13
Nan Lo'ob an Linen an Balikis Jeremiah
1 Ya inalin Apo Dios ay ha"in di, “Umuy'a luma'uh linen an balikis, ya imbalikismu. Mu adim ahan itamol hi danum.
2 At limma'ua' hi linen an balikis an inunud'u nan inalina, ya imbalikis'u.”
3 Ya inalin goh Apo Dios ay ha"in di,
4 “Anom nan linen an imbalikismu, ya immuy'a ad Perath, ya impo"oymuh dih nan lingab hinan daplah.
5 At inyuy'un impo"oy hidid Perath ti hiyah ne inalin Apo Dios hi ato'.”
6 Ya unat goh naluh di do'ol an algaw ya inalin goh Apo Dios ay ha"in di, “Mumbangngad'ad Perath ta umuymu alan din linen an balikis an din inali' hi ipo"oymuh di.”
7 At immuya' ad Perath, ya bino"a' din nangipo"oya' hi balikis, mu tinnig'u an nadunut, at mid hulbina.
8 Ya inalin goh Apo Dios ay ha"in di,
9 “Umat hinay ato' an mangubah hinan mumpahiya an bimmabluy ad Judah.
10 Ti hanan nun'abaholan an tatagu ya adia' unudon, ya nidugah di ngohoyda, ya nan numbino'ob'on an bulul di dayawonda. At umatdah nan balikis an mi'id ah hulbida.
11 Ya wan hay penhod'u ya nahamad di pangedenolandan Ha"in ta umat hinan balikis an nibalikis hi gitang di tagu. Ya umat ay hina ya makulug an diday tatagu'. At dumalat nan pangipapto"un dida ya e'gonana' hi tataguh udum an babluy. Mu nihimung an adia' donglon ay dida.”
Nan Tibung an Ittuwan di Bayah
12 Ya inalin goh Apo Dios ay ha"in di, “Alyom hinan holag Israel an Ha"in di mangalih, An amin nan pangittuwan hi bayah ya bayah di mittu. Ya gulat ta alyonday, Undan agguymi inila ta gahin hi unmu ibagan da'mi?
13 ya alyom ay diday, Umat hituy hinapit Apo Dios an inalinay, Anaad ta da'yu ya agguyyu inilay niyatanyu? At hiyanan moltaon da'yun himpamabluy ti agguyyu inilay niyatanyu an paddungnay un ayu nun'abutong an namamah nan ali an holag David, ya nan papadi, ya nan numbino'ob'on an propeta, ya an amin nan numpunhitud Jerusalem.
14 Ya paddungnay puntetemmoogo' dida an ta"on hi unda nun'ala'ay unu ung'ungungnga, mu mumpapaddung di ma'at ay dida. Ya adi' ahan dida igohgohan, unu hom'on, unu adyuwan hitun pumpamataya' ay dida.”
Padan hinan Mumpahiya
15 Ya ha"in an hi Jeremiah ya inali' di,
“At da'yun holag Israel ya adi ayu mumpahiya
ti ma'ahhapul an donglonyu nan inalin Apo Dios.
16 Ya Hiyay ipabagtuyu ya unna ipa'ali nan pumatoy ay da'yun umat hinan munhehellong
ta adi ayu mun'ihubag hinan lumane'le'danyuh nan duntug!
At mumbangngad ayun Apo Dios ta adina pumbalinon hi helong nan patal an hahalimidonyu!
17 Mu gulat ta adi ayu dumngol at umannung an lugwaa' da'yu
ti da'yun tatagun Apo Dios ya miyuy ayuh udum an babluy ta hidiy ibaludanyu
an dumalat nan pumpahiyaanyu.”
18 Ya inalin goh Apo Dios ay ha"in di,
“Alyom hinan ali ya hi inana ta taynanda nan nabagtun haadda
ti wada damdamay mamloh hinan pumpapto'anda.
19 Ya nan abablubabluy ad Negev ya nun'itangobda,
at mi'id ah ohah mabalin hi pumitaw ya humgop.
Ya an amin nan iJudah ya miyuydah udum an babluy.
20 At tigonyun iJerusalem an na'uyda nan buhulyun malpuh appit hi iggid hi un hagangon di buhu'an di algaw!
Ya hay immayan mah din tatagun bumadang ay da'yu an din ehngelyu?
21 Hay punnomnomyu mah hi un iyabulut Apo Dios din hehemlonyun bumadang ay da'yu
ya didaat goh di mangubat ay da'yu ta diday mun'ap'apun da'yu?
At hay aat di punha'itan di punnomnomanyu ya umat hi ha'it di putun nan babain muntungaw.
22 Ya alyonyu nin hi nomnomyuy,
Anaad nin ta na'at an amin di umat hitu ay da'mi?
Manu ay ti dumalat nan do'ol an baholyu,
at hiyanan paddungnay pinilit da'yun nun'elo' hinan buhulyu.
23 Undan mabalin an hukatan nan tatagud Ethiopia nan mangmangitit an up'upda?
Umat goh hinan labang di animal an lepard an undan mabalin ta ma'aan?
Mabalin ay nin ya umat goh an mabalin an mahukatan hinan nepto' an pangat nan impa'enghayun nappuhin ato'atonyu!
24 At pun'iwa'at'u da'yuh nan abablubabluy
ta umat ayuh nan dugi an mun'iyaddib ta miwa'atda.
25 At henen ninomnom'un ma'at ay da'yu ya adi mabalin hi mahukatan an dumalat hi nan'uganyun Ha"in
ti nan nibahhaw an madayaw di endenolyu.
26 At Ha"in di paddungnay mamlad ay da'yu
ta mipattig di aatyu ta mabainan ayu
27 ti tinnig'u nan ina'inatyu an paddungnay inlugtapa' ay da'yu
ti nan abohla' ahan an udum an madayaw di dinayawyuh nan apayapayaw ya hinan dudunduntug.
Nidugah an mahmo' ayu ahan an iJerusalem!
At anuud nin di pangipogpoganyuh nan umata'atanyuh na?”