53
1 Nan propeta ya inaliday,
“Undan udot hay mangulug nin hinan ipa'innilami?
Ya ngadan dane nin di nangipattigan Apo Dios hinan nidugah an abalinana?”
2 Heten Baal ya inabulut Apo Dios ta umat hinan ballu an hapeng an wah nan mamagan luta,
ya na'ampan tagu,
at hiyaat un mi'id di ma'agay'ayan ay Hiya.
3 Ya abohlan di tatagu Hiya an din'ugda Hiya,
ya nidugah di punligatana ya numanomnomana.
Ya du'gon nan tatagun adida pohdon an tigon ti nidugah di pamihuldan Hiya,
at mi'id di mangipabagtun Hiya.
4 Mu hiyaat goh di nunholholtap hinan holtapon tu'u,
ya wan imbilang tu'uh un moltan Apo Dios henen Hiya.
5 Mu bo'on ti nan bahol tu'uy dimmalat hi nunholholtapana
ti nahaplat an dimmalat di bahol tu'u.
At dumalat enen hinoltapna ya mabalin mahkay an middum tu'un Apo Dios,
ya dumalat nan hugatna ya mabalin an mipaphod tu'u.
6 An amin tu'u ya umat tu'uh nan kalnilun na'utaw
ti way ohaan nan pohpohdonay atona.
Mu hi Apo Dios ya inabulutnan Hiyay munholtap hi bahol tu'un amin.
7 At nidugah di inatdan nangipaligligat ay Hiya,
mu ene'edpolna an agguy ahan himmaphapit.
At mipaddung hinan uyaw an kalnilun umuyda golton,
ya umat goh hinan kalnilun un umu'ugong hi unda mapukihan.
8 At pinaligatda an ta"on hi un agguy numbahol,
ya hinumalyada ya inyuydah nan way atayana.
Mu nan tatagu ya agguyda ahan ninomnom an manu ay munholholtap
ti Hiyay mamoltah nan baholda ya nan bahol an amin nan tatagu.
9 Hiya ya mi'id di baholna,
ya mi'id di layah hi hinapitna.
Mu nilagat hinan nun'abaholan hinan natayanda,
mu nan lubu' di adangyan di nangilubu'anda.
10 Mu hi Apo Dios di ad nomnom enen ma'at ta Hiyay punholtaponah matoy
ta Hiyay Onong di Bahol tu'u.
Ya ta tigonay mibilang hi holagna,
ya ta dumu'du"oy di pi'taguana,
At nan pohdon Apo Dios hi ma'at ya mipa'annung an dumalat Hiya.
11 Ya wa ay ta malpah nan punholholtapana at umamlong mahkay ti waday nunhulbiana.
Ya alyon goh Apo Dios di,
“Heten un'unnud an Baal'u ya Hiyay mangiyatoy hi bahol di do'ol an tatagu,
at dumalat ay Hiya ya aliwa' di baholda.
12 At idat'uy a'e'gonana ta mibilang hinan madayaw ya ongol di abalinanan tatagu.
Ti Hiya ya abulutonan mapatoy an milagat hinan nabaholan an tatagu.
At Hiyay mangibo'lah baholda,
at iluwalunay a'aliwan di baholda.”