30
1 Ya innaynayun Job an himmapit an inalinay,
“Mu ad ugwan ya ten unna' ilayalayahan hinan ungungan nahnot di tawonda ya un ha"in,
ya nan o'ommodda ya minaynayun di ami'id di hulbida,
at agguy'u inyabulut hi unda badangan nan ahu' an mun'adug hinan kalnilu'.
2 Mi'id di hulbida ti mi'id di maphod hi atondah ibadangdan ha"in,
ya na'ubah damdama nan bi'ahda.
3 Ya nidugah ahan di wumigwigandah hinaangda,
at umuydah nan mapulun hinan mahdom an munle'le'od ta mun'anapdah ononda.
4 Ya pumbu'nutda hay way himmangaw hinan mapulun,
ya nun'a'anda an ta"on hi un nan mi'id di tamtamnan lamut di talagaddaw ya numpe"anda.
5 Ya numpakak nan tatagu didah nan ni'babluyanda,
ya numbugawanda didan ayda nangakaw.
6 Hay nunhituwanda ya nan liyang hinan daplah,
ya nan nalut'u'an an daplah,
ya nan udum ya napilitandan nunhituh nan mamagan ginnaw.
7 Ya hidih nan mapulun ya ayda animal atog an ahida bubugaw,
ya gunda ma'amung hinan hiluk di nayobyoban an bilau ta mihi'ugda.
8 Mi'id ah hulbida an adida mibilang hi tagu
ti napakakdah nan numbabluyandah tun luta.
9 Mu ad ugwan ya ten ikankantaana' hi layah hinan imbabaluyda
an ibilanga' hi mi'id di hulbinan dida.
10 Ya pahiwona' ti adida ahan meheggon ay ha"in,
ya wa ay ta meheggonda ya nuntukpaanday angah'u!
11 Manu ay ya ten unna' numbalinon ay Apo Dios an na'akkapuy an mi'id di abalina',
at hiyaat unda mahkay aton an amin di pohpohdondan ha"in.
12 Ya hanan nun'appuhiy ugalida ya adida idinong an mamohol ay ha"in,
ya inyammaday ay huluh nan pange'wa',
ya impatagtaga' ta way ato' an ma'na.
13 Ya hinawananda nan dalan an pange'wa'
ta way atondan mangat an amin hinan pohdondan aton hi pangabakdan ha"in
ti iniladan mi'id ahan di mamadang ay ha"in.
14 Ya numpanga'alidan ha"in
an paddungnay nun'e'wadah nan nabut hinan allup ta atonday nappuhin ha"in.
15 At dumalat hana ya nidugah di ta'ot'u,
ya ten na'ubah din a'e'gona' an un himbumagga ya inyuy di tuyup,
ya din inadangyan'u ya ay bunut an nun'a'ubah.
16 Ya ten magadyuh di ataya' ti ten adi duminong tun holholtapo',
17 ya ilablabinan dumogodogoh tun lewoho',
at tumutu'ala' ti adi ahan duminong
an ay ngumutngungutngut di tungal'u.
18 Paddungnay un linapdit Apo Dios di lubung'u
an paddungnay unna' punho'ol.
19 Ya paddungnay impa'waha' hinan pito',
at umata' ahan hi agaga"ihaw an lugit.
20 Mu gunna' munluwalun He"a, O Apo Dios,
mu agguymu tembal.
Ya ta"on hi unna' tuma'dog hinan wadam
mu unna' butiwon ay He"a.
21 Nidugah di bumobohholam ay ha"in
ti dumalat nan nidugah an abalinam ya nunholholtapona'.
22 Ya paddungnay unna' at goh lina"uy,
ya impa'waha' hinan tuyup,
ya inongolmuy puo' ta enlewolewonga'.
23 Inila' an hay pohdom ya patayona'
ta umuya' hinan lugal an umayan an amin di matagu.
24 Immannung ahan an mi'id ah mamohol hi mangat hi nappuhih
nan tagun mumpabadang an maligligatan!
25 Mu unna' dan agguy ni'kilah nan way holholtapona,
ya unna' dan agguy ni'lungdayah nan way maligligatan?
26 Ya hay maphod di dedenno' hi ma'at mu bo'on ti un at goh hay nappuhiy na'at,
ya umat goh hinan patal an hiyay hohoddo',
mu bo'on ti un at goh hay helong di nawada.
27 Ya ten adi duminong di aguguluwan di punnomnoma',
ya heten gutud di nitagua' ya un hay ligat di holholtapo'.
28 Munlungdayaa' ti ten ngumitita',
mu bo'on hay potang di dumalat.
At immuya' an timma'dog hinan a'amu'amungan di tatagu ta numpahpahmo'a',
29 mu imbilanga' hi agin di ahuh nan inalahan an ma'alih jakals,
ya ibban di ongol an hamutin bannug.
30 Ya ten ngumitit di up'up'u,
ya nidugah an lumahuy odol'u.
31 Ya din hopapna ya hay mun'aphod an tukal di dongdonglo',
mu hay donglo' ad ugwan ya un hay kila ya ebel.”