2
Hay Nan'ugan nan Holag Israel ay Apo Dios
1 Inalin goh Apo Dios ay ha"in an hi Jeremiah di,
2 “Umuy'a ta ipa'innilam hinan iJerusalem daten ibaga' ay he"a:
An Ha"in an Dios ya ninomnom'uy ana'na'unnudyun tatagu' hidin penghana
ti inunuda' ay da'yu an ta"on hi un hinan mapulun
an umat ayuh nan pa"ahawanan babain ongol di namhodnah nan ahawana.
3 Hidin hopapna ya da'yun holag Israel di umat hinan hopap di mabto'
an Ha"in an Dios ya anggay di ne'nongana.
At hiyanan nidugah di nummolta' hidin nangipaligligat ay da'yu
an numpatoy'u dida.”
Hiyah ne hinapit Apo Dios.
4 At da'yun holag Israel ya donglonyu goh heten hinapit Apo Dios
5 ti inalinay,
“Undan way nibahhaw hi inat'uh din o'ommodyu ta din'uga' ay dida
ta nan bulul an mi'id di hulbinay dinaydayawda?
Hiyanan numbalindah mi'id di hulbidan Ha"in an umatda ay danen bulul!
6 Ya mi'id di alyondaan,
Anaad ahan ta bo'on hi Apo Dios di pumpabadangan tu'un nangawit ay ditu'ud Egypt?
Ti initnud ditu'uh nan mapulun an atata'ot an mi'id ah mamhod an munhituh di unu mange'wah di,
ya awadan di do'ol an bitu, ya batel, ya munhehellong?
7 Inyali' da'yun ten malumong an lutan awadan di do'ol an ma'an!
Mu hay inatyu ya pinuhiyu an dumalat nan do'ol an ato'atonyun nappuhi!
8 Ya ta"on un nan papadi ya mi'id ahan di alyondaan,
Hi Apo Dios di pumpabadangan tu'u!
Ya nan a'ap'apun mangipangpangulun da'yu ya ngohoyona' ay dida,
ya ta"on un nan numbino'ob'on an propeta ya hi Ba'al ya nan udum goh an bulul di nunhulbianda ya dinayawda!
9 At hiyanan Ha"in an Dios ya iballoh'un da'yuh nen numbaholanyu
an ta"on un hinan imbabaluy nan imbabaluyyu.”
Hiyah ne hinapit Apo Dios.
10 “Ti ta"on hi unyu ipluy hi appit hi alimuhan di algaw hi ad Cyprus
unu hi appit di buhu'an di algaw hi ad Kedar
ya mi'id di donglonyuh na'at hi umat hinah nunhegla!
11 Ti mi'id hinan udum an himpamabluy di umat ay da'yun nan'ug hinan dayawonda an ta"on un nan bulul!
Mu da'yun tatagu' ya umat hinay inatyu
ti din'uga' an Dios ta nan mi'id di hulbinay gunyu dinayaw!
12 At hiyanan ibaga' hinan wad abuniyan ta way atondan manoh'a ya womogwog hi ta'otda an dumalat nan inatyu!”
Hiyah ne hinapit Apo Dios.
13 “Ti da'yun tatagu' ya duway numbino'ob'on hi numbaholanyu:
Hay oha ya nan nan'uganyun Ha"in an paddungnay obob an alpuwan di danum an mangidat hi itaguan.
Ya hay miyadwa ya nan nunhulbianyuh nan bulul,
at paddungnay nunluhu' ayuh bubun an nanga' ta adi mabalin an waday ma'amung hi danum.”
14 Ya inalin goh Apo Dios di,
“Da'yun holag Israel ya bo'on ayu himbut hidin nitungawanyu,
mu anaad udot ta ad ugwan ya umat hinay nangat nan buhulyun da'yu?
15 An umatdah nan layon an punheelan da'yu,
ya numpa"ida nan babluyyu,
at ninganuy an mi'id mahkay di nunhituh di.
16 At nan i'Egypt an nalpud Memphis ya ad Tahpanhes di nama"ih nan a'e'gonanyu
ya nan abalinanyun holag Israel.
17 Ya manu ay umat hinay ma'ma'at ay da'yun holag Israel
ya dumalat nan nan'uganyun Ha"in an Dios
an ta"on ahan hi un'u pohdon an Ha"in di mangipangpangulun da'yu!
18 Mu anaad ta ad Egypt ya ad Assyria di numpabadanganyu?
Ya undan way imbadang nen inatyu?
Mi'id ti paddungnay un ayu immuy imminum hinan Wangwang an Nile ya hinan Wangwang an Euphrates.
19 Nan nun'appuhin pangatyu di lummuh amoltaanyu.
Mu ta"omman ta way panginnilaanyu an naligat hi un Ha"in an Dios di du'gonyu an adia' ta'tan
ti nidugah di ma'at ay da'yuh moltayu.”
