5
1 Ya intuluy Eliphaz an himmapit an inalinay,
“Mun'ayag'a akkay tuwali, Job, hi bumadang ay he"a
ta mapto' hi un way mambal ay he"a?
Ta"on hi un'a mun'ayag hinan anghel ya mi'id di umalin mamadang ay he"a!
2 Nan nunheglan bungot di hiyay dumalat hi atayan nan adi mangngol,
ya hay amoh ya patayona nan tagun mi'id inilana.
3 Ha"in ya hinamad'un tinnig han munlayah an ay ihunay un nahamad di nitaguana,
mu hi Apo Dios ya inidutanay pamilyana.
4 At mi'id pohod ya lenggop di pi'taguan nan imbabaluyda,
ya mi'id ah bumadang ay didah nan way punhumalyaan.
5 Ya nan mumpunhinaang an tatagu ya aminondan pun'a'an nan inhabal hanan munlayah,
ya ta"on nan himmangaw hinan way hubit ya ni'yalada,
ya pun'alan nan mangakaw nan mun'apla'an an gina'uda.
6 Nan ligat ya bo'on tun lutay nalpuwana,
ya adi goh ahan humangaw hitun lutay anawotwot.
7 Mu nan tagun mitungaw ya hiyay munlumuh ligatna
an umat hinan mumbanigit an malpuh nan apuy ya matu"ug.
8 Gulat ta ha"in di na'atana
at ibaga' ay Apo Dios ta Hiyay manumalyan ha"in.
9 Ti Hiya ya atona nan umipanoh'an adi olog di tagun mangat,
ya henen umipanoh'a ya adi ma'yap.
10 Ya ipa'alinay udan hitun luta
ta madanuman nan payaw.
11 Immannung an hi Apo Dios ya ipabagtuna nan tagun mangipa'ampah odolna,
ya al'alu'ona nan munlungdaya.
12 Ya bahibahonay ato'aton nan bumalbali
ta adida aton nan ninomnomdan ma'at.
13 Ya paddungnay bituona didah nan anala'engda
ta adi ma'at an amin nan way pohdondan aton.
14 Ta ta"on un mapatal ya homelong hinan wadanda,
ya ta"on un muntongay algaw ya ahida ap'apu'ap an ay nahdom.
15 Hi Apo Dios ya ibaliwna nan nun'awotwot hi atayanda,
ya ibaliwna goh didah aton nan nidugah di abalinandan mangipaligligat ay dida.
16 Hiyay mangidat hi namnaman nan nun'awotwot,
ya ipadinongnay hapit nan mangamangat hi nappuhi.
17 Mundenol nan tagun tugunon Apo Dios,
at adim pahalon nan panugun nan Nidugah di Abalinanan Nabagbagtu.
18 Ti hi Apo Dios ya humugat, mu du'pana goh,
ya pumaligat, mu ipa'adaogna.
19 Ya hi Apo Dios ya ibaliw da'ah nan way nappuhin ma'at,
ya ta"on un do'ol di ma'at hi aguluwam mu mi'id di ma'at hi nappuhin he"a.
20 Ya gulat ta waday batel ya pawadaonay tanudmu ta adi'a matoy,
ya ibaliw da'ah nan way gubat ta adi'a mapatoy.
21 Ya baliwan da'ah nan way hapitondah mamuhin he"a,
at adi'a tuma'ot hi un way dumalat hi apa"ian.
22 Adi'a goh tuma'ot an ta"on un atata'ot di ma'at ya batel,
ya adim ta'tan nan atata'ot an animal hi bubulung an agguy na'amu.
23 Ti nan animal hi bubulung ya ma'ma'ullaydan he"a,
ya mi'id ah batuh nan payaw hi aladuom.
24 At mi'id al'alih nan abungmu,
ya gulat ta uyapom nan kalnilum at mi'id ah ohah na'utaw.
25 Ya innilaom an dumo'ol di imbabaluymu,
ya gun dumo'ol di a'apum an umat hi ado'ol nan holo' hitun luta.
26 Ya adu"oy di pi'taguam,
at mabimabi'ah di odolmuh engganah nan algaw an gutud di atayam
an umat hinan paguy an hodon ta matong un ma'ala.
27 Da'mi ya inadalmiy aat date,
at ene'dammi,
ya immannung an ma'at hatu.
At he"a, Job, ya mahapul an donglom ya innilaom ta way pumhodam.”