'a balbaliyan hinan dayawom an pange'kodam hi unna alyon hi adi hakupon nan alid Assyria nan babluy ad Jerusalem!
11 Inila' an dengngolmuy aat di ina'inat nan alid Assyria ti nun'abakdan amin nan abablubabluy an inayanda. Ya un mah udot da'yu ya mabaliwan ayu?
12 Hidin numpangabakan din a'apu' hinan babluy ad Gozan, ya ad Haran, ya ad Rezeph, ya din tatagud Eden an nunhitud Tel Assar ya mi'id ah madayaw hi nangibaliw ay dida!
13 Hay na'at mah hidin alid Hamath, ya nan alid Arpad, ya nan alih nan babluy an Sepharvaim, ya nan alid Hena, unu nan alid Ivvah? Ma'innila an mi'idda!”
Nan Luwalun Hezekiah
(Isa. 37:14-20)
14 Ya unat goh binahan Hezekiah din tudo' an indat din nahnag an baal ya immuy hinan Timplun Apo Dios, ya bene'lagna din tudo' hidih hinagang Apo Dios.
15 Ya nunluwaluh Hezekiah ay Apo Dios, ya inalinay, “He"a, O Apo Dios an dayawon nan holag Israel, ya wah na an inumbun hinan umbunan di ali an wah nan numbattanan di Kahon ya nan duwan napaya'an an cherubim. He"a ya anggay di makulug an Dios, ya He"ay mumpapto' an amin hitun luta, ya He"ay nunlumud abuniyan ya tun luta.
16 Ya ad ugwan ni', Apo Dios, ya donglom, ya ihamadmun tigon tun ma'ma'at, ya donglom an amin nan hinapihapit Sennacherib an mananggatanggan He"an matattagun Dios.
17 Da'mi ya inilamiy, O Apo Dios, numpa"in nan alid Assyria ya nan titindaluna danen abablubabluy, ya numbalinondah mi'id di hulbida.
18 Ya nunggohobda nan bululda ta nun'apa"i ti bo'on makulug hi madayaw an un ayiw ya batun hay inyamman di tagu!
19 At ad ugwan, O Apo Dios an Diosmi, ya ipattigmuy abalinam ta ibaliw da'mih nan aton di i'Assyria ta way panginnilaan an amin nan tataguh tun lutan He"a ya anggay di immannung an Dios!”
Hay Inalin Isaiah hinan Alin hi Hezekiah
(Isa. 37:21-38; II Chron. 32:20-21)
20 Ya empehnag Isaiah an hina' Amos di tudo'nah nan Alin hi Hezekiah an inalinay, “Hi Apo Dios an nan Dios ad Israel ya dengngolna nan inluwalum ay Hiyah aat Sennacherib an alid Assyria.
21 Ya hiyah te kogoh di hinapit Apo Dios ay Sennacherib an inalinay,
Nan tataguh nan babluy ad Zion ya pumpahal da'a,
ya tanggatanggaan da'a,
ya abatlan da'ah nan tataguh nan bababbabluy,
ya iwigiwigday uludan he"a, Sennacherib.
22 Undan mi'id inilam hidin pinahapahalmu ya din binainmu?
Ya undan mi'id di inilam goh hi ngadan nan binugabugawam ya nan nangipattigam hinan numpabagtuam?
Hay nangatam ay dane ya Ha"in an nan Me'gonan an Dios ad Israel!
23 Hennagmu nan baalmu ta binaina' an Apo Dios ti inalim di,
Impang'u' nan do'ol an kalesa' an punluganan di mi'gubat,
ya tini'idmi nan atata'nang an aduntuduntug an ta"on nan pa"ata'nang an aduntuduntug ad Lebanon.
Ya hinlu'mi nan ma'ugtul an inalahan ta dinatnganmi nan gagwana,
ya nun'ipalngol'u nan pa"adu"oy an ayiw an cedar ya nan ma"aphod an bolbol.
