9
Nan Mun'ali
1 Ya ha"in an hi Isaiah ya inali' hi ta"on hi un umat hinay ma'at ay da'yu, ya ta"on hi un hidin hopapna ya nabainan nan babluy di holag Zebulun ya nan holag Naphtali mu udum di algaw at mipabagbagtuh nen duwan provincia an mete"ah nan Lobong an Galilee ta engganah nan dammangna an malauhan nan Wangwang an Jordan hi awadan nan Hentil.
2 At nan tatagun paddungnay wadah nan munhehellong
ya tigonda nan mumbenang an patal ta mapatalanda.
3 At hitun a'atana ya ipado'ol da'min Apo Dios an holag Israel ta ipa'amlong da'mi,
at umat hinan pun'amlongan di ohan taguh nan pun'apitanah intanomna,
ya umat goh hi amlong di munggogodwah nan inabakdah gubat.
4 Ti pogpogom di abalinan nan mangipaligligat ay da'min tatagum.
At ibaliw da'mi
an umat hinan inatmun da Gideon hidin nangabakandah nan buhuldan iMidian.
5 Ya hay a'atan ne ya mun'oghob an amin di hapatus
ya nan nadadala an lubung di titindalun immuy ni'gubat.
6 Ti mitungaw nan ung'ungngan lala'i,
at Hiyay mun'ap'apun ditu'u.
Ya hay pungngadandan Hiya ya Nahamad an Muntugun,
ya Nidugah di Abalinanan Dios,
ya Mid Pogpogna an Ama,
ya Hiyay Alin Mangidat hi Lenggop.
7 Ya nidugah di abalinanan mumpapto' an adi mapogpog,
ya malenggop di pumpapto'ana.
Hiyay mihukat ay apuna an hi David hi ali.
Ya na'ahhamad di aat di pumpapto'nah mid pogpogna,
ya an amin hana ya aton Apu tu'un nidugah di abalinana.
Hay Bimmungtan Apo Dios hinan Holag Israel
8 Hi Apo Dios ya nahhun tuwalin impa'innilanan ditu'un holag Israel
di pummoltaanan ditu'u.
9 At an amin tu'un hinohhan iSamaria ya nan numbabluy hitud Israel ya inila tu'uh ne,
ya namamah nan mungngohoy ya mumpahiyan alyonday,
10 “Nun'apa"i tun a'abung an hay niyamma ya pito',
mu hukatan tu'uh nan nahilhilan an batu ta nahamhamad.
Ya hana ay goh an nun'alngoh an ayiw an fig
ya hukatan tu'uh nan ma"aphod an ayiw an cedar.”
11 Mu hi Apo Dios ya honogona nan alid Assyria an hi Rezin ya nan titindaluna
ta gubatondah ten mumpahiyan i'ibba tu'un i'Israel.
12 Ya middum nan i'Aram an malpuh appit hi buhu'an di algaw
ya nan iPhilistia an malpuh appit hi alimuhan di algaw
ta gubatonda nan i'ibba tu'un i'Israel ta mapogpogda.
Mu ta"on hi un umat hina
ya adi damdama ma'udyaan di bungot Apo Dios ay dida,
at hiyanan inaynayuna damdaman mummoltan dida.
13 Mu ta"on hi un umat hinay ma'at ay dida
ya hihidya damdaman adida muntutuyuh baholda,
ya adida mumpabadang ay Apo Dios an nidugah di abalinana.
14 At hiyanan un penghanon Apo Dios hi ohay algaw
an pumpatoy nan a'ap'apudad Israel ya nan tataguna.
At hay ma'at ya mipaddung hinan animal an mabogwah di uluna ya iwitna,
ya nan tubun di ayiw hinan hapangna.
15 At nan a'ap'apud Israel ya diday nipaddungan di ulu,
ya nan munlayah an propeta ya nipaddungdah iwit.
16 Ti nan a'ap'apu ya nibahhaw di intudtududah unudon nan tatagu
an lummuh aid di papto'ananda.
17 Ti indinongdan umunud ay Apo Dios,
at nun'appuhiy pangatda ya hapitonda.
At hiyanan bimmungot hi Apo Dios,
ya minoltana daten tataguna.
At ta"on hi un nan mumpangilog an ungunga,
ya nan nun'anguhu,
ya nan nun'abalu ya mitaggamdan adina hom'on dida.
18 Heten nun'appuhin pangat nan tatagu
ya umat hinan bimmi'ah an apuy hinan inalahan
an bo'on nan hubit ya anggay di gohbona
ti an amin nan dalanonah nan inalahan,
at umu'utyu' di ahu'nad daya.
19 At nan bungot Apo Dios an nidugah di abalinana
ya umat hinan bimmi'ah an apuy.
Ya nan paddungnay moghob ya nan tatagud Israel an way ohaan mumpipinnatoyda.
20 Ti wada ay di itang hi ma'an ya pumpopolhanda.
Mu hihidya damdaman mahinaanganda,
at la'tot ya ta"on hi un nan imbabaluyda ya ononda.
21 Ya hana ay an holag Manasseh ya nan holag Ephraim ya munggugubatda.
Mu palpaliwan goh ya munlalammungda damdama
ta gubatonda nan holag Judah.
Mu ta"on hi un umat hina
ya adi damdama ma'udyaan di bungot Apo Dios ay dida,
at hiyanan inaynayuna damdaman mummoltan dida.