28
1 Ya intuluy Job an himmapit an inalinay,
“Waday lugal an awadan di silver hi maminas,
ya wada goh di lugal hi puntanagan hi balitu'.
2 Nan gumo' ya ma'ah'upan hi un mabo"an,
ya nan gambang an malpuh nan mageleng an batu ya matanag.
3 Ya inilan nan tatagun mangiyammah nan dilag ta iyuydah pa'ahhelong
hi bunol di luta ta bo"anda nan nun'abalul an batu.
4 Ya munluhu'dah nan maluhung an minas hi bunol tun lutah nan adagwin mi'id ah taguh nunhitu,
ya un hay talin di gun pange'eddonan nan umuy mumminas hi bunolna
an ta"on hi un gun mumbinangngad nan talin an bumawobawoy.
5 Nan ma'an ya malmuh tun tu'yap di luta,
mu nan bunol di luta ya mun'abungbung ta mun'agimu' nan batu.
6 Ya hanan batun mun'agimu' ya waday nanginan batun sapphires,
ya waday balitu' an nilamut.
7 Mi'id ah mangah'up enen dalan hi bunol nen minas,
ya ta"on un nan hamutin nawi an nala'eng an mun'anap ya mi'id di olognan mannig.
8 Ya henen minas ya maluhung ahan,
at an amin nan animal hi inalahan ya agguyda pinadah an gempa',
ya ta"on un nan mumpahiyan layon ya agguyna gempa'.
9 Nan tatagu ya iniladan mumpamhal hinan batun wadan di balitu',
ya abalinandan pumbo"an nan aduntuduntug ta engganay un mabunhian di puuna.
10 Ya abalinandan minason ta engganay unda ah'upan nan nun'anginan batu,
11 ya gunda tuntunon nan nipalpuwan di wangwang
ta way atondan mangngal hinan nun'anginan gamong ta ibuhu'da.
12 At hay alpuwan mah nan anomnoman,
ya hay wadan di panganapan hi la'eng?
13 Mi'id ahan ah ohah nanginnilah wadana
ti adi ma'ah'upan hinan wadan di matagu.
14 Ya adi ahan ma'ah'upan an ta"on hi un hinan bunol di baybay,
15 ya adi mapla'an hinan na'ahhamad an balitu' unu do'ol an pihhu
16 ti nidugdugah nan balul di la'eng ya un nan ma"aphod an balitu' an nalpud Ophir
unu nan nun'angina ahan an batun ma'alih onyx unu sapphire.
17 Nan la'eng ya nidugah ahan di balulna ya un nan balitu',
ya adi ahan umday bayad nan balul di nun'anginan gina'u
unu nan nahibug an namahmah an balitu'.
18 Ya nidugdugah an na'angnginay la'eng ya un nan mun'apla'an an nun'abalul hitun luta
an umat hinan na'angnginan batun ma'alih jasper, unu ruby, unu coral.
19 Nan topaz an nalpud Ethiopia an na'angngina ya adi umdah bayad di la'eng,
ya ta"on un nan namahmah an balitu' ya adi umdah bayad di la'eng.
20 At hay alpuwan mah di anomnoman,
ya hay pangah'upan mah goh hi la'eng?
21 Adi pa'attig an amin nan mataguh la'eng,
ya ta"on un nan hamutin tumayap ad dayan mabi'ah di matada ya adida pa"ah'up.
22 Ya alyon nan Na'ubah an Natoy di,
Waday dengngolmi,
mu un ulgud ya anggay!
23 Hi Apo Dios ya anggay di nanginnilah wadan di pangah'upan hi la'eng
ya hay aton an manginnila
24 ti Hiya ya amangona nan pogpog di pingit tun luta,
ya tigonan amin nan wah tun lutan ampan ad abuniyan.
25 Ti unat goh indat Apo Dios di bi'ah nan puo'
ya tempongnay mun'olog hi udan an magah,
26 ya hidin nangiyuldinanah gutud di udan,
ya indadaanay pange'wan di ilat,
27 ya unat goh lempahnan amin hana ya ninomnomnay aat di la'eng,
ya hinamadnay aat di balulna,
at impa'innilanay aatna.
28 At inalinah nan tataguy,
Hay aat di nala'eng ya e'gonanah Apo Dios,
ya nan nanomnoman ya du'gonay nappuhi.”