24 Ya enehngelmu goh nan nun'iyammam an bubun hinan udum an babluy,
at ininummu nan danum di himpangili,
ya lintutmu nan Wangwang an Nile ta bimmad'ang nan tindalum.
25 Unmu dan agguy dengngol, Sennacherib, di aatna?
Ti hidin penghana ya Ha"in ad nomnom hitun ma'ma'at,
ya Ha"in goh di nangiyabulut an ma'at an amin hatu,
at Ha"in goh di nangiyabulut an pa"iom nan bababluy an nihamad di allupda.
26 At nan tatagun bimmabluy hidi ya nami'id di bi'ahda,
at nadismayada, ya nabainanda.
At umatdah nan pa'intannom an paguy hinan payaw an pa'attubu
unu nan holo' an himmangaw hinan atap di abung
an wa ay ta nunheglay potang ya nun'alyawda.
27 Ya inila' an amin di aatmu,
ya ta"on nan pohdom an aton,
ya nan umayam,
ya alpuwam.
Ya ta"on din nidugah an bimmungtam ay Ha"in ya inila' goh.
28 At dumalat nan nidugah an bungotmun Ha"in ya nan tinnig'un numpabagtuam
ya gilingo' di olongmu,
ya binungut'uy timidmu,
ya impabangngad'u he"ah nan dalan an nange'wam an immali.”
29 Ya inalin goh Isaiah ay Hezekiah an aliy, “Hiyah te pangimmatunan an ipapto' da'yun Apo Dios:
Ti ad ugwan an tawon ya nan bimmubungah inalahan di ononyu,
mu hi mehnod an tawon ya nan humangaw an malpu enen bungay pangngalanyuh bot'onyu,
ya hinan miyatlun tawon ya muntanom ayu mahkay hi greyp ta waday bumungah ononyu.
30 At da'yun tatagun na'angang ad Judah an nelwang hidin buhul
ya mahlag ayuh nan babluyyu,
at dumo'ol ayu.
31 Ya wada goh di malpuh nan Duntug an Zion hidid Jerusalem an melwang hinan buhul,
ya ma'at hana ti hiyah ne pa'appohdon Apo Dios hi ma'at.
32 Ya umat hituy inalin goh Apo Dios hi ma'at hinan alid Assyria:
Adi ahan hogpon nan tindalum tun babluy ad Jerusalem,
ya adida panaon di malgom hinan babluy.
Ya adi goh umalin meheggon hinan babluy nan numpunhapiaw an tindalum,
ya adida goh tababon nan allup ta pange'wandan manggop.
33 Ya alyon goh Apo Dios di,
Nan alid Assyria ya mumbangngad hi nalpuwana,
ya e'wana goh hidin enengwanan immali.
At adina ahan hogpon tun babluy
34 ti baliwa' heten babluy ta mi'id ma'at an dumalat nan anabagtu'
ya dumalat goh din baal'un hi David.”
35 Ya heden nahdom ya immuy han Anghel Apo Dios hinan kampun di tindalun nan i'Assyria, ya numpatoynay hinggahut ta han nawalu ta lemay libun tindalu. Ya unat goh nabiggat hi helhelong ya tinnigdan wah din awalitang di nun'atoy!
36 At tinaynan Sennacherib an alid Assyria nan nungkampuanda, ya mumbangngad hi ad Nineveh.
37 Ya wada han ohan algaw ya immuy hinan timplun mundayaw hinan bulul an hi Nisrok, ya wah di nan duwan imbabaluynan da Adrammelek ay Sharezer, ya numpalangda hiya ta natoy. Ya unat goh nalpah nan inatda ya limmayawdan hin'agi ta immuydad Ararat. Ya nan ohan lala'in imbaluynan hi Esarhaddon di nihukat ay amanan hi Sennacherib ta hiyay nun'ali.