56
Hay Abaliwan di Udum an Tatagu
1 Inalin Apo Dios ay ditu'un tataguy,
“Inaynayunyun gun mangat hi maphod ya makulug
ti magadyuh di pamaliwa' ay da'yu,
ya mipattig goh di anahamad'u.
2 Mipadenol nan mungngilin hinan algaw an Habadu an paniawondan muntamu,
ya nan manginaynayun an adi mangat hi nappuhi.”
3 Ya ha"in an hi Isaiah ya ninomnom'u an
maphod hi un mi'id di mangalih nan bunag an Hentil
an niddum hinan tatagun Apo Dios hi unna ilahhin dida.
Ya nan nabahigan ya maphod goh hi unda adi munlili
ta mi'id di mangalin didah unda adi mihakup hinan tataguna.
4 Ti alyon Apo Dios ay diday,
“Gulat ta e'gonana' hinan pungngilinanyuh nan algaw an Habadu,
ya atonyu nan umipa'amlong ay Ha"in an inaynayunyun mangat hinan intulag'u,
5 at nan ngadanyu ya adi ma'aliwan hinan Timplu'.
Ya odolnah ten ato' an hay amaphodyu ya un nan awadaan nan imbabaluyyu
ti adi ayu ahan ma'aliwan.
6 Ya wagaha' nan bunag an Hentil an mange'kod hi nitaguandan Ha"in
an Ha"in di itamuanda,
ya pa'appohpohdonda nan ngadan'u,
ya Ha"in di dayawonda,
ya gunda ngilinon nan algaw an Habadu,
ya nan gun manginaynayun an mangunud hinan intulag'u.
7 Ya itnud'u goh didad Zion an nan me'gonan an duntug'u,
ya ipa'amlong'u didah dih nan Abung'u an punluwaluan,
ya abuluto' nan e'nongdah nan pun'onngan.
Ti nan Timplu' ya mangadnan hi Timplu an punluwaluan an amin di tatagu.
8 Ya Ha"in an na'abbagbagtun Dios an nangibangngad hinan paddungnay
nun'ibalud an holag Israel ya alyo' di,
Amungo' di udumnah tatagu ta middumdan da'yun holag Israel.”
Hay Amoltaan nan Ap'apud Israel
9 Inayagan Apo Dios nan tataguh nan udum an babluy ta umalida
an umatdah nan animal hi inalahan ta pun'a'anda nan tataguna.
10 Ya nan a'ap'apu tu'un holag Israel ya paddungnay nun'abulawda an mi'id ah abalinanda
ti umatdah nan ahun mi'id di ologdan umanup an unda hay momollo'.
11 Ya umatda goh hinan ma'alom an ahu an unda mangamangan,
ya ta"on hi un diday a'ap'apu mu mi'id di ini'inilada.
Ya un nan pohpohdonday atonda ya un hay pumhodanday ang'anghadonda.
12 Ya alyonday,
“Pun'ala tu'u nan bayah ta pun'inum tu'u!
Ya umat goh hituy aton tu'uh ma'et,
at iyal'allanay umamlongan tu'u!”