15
Hay Miyadwah Himmapitan Eliphaz
1 Ya tembal Eliphaz an nalpud Teman an inalinay,
2 “Undan hiyah ne pambal nan nala'eng an tagun un mi'id hulbin nan hinapitna?
Ti nan panaphapitmu ya mid upidna an mi'id ahan hulbina!
3 Adi maphod hi un nan hapiton ya mi'id hulbina
ti nan umat hinan hapit ya mi'id ibadangna!
4 Nan nanapitmu ya hiyay dumalat hi pan'ugan nan udumnan tatagun Apo Dios,
ya dumalat goh hi adida punluwaluan ay Hiya.
5 Nan baholmu ya hiyay panginnilaan hi nangipahapit ay he"a
an unmu hanian nan numbaholam.
6 Ya bo'on ha"in di nangipa'innilah nan baholmu ti nalpuh timidmu,
ya nan panapitmuy mangipa'innilah aatmu!
7 Undan he"ay nahhun an nitungaw hidin penghana?
Ya undan he"ay nahhun hi nalmu ya un lumuwon Apo Dios nan dudunduntug?
8 Ya un'a dan wagwada ta ne'e'edngol'ah nan planun Apo Dios?
Un mah he"a ya anggay di waday inilana?
9 Ngadan di inilam an agguymi inila,
ya undan way ma'awatam hi adimi ma'awatan?
10 Hay nun'adalanmih la'engmi ya din nun'ala'ay
an din nun'a'ubanan an nahhun an nitungaw ya un hi amam.
11 Undan adi umda nan pangal'alu' Apo Dios ay he"a
an nan ma'ma'ullay an intugunmi?
12 Anaad ta paddungnay na'utaw di nomnommu ta omod un'a mabungot?
Nan aguguluwan di punle'nam ya hiyay mangipabungot ay he"ah nan pannigmun da'mi.
13 Ya un at goh hi Apo Dios di Hiyay nangipuhayam hi bungotmu ta omod un umat hinay hinapitmu?
Mi'id ah ohah taguh nahamad, ya mi'id ah baholna!
14 Undan way taguh mi'id am'amungit hi baholna,
ya undan way ohah tagun nitungaw an na'ahhamad di aatna?
15 Ya ta"on nan a'anghel ya adi goh ibilang Apo Dios didah na'ahhamad,
ya ta"on nan udum an wad abuniyan ya adida goh mibilang hi nahamad,
16 at inyal'allanah nan tagun na'abbaholan an iyom'omodnan mangat hi nappuhi!
17 At hay mahapul ya donglom ta ibaag'uy aat di tinnig'u ya nan inila'
18 an hiyanay intudun nan nun'ala'eng
ti nan intududa ya makulug an din inadaldah din o'ommodda
an mi'id ah inhautda.
19 An dida ya anggay di nidatan hinan luta,
ya mi'id ah bunag hi ni'hitun dida,
at mi'id di mangipabataan ay didah nan pangunudandan Apo Dios.
20 Nan tagun nappuhiy pangatnan mangipaligligat hi i'ibbanah tagu
ya nidugah di holholtaponah ligat hi engganay un mapogpog di nitaguana.
21 Ya waday donglonah atata'ot an hapit,
ya hogpon nan adi mangngol an mumpangakaw di abungnah
unna nomnomon an mi'id di al'alih nitaguana.
22 Ya adi goh umuy hinan munhehellong
ti tuma'ot ti ini ya waday mamatoy ay hiya!
23 Ya nan bannug ya hohoddonda ta ihdaday lamohna,
at inilanan magadyuh hiyan umuy hinan helong.
24 Ya nidugah di ta'otnah nan ma'at ay hiyah awni
an umat hi ta'otnah nan pangubatan di alin hiya
25 ti hiyah ne ma'at hinan tagun mananggatangga ya ma'angohhoy ay Apo Dios.
26 Ituliddan mi'hanggan Hiya
an umatdah nan tindalun mi'gubat an nahamad di hapiawna.
27 Nan nappuhiy pangatdan tatagu ya mun'atabada ya adadangyanda,
28 mu diday bumabluy hinan nataynan ya natawan an babluy hi awni.
29 At mun'a'ubah nan mun'apla'an an gina'uda ya nan inadangyanda,
ya adi mahkay mihinap di inadangyandah nan babluy.
30 Ya adi mabalin an lumayawda ta taynanday atayanda,
ya umatdah nan napa"in ayiw an genhob di apuy
ti hodohdaan Apo Dios dida ta ma'ubah.
31 Mahapul an adida edenol nan inadangyanda
an mi'id di hulbinah udum di algaw ti mi'id di lagbuda
32 an umat hinan ayiw an mun'agah di bungana ya un malum,
ya adi bumalluy tubuna.
33 Ya umatda goh hinan greyp an mun'agah di bungana ya un madatngan nan gutud di alumana,
ya umatda goh hinan olibon mun'agah di habhabungna.
34 Ya mi'id di holag nan tatagun mi'id di Diosda,
ya mun'oghob di abung nan tagun mangabulut hi lagbun mili"ud.
35 Dida hanay tatagun hay nappuhiy wah nomnomda
an gun mangat hi pumbaholan.
Ti hay nun'onan hi nomnomda ya nan gunda bumalbaliyan.”