Hiyah ne hinapit Apo Dios an na'abbagbagtu.
20 Ya inalina goh di,
“Da'yun holag Israel ya nadnoy tuwalin din'uga' ay da'yu
ti adiyu pohdon an Ha"in di dayawonyuh punhulbianyu.
At hay inatyun nundayaw hinan bulul ya gun ayu immuy hinan puun di mun'alubong an ayiw
hinan aduntuduntug ta hidiy nangatanyuh nan nun'appuhi.
21 Ya wan hay nipaddunganyuh din hopapna
ya nan ma"aphod an greyp an pento"u ta impaphod'un intanom.
Mu ad ugwan ya umat ayuh nan greyp an malgom di himmangawana!
22 At hay aat di numbaholanyu ya umat hinan lugit an adi abalinan di malgom an hobon an anon!
Ha"in an nabagtun Dios di nanapit ete.
23 Mu ihautyu damdaman alyonyuy,
Agguy immannung an hi Ba'al di dinayawmi!
Mu undan inaliwanyu nan ina'inatyuh nan Nundotal an Hinnom?
Ti namaag ya umat ayuh nan mangalabnay an kamilun adi duminong an umana'anap hi buta'al.
24 Ya umat ayu goh hinan dongkih inalahan an wa ay ta mangalabnay ya hiyay manimung an manama' hi buta'al
at adida maligatan nan buta'al an mamdug ay hiya.
25 Umat ayuh na an holag Israel an na"ablay ayun lumane'le'od an umuy mundayaw hinan malgom an bulul.
Ya ta"on ahan hi un'u inali ay da'yu ta idinongyu mu inaliyuy,
Adi mabalin ti nidugah di namhodmi ay danen bulul!”
Hay Aat di Ma'at hinan Holag Israel
26 Wada goh di inalin Apo Dios ay ha"in an inalinay,
“Nan mangakaw ya mabainan ahan hi un ma'ah'upan.
Mu da'yun holag Israel an ta"on un nan a'aliyu, ya nan u'upihyalyu,
ya nan papadiyu, ya nan numbino'ob'on an propetayu
27 ya inaliyu goh ahan hinan inyammayun bulul an ayiw ya batu di,
He"ay nanagun da'mi!
At din'uga' ahan ay da'yu!
Mu anaad ta wa ay di punligatanyu ya Ha"in an Dios di pumpabadanganyu?
28 At anaad ta adi ayu mahkay mumpabadang hinan inyammayun bulul ta ibaliw da'yuh unda abalinan?
Odolnaat do'olda nan dayawonyu an umat hi ado'ol nan babluyyud Judah!
29 At anaad ta munlili ayun alyonyuy un'u da'yu adi ibaliw
ya wan da'yuy nan'ug ay Ha"in?”
Hiyah ne hinapit Apo Dios.
30 “Ya ta"on hi un'u minolta da'yu ta olom ya manomnoman ayu mu mi'id damdamay hulbina
ti hihidya damdama an adia' unudon ay da'yu.
Ya unyuat goh numpatoy nan baal'un propeta an umat hinan pangat di layon di inatyu.
31 At hay alyo' ay da'yun holag Israel ya undan Ha"in an Dios ya ingnganuy'u da'yuh nan mapulun
unu inyuy da'yuh nan munhehellong ya atata'ot an babluy?
Ya anaad ta da'yun tatagu' ya alyonyuy,
Libli ami mahkay an mangat hinan pohpohdonmin aton
an adi mahapul an hi Apo Dios di dayawonmi!?
32 Nan babain mungkasal ya adi mabalin an aliwanan mangilubung hinan lubungna ya nan gina'unah nan algaw an pungkasalana!
Mu da'yun tatagu' ya inaliwana' ti ingnganuya' hi nabayag ay da'yu!
33 Anakkayah an din'uga' ta immuy ayu nannig hinan mi'id di abalinanan bumadang ay da'yu!
Ya tinuduwanyu goh udot di udum an nappuhiy pangatdan tatagu ta iyunnudah nan aatyu!
34 Ya umat goh an numpatoyyu nan nawotwot
an ta"on un mi'id di baholda,
ya agguyda nangakaw hi nunhituwanyu.
At nun'iwahit'uy daladah lubungyu.
35 Mu alyonyu damdamay mi'id di baholyu ta adi da'yu moltaon ay Apo Dios.
Mu mahapul damdaman moltaon da'yu ti numbahol ayu an ta"on unyu ihaut.
36 Hidin hopapna ya nan i'Assyria di numpabadanganyu,
ya gapu ta adi da'yu badangan ay dida ya immuy ayud Egypt.
Mu hihidya damdama goh an mi'id di imbadangdan da'yu!
37 Ya munlungdaya ayu mahkay an umanamut an hophopanyuy angahyuh bainyu
ti adi' haggungon nan tatagun pange'kodanyu.
At danen tatagun pange'kodanyu ya mi'id di ibadangdan da'yu.”