63
Hay Nangabakan Apo Dios hinan Buhulna
1 Ya inali' an hi Isaiah di,
“Ngadan de han na'uy an nalpud Bozrah hi ad Edom
an nadadalay inlubungnan magayad an lubung di ali?
Ya mattig hinan panaldalanan nidugah di bi'ahna ya abalinana,
ya himmapit an inalinay,
Ha"in an Dios an nidugah di abalinanan bumaliw,
ya umalia' ta ipa'innila' an nangabaka'.”
2 Ya inayun'un inali' di,
“Anaad ta nadadalay lubungmu ya ma'abbolah
an umat hinan inlubung nan tagun mumpogoh hi greyp?”
3 Ya tembal Apo Dios an inalinay,
“O ti nun'igatin'u nan tataguh abablubabluy ti nidugah di bimmungta'.
At umat hinan atondah nan pumpogohan hi danum di greyp
an miyammah ma'inum di nangat'un didan ta"on hi unna' oha.
At hiyanan nadadala tun lubung'u.
4 Ti nadatngan di pamaliwa' hinan tatagu',
ya pummoltaa' hi baholda.
5 Ya manoh'aa' ti mi'id ah ta"on hi ohah immalin bimmadang hinan tatagu' ay Ha"in!
At hiyanan dumalat di bungot'u ya imballoh'uh nan buhul,
ya inabak'u dida.
6 At paddungnay nun'igatin'u nan tataguh abablubabluy
ta nun'iwahwahit di daladah nan luta.”
Nan Amaphod Apo Dios hinan Holag Israel
7 At hiyanan ha"in an hi Isaiah ya hapito' nan nidugah an pamhod Apo Dios!
“Madayaw hi Apo Dios!
Nidugah ahan di badangnan ditu'u!
Ti winagahan ditu'un holag Israel an dumalat nan nidugah an ama'ahhimo'na
ya nan pamhodnan mi'id di pogpogna.
8 Ti inalinay,
Diday tatagu' an adi mamalbalin Ha"in.
At hiyaat un ditu'u binaliwan.
9 Ti an amin nan hinolholtap tu'u ya ni'holtap goh hi Apo Dios.
At binaliwan ditu'u an dumalat di homo'na ya pamhodna,
ya gun ditu'u goh hinalimunan.
10 Mu un tu'uat goh gun nginohoy,
at impahiga tu'u nan Na'abuniyanan an Lennawa.
At hiyaat un numbalin hi Apo Dios hi buhul tu'un holag Israel,
at ginubat ditu'u.
11 Mu palpaliwan ya ninomnom tu'u din na'na'at hidin o'ommod tu'un nalpud Egypt,
at alyon tu'uy,
Hay wadan ad ugwan nan Dios an nangibaliw hidin o'ommod tu'uh nan nange'wandah nan baybay
ya nan nangidat hinan Na'abuniyanan an Lennawa ta niyodol ay dida?
12 Ya nunhiyanona nongkay nan baybay an dumalat nan nidugah an abalinanah
din nangita'nangan Moses hi ngamayna.
At hiyanan hiyay madayaw hi enggana.
13 Ya uggoh mah heden Dios an nangitnud ay didah
din nange'wandah nan mamagah nan gagwan di baybay?
At umatdah nan mabi'ah an kabayuh nan mapulun an adida mida'leh.
14 Ya impangulun nan Na'abuniyanan an Lennawa didah nan maphod an pun'eblayanda
an umatdah nan babakan iyuynahnan way mumballun holo'.
Umat hinay inatmu, Apo Dios, an nangipanguluh nan tatagum,
at hiyanan mipabagbagtu'a.”
Hay Luwaluh Pumpahmo'an ya Pumpabadangan
15 Ya nunluwalua' ya inali' di,
“Uhdungan ni' da'mi, Apo Dios, an wad abuniyan
ti hidi ya me'gonan ya ma"aphod.
Mu hay wadan mah din panalimunmun da'mi,
ya din abalinam,
ya nan pamhodmu,
ya ama'ahhimo'mu?
Un mah da'mi din'ug ay He"a?
16 Mu He"a damdamah amami!
Din o'ommodmih penghana an da Abraham ay Jacob
ya mid abalinandan mamadang ay da'mi,
mu He"a an amami di gun nangibaliw ay da'mi.
17 Ya anaad ta inyabulutmuy nibahhawanmih nan pohdom an unudonmi
ya inyabulutmuy nginumhayanmin He"a?
Haggungon ni' da'mi ti da'mi nan baalmun himpangapun tatagum!
18 Ma"am'amlong amin nundayaw hinan me'gonan an Timplum,
mu ten pina"in nan buhulmu.
19 Mu imbilang da'mih tatagum
an ta"on hi un bo'on He"ay imbilangmih nangipapto' ay da'mi,
an ta"on goh hi unmi agguy imbilang di odolmih tagum.”